Түүхт Халх голын тулалдааны 80 жилийн ойг ирэх жил буюу 2019 онд ОХУ-тай хамтран тэмдэглэх ажлын хүрээнд  Дорнод аймгийн Халх гол сумын төвийг шинэчилж, сум дундын бүтээн байгуулалт буюу “Шинэ сум” төслийг  хэрэгжүүлэхээр болсон байна.


      Тус төслийн талаар  Монгол Улсын Ерөнхийлөгч Х.Баттулга ОХУ-ын Ерөнхийлөгч В.В.Путинд танилцуулж, улмаар ОХУ-ын тал 10 орчим сая ам доллартай тэнцэх санхүүжилтыг шийдвэрлэхээ илэрхийлжээ.
     Халх гол сумыг төсвийн бус хөрөнгөөр шинэчлэх боломж бүрдсэн тул 2018 оны аравдугаар сарын 12-ны өдөр  бүтээн байгуулалтын ажлыг  албан ёсоор эхлүүлсэн байна.  
     Сум дундын бүтээн байгуулалтын хүрээнд зургаан га талбайд төрийн бүх үйлчилгээг нэг дороос авах боломжтой нутгийн удирдлагын ордон, соёлын төв, эмнэлэг, 650 хүүхдийн хүчин чадалтай сургууль, дотуур байр, 150 хүүхдийн багтаамжтай цэцэрлэг, спорт заал, тоглоомын талбай, авто зогсоол, иргэдийн амарч зугаалах талбай зэргийг багтаан төлөвлөсөн. Мөн шинэ, хуучин сумыг  хамтад нь дулааны шугам сүлжээнд холбож, цэвэр, бохир усны асуудлыг шийдэж, орчин үеийн дэвшилтэт техник технологоор шинэчлэх аж.