Хүүхдийнхээ зан чанар, сэтгэлгээ, сонирхолд нь тааруулж өрөөг нь тохижуулах нь хүүхдийг бие даахад, өрөөндөө цагийг зөв зохистой өнгөрүүлэхэд, өөрөө өөртэйгөө ярилцахад, тоглоход, өөрийн гэсэн орон зайгаа бий болгоход  эерэг нөлөө үзүүлж, зан аашийн төлөвшил, цаашдын амьдралд маш чухал байр суурь эзэлдэг болох нь тогтоогджээ.
Хүүхдийг тав тухтай байлгах үүднээс өрөөг нь хичээл хийх,  тоглох,  амрах гэсэн гурван хэсэгтэй төлөвлөх нь зохимжтой. Хүүхдийн өрөөнд гял цал, тод өнгөтэй тавилга байхаас илүү эрүүл мэндэд нь сайнаар нөлөөлөх, чанартай эд зүйлс хэрэгтэй байдаг. Модон тавилгууд агаар нэвтрүүлж, өрөөний энергийг нэмэгдүүлж, зогсонги байдалд орохоос сэргийлдэг тул хүүхдийн өрөөнд нэн тохиромжтой. Харин хананы обойн өнгө хүүхдийн харааг ядраахгүй, тайвшруулах өнгөтэй байвал хүүхэд өдөржингөө өрөөндөө өнжсөн ч чадна. Мэргэжилтнүүд хүүхдийн өрөөнд хамгийн тохиромжтой өнгийг цайвар ногоон гэж үздэг ч мэдээж хүүхдийн нас, хүйс зэргийг харгалзан эрэгтэй хүүхдийн өрөөнд усан цэнхэр, эмэгтэй хүүхдийн өрөөнд цайвар ягаан өнгө зэргээр сонгоорой. 
Модон ор хүүхдэд хамгийн сайн сонголт байх болно. Мөн ороо цонхноос хол байрлуулах хэрэгтэй. Хэрвээ зай хэмнэхийг хүсвэл эцэ, эхчүүд маань давхар ор авсан ч болно шүү дээ. Хүүхдийн өрөөний таазыг төрөл бүрээр хийж болно. Жишээлбэл, одтой тэнгэрт саран хэлбэртэй гэрэл гийж байгаа, эсвэл үүлтэй тэнгэрийг дүрсэлсэн гэх мэтээр. Мөн энд шувууд нисч, цаасан луу хөвж ч болох юм. Энэ бүхэн таны сэтгэн бодох чадвар, хүүхдийн хүсэлтээс ихээхэн хамаарна. Хамгийн гол нь эцэг эхчүүд хэр бүтээлч хандахаас шалтгаална шүү. 
Хүүхдүүдээ ханан дээр сарааччихлаа гэж бухимдахгүйн тулд ханын шкафны нүүр, хаалгыг шохойгоор зурах боломжтой болгоорой. Ийм бэлэн наалт ч гадуур зарагддаг болохыг сануулъя. Өрөөн доторхи өрөөнд дургүй хүүхэд гэж үгүй. Тиймээс майхан эсвэл, урц бэлтгээд өгвөл тэд баярласандаа дэвхцэх вий. Өнгөлөг өнгийн дэрнүүд хүүхдийн өрөөнд хэзээд тохирно. Өөрийнх нь эсвэл хамтарч хийсэн бүтээлээ жаазлаад ханандаа өлгөвөл таньд ч, үрд чинь ч сайхан дурсамж үлдэх  болно.