“Уур амьсгалын санхүүжилт: Барилгын салбарын хувийн хэвшлийн бэлэн байдал” сэдэвт  хэлэлцүүлэг энэ сарын 16-нд Корпорэйт зочид буудалд боллоо. Хэлэлцүүлгээр барилгын салбарын хүлэмжийн хийг бууруулахад уур амьсгалын санхүүжилт, хувийн хэвшлийн хөрөнгө оруулалтыг нэмэгдүүлэх талаар хөндөн ярилцав. Мөн төр засгаас нэн тэргүүнд хэрэгжүүлэх шаардлагатай бодлогыг тодорхойлох, хүлэмжийн хийн ялгарал багатай, үйлдвэрлэл, үйлчилгээг дэмжих, хувийн хэвшлийн оролцоо бүхий төслийн санааг гаргаж, “Уур амьсгалын ногоон сан”-д өргөн барих зорилготой байлаа.

-Дэлхий нийтэд тулгамдаж буй уур амьсгалын өөрчлөлтөөс улбаатай олон асуудлыг шийдвэрлэхээр “Дэлхийн тогтвортой хөгжлийн зорилт 2030” болон 

Парисын хэлэлцээрээр Монгол Улс тодорхой хувь нэмэр оруулах үүрэг хүлээж буй. Иймд барилгын салбарын хүлээх үүрэгч их байгааг тоо баримтаас харж болно. Улаанбаатар хотод 2017 оны байдлаар 380 мянга гаруй айл өрх амьдарч байна. Үүнээс орон сууцанд 164 мянга, гэр хороололд 216 мянган айл өрх байна. Гэр хорооллын айл өрхүүдийн хувьд дэд бүтэц хөгжөөгүй, хашаа байшинд амьдарч, улмаар утаа үйлдвэрлэж байна. Үүнээс гадна нийтийн орон сууцны хуучин барилгууд ч дулааны алдагдалтай байгаагаас эрчим хүчний хэмнэлтгүй буюу хэт үрэлгэн халаалтын шийдэл ажиглагдаж байна.  Дээрх тоо баримтад  тулгуурлан агаар, хөрсний бохирдлыг үүсгэж буй асуудалд БХБЯ-наас эхний ээлжэнд гэр хорооллыг инженерийн дэд бүтцэд холбох ажлыг зохин байгуулж, Улаанбаатар хотын инженерийн дэд бүтцийг гэр хороолол руу тэлэх бодлого барин ажиллаж байна.
 

 БОАЖЯ-ны Ногоон хөгжлийн бодлого, төлөвлөлтийн газрын дарга Т.Булган:

 -Ногоон барилгын чиглэлээр хэрэгжүүлэх боломжтой төслүүдийн талаар төр болон хувийн хэвшлийн оролцоотой хэлэлцүүлэг зохион байгуулсан. Манай яам нь НҮБ-ын “Уур амьсгалын ногоон сан”-тай албан ёсоор харилцах үндэсний эрх бүхий байгуулгын хувьд ногоон хөгжлийн бодлогын удирдамжаар хангахад  түлхүү анхаарахын зэрэгцээ үндэсний эрх бүхий байгууллагын чадавхийг бэхжүүлэх,  бэлэн байдлыг дэмжих төслийн хүрээнд уур амьсгалын төслийн санг боловсруулах чиглэлээр хэд хэдэн сургалтуудыг зохион байгуулж байна.

      “Уур амьсгалын санхүүжилт: Барилгын салбарын хувийн хэвшлийн бэлэн байдал” хэлэлцүүлгээр дараах үр дүнд хүрлээ.

1.    Барилгын зураг төслийн ажил гүйцэтгэгчид, барилгын материал үйлдвэрлэгчид, импортлогчид мөн үл хөдлөх хөрөнгийн худалдаа эрхлэгч гээд энэ салбарт үйл ажиллагаа явуулж буй аж ахуй нэгжүүд өөрсдийн хүч, хөрөнгөөр чамлахааргүй их ажлыг санаачлан хэрэгжүүлж байна.

2.    Барилгын ажил, барилгын материал үйлдвэрлэлийг хүү багатай, урт хугацааны зээл, урамшуулал, төрийн худалдан авалтаар дэмжих.

3.    Хүлэмжийн хийн ялгарал багатай шийдэл, ногоон орон сууц худалдан авах, одоо амьдарч байгаа орон сууцныхаа дулаан алдагдлыг ногоон барилгын материал, дэвшилтэт технологи ашиглан  бууруулах иргэн, айл өрхийг дэмжих, хөнгөлөлттэй зээл, түрээсийн оновчтой тогтолцоог хөгжүүлж, энэ талаарх олон нийтийн ойлголт, мэдлэгийг дэвшлүүлэн, зах зээл дээрх эрэлтийг нэмэгдүүлэх зайлшгүй шаардлагатай байна.
4.    Барилгын дулаан хангамжийн үнэ, тарифын системд өөрчлөлт оруулж, эцсийн хэрэглэгчийн хэрэглээнд тулгуурласан үнэ, тариф, төлбөрийн системийг нэвтрүүлэх хэрэгтэй гэсэн дөрвөн шийдлийг хэлэлцүүлэгт оролцогчид дэвшүүллээ.
     Түүнчлэн БХБЯ-наас “Уур амьсгалын ногоон сан”, Монголбанк, санхүүгийн байгууллага хувийн хэвшилтэй хамтран төслийн санал боловсруулж хэрэгжүүлэхээр боллоо.