Зурвас бичих
Messenger
Залгах
- Batsuh
Амины орон сууц, байшингаа өөрсдөө дулаалцгаая
Хүйтний улирал эхэлж гадаа хасах температуртай болсон үед байшин, орон сууцаа өөрсдийн хүчээр дулаалж, түлш, эрчим хүчний зардлаа хэмнэж, агаарын бохирдлыг бууруулах боломжтой юм. Та бүхэндээ дулаалгын материалыг ашиглан байшин, орон сууцаа дотор талаас нь өөрсдийн гараар яаж дулаалах талаар цуврал зөвлөгөөг хүргэж байна.
Байшин, орон сууц дулаан алдагдалгүй байхын тулд хана, хучилтаа дулаалаад зогсохгүй шалаа дулаалах нь хамгийн чухал юм. Өрөө тасалгааны дулаан агаар дээш хөөрч шалны хучилтан дээр хүйтэн байдаг тул шалаа дулаалж тав тухтай орчин бүрдүүлэх нь хамгаас чухал юм.
Модон шалыг дулаалах
Шалыг дулаалахаас өмнө суурийг бэлтгэх хэрэгтэй. Бүх модон хийц хэсгүүдэд өмхрөлт, шавьжнаас хамгаалах арга хэмжээ авна. /түрхлэг түрхэх/ Дулаалгын материалаа байрлуулах дай модыг бэлтгэж, хар шалыг хадна. Хар шалны доор хөлдүү хөрснөөс хамгаалах ус тусгаарлалтын үеийг /хар цаас/ хийж өгч болно. Дулаалгын ажлын үндсэн материал нь уур ус тусгаарлагч, дулаалгын материал юм. Уур ус тусгаарлагч материалаар хар цаасыг хэрэглэдэг уламжлалтай байсан боловч өнөө үед төрөл бүрийн полимер хуйлмал материалууд, шингэн төрлийн түрхлэгийг хэрэглэж байна. Уур ус тусгаарлагч материал нь барилгын хийцийг ус уураас маш сайн тусгаарлах ба бактер болон мөөгөнцөртөхөөс сэргийлж, бат бэх чанарыг нэмэгдүүлдэг.
Модон шал хэрхэн дулаалах заавар, зөвлөмж
Алхам 1: Хар шалан дээр уур ус тусгаарлагчийг дэвсэнэ. Энэ нь хөрсний чийг шаланд нэвтрэхээс сэргийлнэ. Хана шалны уулзвар сайн битүүмжлэгдсэн байх ёстой.
Алхам 2: Уур ус тусгаарлагчийг дай модны хооронд байрлуулж, дай модон дээр үдэгчээр хадна.
Алхам 3: Уур ус тусгаарлагч дээр дулаалгын материалаа /чулуун хөвөн, шилэн хөвөн, хөөсөн полистирол хавтан, полиуретан хавтан/ зай завсаргүй дэвсэж өгнө. Дулаалгын материалын зузаан 50мм-с дээш байна.
Алхам 4: Дулаалгын материал дээрээ дахин уур тусгаарлагчийг дэвсэж өгнө. Уур тусгаарлагчийг өөр хооронд нь залгах ба ханатай зориулалтын туузаар нааж өгнө. Уур тусгаарлагч цэвэр шалны хооронд агааржуулалтын үе бий болгох зорилгоор 50 мм өндөртэй зай гаргана.
Алхам 5: Уур тусгаарлагчийн хоёр захыг зориулалтын тууз, хоёр талдаа цавуутай скочийг ашиглаж наах ба уур тусгаарлагчийн залгааг дай модон дээр хийж өгнө. Энэ тохиолдолд дулаалгын материал конденсатад /хөлрөлт/ орохгүй. Уур тусгаарлагчийн зөрүүлэг хамгийн багадаа 10 см байна.
Алхам 6: Уур тусгаарлагчийг уртын дагуу залгахаар бол мөн цавуутай туузыг ашиглана.
Алхам 7: Уур тусгаарлагчийг өөр хооронд нь үдэгчээр үдэж болохгүй, хэрэв үдвэл зай завсраар нь ус чийг нэвтэрч дулаалгын материал, тусгаарлагч материал нь ашиглалтын шаардлага хангахгүй болно.
Бэлтгэсэн: "Барилгачин групп"- ын зөвлөх инженер С.Тунгалаг
