Архангай аймгийн Засаг даргын Тамгын газраас 2018 онд Цахир, Төвшрүүлэх, Цэнхэр, Батцэнгэл сумдад багийн төв барих 265 сая төгрөгийн төсөвт өртөгтэй барилгын тендерт 2015 онд татан буугдсан “Легион” ХХК-ийг хууль бусаар сонгон шалгаруулсан зөрчлийг Авлигатай тэмцэх газар илрүүлсэн байна.

Тодруулбал, тус аймагт энэ онд улсын болон орон нутгийн хөрөнгөөр 72 төсөл, хөтөлбөрийн сонгон шалгаруулалт явуулсныг хянан шалгаад дээрх зөрчлийг илрүүлжээ. Мөн энэ үеэр тендерийн баримт бичгээ дутуу ирүүлсэн аж ахуйн нэгжийг сонгон шалгаруулсан, тоног төхөөрөмж, барилга засварын ажлыг хийж гүйцэтгэх ажиллах хүч дутмаг болон инженер техникийн ажилтангүй болон тендерийн баталгааны шаардлага хангаагүй, татварын өртэй аж ахуйн нэгжийг сонгон шалгаруулсан зэрэг хэд хэдэн зөрчлийг тогтоосон байна.