Гэр хорооллын айлуудыг инженерийн дэд бүтцээр хангаж, тав тухтай,  цахилгаан, цэвэр ус, хамгийн гол нь цэвэрлэх байгууламж, халуун устай болж, өөрийн эзэмшил хашаандаа тав тухтай амьдрах боломжтой болгох зорилгоор  “Дэд бүтцийн төв” төслийг НЗДТГ-аас хэрэгжүүлээд багагүй хугацаа өнгөрөөд байна. Энэхүү төслийн үйл явцтай БХБ-ын дэд сайд Б.Мөнхбаатар, Нийслэлийн Засаг даргын орлогч П.Баярхүү, Нийслэлийн Гэр хорооллын дэд бүтцийн газрын дарга Ч.Батбилэг болон холбогдох албаныхан танилцлаа.


 

“Дэд бүтцийн төв” төслийн хамгийн эхний загвар төслийг Чингэлтэй дүүргийн 7 дугаар хорооны нутаг дэвсгэрийн 220 нэгж талбарыг хамарсан 14.0 га газарт хэрэгжүүлж байна. Тус төслийн хүрээнд 285 айлын өрхийг инженерийн шугам сүлжээнд холбох бөгөөд эхний ээлжийн 33 айлыг одоогоор дулаанд холбоод байгаа юм. Мөн энэ хэсгийг жишиг хотхон болгох зорилготой ажиллаж байгаа бөгөөд авто зам, явган хүний, дугуйн зам, гэрэлтүүлэг, камержуулалт гээд тохижилтын ажлуудыг давхар шийдэж өгчээ. “Дэд бүтцийн төв”-ийн хувьд өөрийн гэсэн цэвэрлэх байгууламжтай бөгөөд энэ нь хоногт 520 куб метр бохир усыг  боловсруулж, 1000 хүртэлх айлын бохирыг цэвэршүүлэх хүчин чадалтай юм байна.

Нийслэлийн Засаг даргын орлогч П.Баярхүү “Өнөөдрийн байдлаар нийт ажлын гүйцэтгэл 70 гаруй хувьтай байна. Эхний ээлжинд айлуудаа дулаанд холбосон. Харин ирэх дөрөвдүгээр сарын 15-наас бохир усаа өгөхөөр төлөвлөөд ажиллаж байна. Төсөлд хамрагдсан бүх айл, өрх рүү шугам оруулах зардлыг НЗДТГ-аас шийдсэн. Харин айл, өрхүүдийн хувьд өөрсдөө ванн, душ, 00 суултуур, паар зэргээ шийдэх ёстой. Цэвэрлэх байгууламжаас гарч байгаа саарал усаар бид жижиг хэмжээний цөөрөм хийх бодол байгаа” хэмээн ярьсан байна. “Дэд бүтцийн төв”-ийг ирэх тавдугаар сард бүрэн хүлээлгэж өгөх юм байна. Үргэлжлүүлээд нийслэлийн Сонгинохайрхан, Баянзүрх дүүрэгт  хоёр “Дэд бүтцийн төв”-ийг барих бөгөөд нийт 20 тэрбум төгрөгийг төсөвлөжээ.