Барилгын технологийн топ инновациуд

Batsuh

Барилгын технологийн топ инновациуд

Түрүүч нь: Барилга.мн сэтгүүлийн №111

Барилгын орчин үеийн инновацийн технологиуд нь дүрслэн сэтгэхийн өвөрмөц гайхамшиг, шинжлэх ухааны судалгаа, туршилтын ажлын сүүлийн үеийн судалгааны үр дүн, мөн өвөг дээдсээс бидэнд дамжуулан үлдээсэн үнэлж баршгүй мэдлэг, туршлагыг ашигладаг билээ. Хамгийн нийтлэг, өргөн хэрэглээтэй барилгын материал болох модноос эхэлье. Магадгүй модон материалаас одоо шинэлэг зүйл гарах юм үлдсэн гэж үү гэдэг асуулт тавигдаж болно. Харин энэ шинэлэг бүтээлийг бий болгоход орчин үеийн шинэ технологи маш чухал ач хоболдолтой.

”Нисдэг” сууцнууд -Япон

Япончуудын боловсруулсан шинэлэг асуудлууд гайхал төрүүлэхгүй байхын аргагүй байдаг. Энэхүү “нисдэг сууц”-ны гол санаа нь газар хөдлөлтийн үед барилга эвдрэхгүйн тулд газар дээр байх ёсгүй аж. Энэ санааг хэрэгжүүлэхийн тулд “нисдэг” сууцыг бодож олсон бөгөөд тус улсын Японы "Air Danshin Systems Inc" компани нь газар хөдлөлтийн үед газрын гадаргаас дээш агаарт өргөгдөн газар хөдлөлт дуустал байх систем бүхий сууцны барилга зохион бүтээсэн байна.

Зохион бүтээсэн сууц нь агаарын бөмбөлөг дээр байрлах бөгөөд газар хөдлөх агшинд датчик ажиллаж эхлэхэд агаарт өргөгдөх ба оршин суугчдад ямар ч зүйл мэдрэгдэхгүй юм байна. Сууцыг бетон сууринд бэхлэхгүй сул тавих ба газар хөдлөлт дуусангуут сууц буцаж байрандаа газардаж байрлах юм. Гол нь барилгын суурин дээр эргэн тойронд нь байрлуулсан газар хөдлөлтийг мэдрэгчүүд идэвхжиж байрны дор байрлалтай шахах компрессорууд ажиллагаанд орсноор барилга газрын гадаргаас 3-4 сантиметр өргөгөдөх аж. Инэснээр барилга газрын гадаргаас хөндийрч газар хөдлөлтийн түлхэлтээс ангид тусгаар байж чадах юм. Энэхүү шинэ бүтээлийг Японд 90 барилгад суурилуулж хэрэгжүүлээд байна. Өдгөө тус улсын олон компани энэ ажилд ханцуй шамлан орсноор энэхүү “ноу-хау”-г ойрын хугацаанд газар хөдлөлтийн эрсдэлтэй Ази тивийн бусад орнууд ч авч хэрэглэж болох гэнэ.

Контейнер сууц-Франц

Контейнер зохион бүтээгчид сууц болгон хэрэглэх боломжийг ч давхар сэдсэн байна. Түүний төлөөлөл дараах зурагт харагдаж байна. Сууцны барилгад найман ширхэг контейнер хэрэглэж ер бусын архитекторын шийдэл бүхий сууц босгожээ. Сууцны барилгад контейнерээс гадна мод, поликрарбонат хэрэглэсэн байна. Сууцны нийт талбай нь 208 квадрат метр. Энэхүү сууцыг бас “эко-сууц” гэж нэрлэх бөгөөд барилгын уламжлалт материал хэрэглэн ижил хэмжээний талбай бүхий барьсан сууцнаас хоёр дахин хямд тусдаг. Мөн барилга барих хугацаа хоёр дахин богиносдог.

Ер нь өнөө үед контейнерээр барьсан сууцны барилгыг гайхаад байх асуудалгүй болсон бол Сөүл хотын Худалдаа, ажил хэргийн төв болох нэгэн дүүрэгт ерийн бус нэгэн барилга сүндэрлэжээ. Энэхүү барилгыг далайн тээврийн 28 контейнерээр барьжээ. Барилгын нийт талбай нь 415 м.кв. Энэхүү комплексд үзэсгэлэн, шөнийн кино үзүүлбэр, концерт, мастер-класс, лекц болон бусад олон нийтийг хамарсан арга хэмжээ зохион байгуулагддаг юм байна. Харин Амстердам хот контейнер ашиглах талаараа чамгүй туршлагатай. Харьцангуй маш богино хугацаанд мянга, мянган контейнер ашиглан оюутны дотуур байр барьжээ. Контейнер болгон нэг тасалгаа болох бөгөөд энд бүх талын тав тух хангагджээ. Мөн дээврийн хэсгийг борооны ус цуглуулах төхөөрөмжөөр тоноглосон байна.

Мөсөн зочид буудал

Финлянд болон умар зүгийн орнуудад зочид буудлыг бүхлээр нь мөсөөр барьжээ.

