Нийслэл Улаанбаатар хот үүсэн байгуулагдсаны түүхт 379 жилийн ойн босгон дээр хотын хөгжилд үнэтэй хувь нэмэр оруулж, бүтээн байгуулалтын салбарт амжилттай ажилласан  байгууллагуудыг тодруулдаг “Гаруда 2018” ёслол хүндэтгэлийн ажиллагаа зургаа дахь жилдээ зохион байгуулагдаж, шилдэгүүдээ тодрууллаа.  Ёслолын ажиллагаанд НИТХ-ын дарга С.Амарсайхан, Нийслэлийн Засаг дарга бөгөөд Улаанбаатар хотын Захирагч С.Батболд нар оролцсон байна.
 





Шилдэг барилга байгууламж- “Бид энд бид” ХХК “Шинэ сонголт” их дэлгүүр шалгарлаа.
   Газар хөдлөлтийн 8 балд тэсвэртэй. Төмөр бетон, ган каркасаар хийсэн. Орчин үеийн технологи, өнгө хувирах чадварын хувьд нарны гэрлийн тусгалаас хамааран 3 өнгөөр хувирдаг, 3D фасадтай. Эрүүл ахуйн шаардлагыг бүрэн хангасан тохилог оффисын байр, худалдааны төв юм.
Шилдэг дэвшилтэт техник, технологи нэвтрүүлсэн салбар – “Монгол Базальт” ХХК  тодорлоо.
   Эрдэс хөвөн, дулаан тусгаарлагч материал үйлдвэрлэдэг цор ганц үйлдвэр юм. Түүхий эд материал, байгалийн цэвэр чулууг боловсруулан гаргаж авдаг. Галд шатахгүй, дуу чимээ, дулаан тусгаарлалт өндөр. Байгальд ээлтэй ногоон шошго авсан гээд дурдаад байвал олон сайн талтай аж.
Шилдэг авто зам, дэд бүтцийн салбар – БНХАУ-ын Элчин сайдын яам шалгарлаа.
    Монгол Улс болон Улаанбаатар хотын хэмжээнд гүүрийн төслийн ажил нь 3 хэсэгт огтлолцсон анхны олон түвшний  авто зам, гүүрэн байгууламж юм. Уг зам нь нийт 250.2 м урт, 20.5 м өргөн газар хөдлөлтийн 9 баллд тэсвэртэй. Улаанбаатар хотод анх удаагаа хийгдэж буй гүүрэн байгууламж юм.
Шилдэг франчайзинг - Circle K – конвениенс дэлгүүр тодорлоо
  Тус дэлгүүр нь одоогийн байдлаар дэлхийн 25 улсад 12.547 салбар дэлгүүртэй. Олон улсын хэмжээнд нэгдсэн нэг стандарт, хууль дүрмийг мөрдөж ажилладаг дэлгүүр юм.
Шилдэг брэндинг – “Денимон” ХХК Urban bran шалгарлаа.
   Деним  боловсруулах технологийг нутагшуулсан оёдлын анхны үйлдвэр юм.  Urban brand нэрийн дор бүтээгдэхүүнээ үйлдвэрлэн гаргаж, Улаанбаатар хотод 15 салбар дэлгүүр, орон нутагт 16 гэрээт борлуулагчаар худалдаалагддаг. Уламжлалт монгол үндэсний хувцсыг өдөр тутмын чөлөөт хэв маягтай хослуулсан “Хүрээ” коллекц нэрийн дор  олны нийтийн хүртээл болгоод байгаа юм.
Тусгай байр
    “Ус сувгийн удирдах газар”, “Нийслэлийн Авто зам хөгжлийн газар”, “Дүнхэн уулын буурал улиастай” ХХК, “Үлэмж органик” ХХК нар тус тус шалгарч, нийслэлийн бүтээн байгуулалтын дээд шагнал “Гаруда 2018” цом гардан авлаа.


 Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.