Өглөөний нар хүн бүр дээр ижилхэн тусаж, элч дулаанаа харамгүй хайрладаг. Хамгийн гол нь та хаана явж байна вэ. Гэртээ, ажил дээрээ эсвэл гадаа байна уу. Та хаана ч байж болох. Гагцхүү нар таны дээр ялгалгүй тусна. Нарны тусгал та биднийг илчээрээ төөнөдөгтэй ижил бидний бэлтгэсэн мэдээ, мэдээлэл таны гэр бүлийн тав тухтай орчинг бүрдүүлэхэд санаа өгөхөөр ээлжит шинэхэн дугаараа эрхлэн гаргалаа. Гэр бүлийн гишүүн бүрт хүртээмжтэй орон зайг бий болгон төлөвлөх, өвөрмөц хэв маягаар тохижуулах, сүүлийн үеийн дэвшилтэт технологийг багтаасан сонин содон мэдээлэл, нийтлэл, ярилцлагаа уншигч танд өргөн барьж байна.

Өвөл хаяанд ирж, хана, туурга, хаалга, цонхоор тань салхи сийгээд байгаа юм биш биз. Аль эсвэл ажилдаа дарагдаад шинэ орон сууц хайх завгүй явна уу. Шинэ соргог мэдээлэл уншмаар, авмаар санагдсан ч олдохгүй, бизнесээ тэлмээр байвч шинэ санаа төрөхгүй байвал нааш анхаарлаа хандуулаарай.

Энэ удаагийн сэтгүүлийн зочин хоймортоо Монголын барилгын салбарыг түүчээлэгч таван компанийн нэгдэл “Үндэсний бүтээн байгуулалтын корпораци”-ийн Гүйцэтгэх захирал С.Дотнобилигийг урьж, ярилцлаа. Тэрбээр барилгын салбарт нэвтрүүлж буй шинэ технологи, инновацийн төсөл, тулгамдаж буй асуудал, цаашид хөгжих боломжуудын талаар санал бодлоо хуваалцсан юм. Тэрчлэн “Утааны улирал хаяанд ирлээ, урьдын адил угаартсаар байх уу” гарчигтай нийтлэлээр төр засгийн зүгээс агаарын бохирдлыг бууруулах чиглэлд ямар бодит арга хэмжээ авч байгааг “Хөндөх сэдэв” буланд онцоллоо.   

Мөн зөвхөн танд зориулж хамгийн сүүлийн үеийн шинэ орон сууцны судалгаа, үнэ тариф, барилгын ажил гүйцэтгэлийн үнэлгээ, байгууллагын хяналтын систем, эх орондоо үйлдвэрлэсэн дэвшилтэд технологи бүхий бүтээгдэхүүн болон бүх нийтэд зориулсан саадгүй орчинг гэртээ хэрхэн бий болгох талаарх зөвлөгөө, мэдээлэл багтаасан “Барилга.МН” сэтгүүлийг эрхлэн хүргэж байна.