Барилгын ажил гүйцэтгэгч байгууллага, аж ахуйн нэгжүүдийн удирдах албан тушаалтан, инженер, техникийн ажилтнуудад зориулсан сургалт болж байна. Сургалтыг Барилга хот байгуулалтын яам, Барилгын хөгжлийн төв, Мэргэжлийн хяналтын ерөнхий газраас хамтран зохион байгуулж байгаа юм. Сургалтын талаар МХЕГ-ын Дэд бүтэц хяналтын газрын дарга Д.Жаргалаас тодрууллаа.

-Сургалтаар ямар мэдээллийг өгөхийг зорьсон бэ?

-Барилгын улирал эхэлж байгаатай холбоотойгоор “Эрүүл аюулгүй орчин-таны оролцоо” сэдвээр зохион байгуулж байна. Бид сургалтаараа барилга байгууламжийг угсралтын үед ямар алдаа гарч байна, хөдөлмөрийн аюулгүй байдал, эрүүл ахуйн аюулгүй байдалтай холбоотой зөвлөмжүүдийг өгөхөөр бэлдлээ.  Ажил олгогчдоос нийгмийн харилцаа, даатгалтай холбоотой аюулгүй байдал гээд энэ бүгд цогц байдаг гэдэг зүйлийг анхааруулж хэлэхийг зорьсон.  Хүн хэлэхээс нааш анхаардаггүй. Тиймээс элдэв осол аваар гарахаас урьдчилан сэргийлж бүх зүйл дээр анхаарч аюулгүй байгаарай хүний амь нас эрсдэх ёсгүй. Бүтээн байгуулалт үр ашигтай чанартай байх ёстой гэдгийг нэлээд тодорхой ажлыг энэ сард зохион байгуулахаар төлөвлөөд байгаагийн нэг нь энэ сургалт.

-Барилга байгууламжийн чанар аюулгүй байдал тал дээр  хийсэн судалгаа байдаг уу?

-Мэргэжлийн хяналтын байгууллагад сүүлийн жилүүдэд барилгын байгууламжийн төлөв байдлыг тогтоох, эрсдлийн түвшинг тогтоох мэдээллийн санг үүсгэх бааз бүрдүүлэх зорилгоор нэлээд томоохон ажлуудыг хийж байгаа. Энэ судалгаанаас харахад  118 мянга орчим барилга Монгол Улсад байна. Түүний 9,3% нь орон нутагт. Бусад нь нийслэлд ашиглагдаж байна. Ашиглалтын түвшингээр 1970 оноос өмнөх барилгын ашиглалтыг нэлээд анхаарах шаардлагатай.

-Барилгын компаниуд дээр ямар зөрчил илэрч байна вэ. Гарч байгаа ослыг бууруулахын тулд юуг хийх ёстой вэ?

-Барилга, байгууламж дээр гарч байгаа зөрчлүүд  зураг зохиогчийн төвшинд, угсралтын түвшинд ч байна. Дээр нь материалын чанар аюулгүй байдалтай алдаа оноо байна. Ерөнхийдөө 65-70 хувийг мэргэжлийн хяналтын зүгээс газар дээрээ арилгаж байна. Бусад нь  явцын дунд эсвэл бүр арилгах боломжгүй зөрчлүүд байдаг. Тэгэхээр энэ болгоныг эхнээс нь  эхлээд анхаараарай гэдгийг өнөөдрийн сургалтаар сануулахыг зорьсон. Тиймээс барилгын угсралт, ашиглалтын явцад нь ч мөн анхаараарай гэдгийг зураг зохиогчийн зүгээс, мэргэжлийн хяналтын газрын зүгээс, ашиглалт тал дээр нь эрх бүхий барилгын аж ахуйн нэгж байгууллагын зүгээс тавих хяналтаа цогц байлгаж чадвал барилга чанартай, аюулгүй босно.

МЭРГЭЖЛИЙН ХЯНАЛТЫН ЕРӨНХИЙ ГАЗРЫН ДЭД ДАРГА Г.СУГАРБАТ

-Барилгын байгууллагуудын удирдлагуудад анхааруулж хэлж байгаа гол асуудал нь юу байна вэ?

-2017 онд барилгын 17 осол гарч, найман хүн эрсдсэн. Барилгын компани аж ахуйн нэгжүүдийн удирдлагуудад Хөдөлмөрийн аюулгүй байдал тал дээр нэг л зүйлийг хэлж байгаа. Ямар ч сайхан өндөр барилга барилаа гээд хүний амь наснаас үнэтэй барилга байгууламж гэж байхгүй шүү гэдэг. Барилга байгууламжинд зарцуулсан мөнгөнийхөө 5-аас доошгүй хувийг аюулгүй байдалд зарцуулах хэрэгтэй. Мэргэжлийн хяналтын байгууллага компаниудын үйл ажиллагааг хааж бооно гэхээс илүүтэйгээр арга зүйн зөвлөгөө зөвлөмж өгч, тусалж дэмжиж ажиллана.

-Хөдөлмөрийн аюулгүй байдал алдагдахад хувь хүний хариуцлагагүй байдал илүүтэй яригддаг?

-Хувь хүний талаас осол аваар гаргаж байгаа зүйлийг судлаад үзэхээр гурван зүйл л байгаа юм. Нэгдүгээрт хэнэггүй байдал. Барилгын ажлаа эхлүүлэхдээ “Каска” өмс, хамгаалах хэрэгслээ зүүгээд гар гэдгийг мэргэжлийн байгууллагын зүгээс байнга хэлдэг. Гэтэл энэ бүгдийг ашигладаггүй. Энэ байдал нийт барилгын ажилтнууд дунд их бий. Хоёрдугаарт цагийн юмыг цагт нь хийх байдал. Энэ барилга дээр ийм алдаа дутагдал байна гээд хугацаатай үүрэг өгөхөөр тэрийг хийхгүй явж байгаад л яг тэнд нь осол гаргадаг. Тэгээд л мэргэжлийн хяналт ажлаа хийсэнгүй гэдэг. Жишээ хэлэхэд өнгөрсөн онд Хан-Уул дүүрэгт Кран унасан осол гарсан. Осол болохын өмнө Мэргэжлийн хяналтын газраас шалгалтаар яваад зогсоосон байсан барилга. Гэтэл дураараа ажиллаад осол гаргаж байгаа юм. Гуравдугаарт би өмнө нь дурьдсан дураараа байдал. Норм дүрэм баримлахгүй, хийх ёстой үйл ажиллагааг ханган биелүүлдэггүй байдал их нийтлэг. Тиймээс бид барилгын байгууллагын удирдлагуудтай хөдөлмөрийн аюулгүй байдал тал дээр Мэргэжлийн хяналтын газрын  байцаагч нар хяналт явуулахаас гадна та бүхэнтэй хамтран ажиллаж үүсэх эрсдлээ бууруульяа гэдэг асуудал яригдаж байгаа юм.

-Мэргэжлийн хяналтын газраас шалгалт хийгээд гарч болзошгүй эрсдлийг  хэдэн хувиар бууруулсан байдаг вэ?

-Үүсэх эрсдлийн онолоор гарсан эрсдлийг гарах гэж байсан эрсдлийн 10 хувь гэж тооцдог. Өөрөөр хэлбэл 2017 онд гарсан  17 ослын цаана 120 гаруй осолыг буруулсан гэсэн үг юм.