Тийм ч учраас мөсөн зочид буудлын төлбөр барилгын ердийн материал хэрэглэн барьсан буудлаас үнэтэй. Анхны мөсөн зочид буудал Швейцарьд 60-аад жилийн өмнө баригдсан байдаг.

Авсаархан эко-сууц Португали

Авсаархан эко-сууц барихад төрөл бүрийн технологи хэрэглэдэг. Энэхүү сууц нь эрчим хүчний хангамжийн хувьд хэнээс ч хараат бус байдгаараа гол онцлогтой.

Тухайн барилгад шаардагдах эрчим хүчээр бүрэн хангах зориулалт бүхий нарны зайн хураагуурыг барилгын гадаргууд байрлуулж өгчээ. Сууц нь экологийн хувьд маш цэвэр, бас авсаархан.

Эко сууц нь унтлагын болон ариун цэврийн гэсэн 2 өрөөтэй. Сууцны гадна талыг экологийн цэвэр үйсэн материалаар бүрсэн байна.

Эрчим хүчний хэмнэлттэй тасалгаа-Швейцари
Швейцарийн NAU компаний архитекторууд дээд зэргийн тохитой, бас авсаархан сууц бий болгохын төлөө ажиллаж байна.

Тасалгаа буюу Living Roof (амьдрах дээвэр) –ийг ямар ч гадаргууд байрлуулах боломжтой. Тасалгаа нь нарны панел, салхины трубин болон борооны ус хуримтлуулан хуваарилах төхөөрөмжөөр тоноглогдсон байна.

Хот доторхи босоо ногоон ой-Итали
Италичууд “Bosco Verticale” инновацийн төслийн хүрээнд Милан хотын хоёр барилгын фасад талыг “ойжуулсан” байна. “Ойжуулсан” хоёр барилгын нэгний өндөр 80 м бол нөгөөх нь 112 м. Дунд зэргийн болон жижиг нийлсэн 480 ширхэг мод, бага өндөртэй 250 мод, 5000 ширхэг төрөл бүрийн бут, сөөг, өвсөн бүрхүүл үүсгэх 11000 бусад төрлийн ургамал суулгажээ. Ийм хэмжээний ургамал ердийн ойн нөхцөлд 10000 м2 талбайг эзэлдэг.

Ботаникийн цэцэрлэгжүүлэлтийн мэргэжилтнүүд 2 жил орчим судалгаа, туршилтын ажил хийсний үр дүнд ийм өндөр, ер бусын нөхцөлд ургах боломжтой ургамлуудыг сонгосон байна. Энэхүү барилгад зориулан тусгай нөхцөлд олон төрлийн ургамлыг тарьж ургуулан дасгасаны дараа шилжүүлэн суулгасан байна. Өнөөдөр тус хоёр байрны айл бүхэн тагтандаа гайхамшигт “ой модтой” болжээ.

”Кактусан” барилга- Голланд

Роттердам хотод 19 давхар тансаг сайхан барилга барьж байна. Энэхүү барилга нь маш тохилог 98 айлын сууцтай бөгөөд гадна талаас өргөстэй ургамалтай төстэй тул ер бусын харагддаг. Барилгыг UCX Architects компаний зураг төслөөр барьж гүйцэтгэж байгаа юм.

Энэхүү барилгын гол онцлог нь дүүжилсэн ургамал, модон дор тагт -террас нь задгай, бие биендээ шаталсан байрлалтай дээшээгээ шурагдан эргэлдсэн хэлбэртэй. Террасыг ингэж байрлуулснаар ургамлын бүх талаас нь нар тусах онцлогтой. Террас бүр нь 2 м-ээс багагүйн зэрэгцээ хэмжээндээ тохирсон усан бассейнтэй юм.

Эрчим хүчний үр ашигтай хот

“Ехро-2020” үзэсгэлэнд Арабын Нэгдсэн Эмират Улс эрчим хүчний үр ашигтай бүхэл бүтэн хотоор оролцохоор бэлтгэж байна. Энэ хот нь уламжлалт бус бусад эх үүсвэрээс эрчим хүчээр бүрэн хангагдах “ухаалаг” хот байх юм. Төслийг Дубайн хүн амын суурьшлын Аль-Авирт хэрэгжүүлэхээр төлөвлөжээ.

Тус хот нь оршин суугчдынхаа бүх төрлийн хэрэглээ болон тээвэр, эрчим хүчийг бие дааж хангах анхны хот болох юм. Ялангуяа эрчим хүчний үр ашигтай хот байхын тулд бүх орон сууц, худалдааны төвүүд болон бусад бүх барилгын дээвэрт нарны панел байрлуулах ажээ. Үүнээс гадна 40.000 шоометр урсгал усыг бие дааж боловсруулах юм байна. Уг хотыг цөлийн цэцэг хэлбэртэй байгуулах ба нийт 14000 гектар талбайг эзлэнэ. Эргэн тойрон ногоон суулгац бүхий “ухаалаг хот”-д 160.000 хүн оршин сууна.