Хийт бетон блокоор хана өрөх аргачлал

Batsuh

Хийт бетон блокоор хана өрөх аргачлал

Амины орон сууцны хамгийн гол хийц нь хана бөгөөд ханын хийцлэлээрээ нэрлэгдэх нь олон байдаг. Ханыг зориулалт ба байрлалаар нь гадна хана, дотор хана, хамар хана гэж ангилна. Гадна хана барилгын доторх өрөө тасалгаануудыг гадны нөлөөллөөс тусгаарлан өрөөг тогтмол дулаантай, тодорхой чийглэгтэй байлгах нөхцөлийг хангасан байна. Дотор хана нь өрөөнүүдийг тусгаарлах үүрэгтэй, мөн дотор орон зайг зохицуулан хязгаарлаж, даацын үүргийг давхар гүйцэтгэнэ. Өрөөний хэмжээ, хийцлэлийн төрлөөс шалтгаалан ихэвчлэн ханаар даац авахаар төлөвлөгдсөн байдаг. Ажлын зурагт ханын бүтцийг сонгож, нарийн тусгасан байна.

Манай оронд амины орон сууцанд уламжлалт буюу бүх төрлийн блок, тоосгон, балкан, дүнзэн хананууд нь хөөсөн полистирол хавтан болон олон төрлийн хөвөн дулаалгатай шийдлүүдээр зонхилж байна. Мөн канад модон, сип хавтан, хөнгөн ган каркас, конкреволл хавтан зэрэг олон улсын шинэлэг технологиуд ихээр нэвтэрч байна. Дээрх шинэ, хуучин технологиуд өөр өөрийн давуу болон сул талтайгаас гадна материалын үнэ, тээврийн зардал, дулаан тусгаарлах үзүүлэлт, галд тэсвэрлэлт, ажиллах хүчний зардлын зөрүү гээд олон ялгаатай.

Сүүлийн үед амины орон сууцны ханын бүтээцийг автоклавын хийт бетон гулдмай буюу блокоор өрөх нь ихэсч байгаа нь түүний дулаан тусгаарлах чанар сайн, хөнгөн жинтэй, өрөхөд хялбар хөдөлмөрийн бүтээмж өндөр зэрэгтэй холбоотой. Амьдран суух амины орон сууцаа өөрсдөө барихаар төлөвлөсөн, эсвэл мэргэжлийн хүмүүсээр бариулахаар сонирхож буй уншигчиддаа зориулан хийт бетон блокоор амины орон сууцны ханыг яаж өрөх талаарх зөвлөгөөг хүргэж байна.
Хийт бетон блокоор даацын болон даацын бус хана, дотор хана, дулаан болон дуу тусгаарлах хана, зоорийн давхар болон хөрсний түвшнээс доошхи ерөнхий хэрэглээнд, гал тусгаарлах хэсэгт ашиглах зориулалттай байдаг.
Хийт бетон блок нь бусад өргийн материалуудаас дараах давуу талуудтай байдаг. Үүнд:

Хийт бетон блок нь стандарт хэмжээтэй байдаг ба угсрахад хялбар, өөгүй тэгш хэмжээстэй тул зориулалтын цавуугаар наах боломжтой, өрөх ажлын хугацааг 4 дахин багасгана, хадаас хадах мөн зүсэж хөрөөдөх, дурын хэлбэр гарган механик боловсруулалт хийх боломжтой
Ердийн бетоноос 5 дахин, барилгын дүүргэгч бусад материалтай харьцуулахад түүний жин нь ойролцоогоор 50% хөнгөн байдаг нь барилгын даацыг багасгадаг.
Дулаан дамжуулалт нь λ=0,09-0,13 Вт/м°С тул дулаан хадгалах чанар сайн. Тухайлбал тоосгоноос 3-5 дахин дулаан хадгалах чадвартай тул халаалт, хөргөлтийн зардлыг хэмнэнэ. .
100% байгалийн эрдэст материалаас бүрдсэн ба шатдаггүй, галыг дэмждэггүй, ингэснээр барилгын бусад хэсэгт гал тархахаас хамгаалах чадвартай.
Вакуумжсан хийт бөмбөлөгт бүтэц нь дуу чимээг маш сайн тусгаарлаж өгдөг.
Найрлагад нь усанд үл уусах эрдсүүд ордог. Иймд чийгийг өөртөө тогтоодоггүй ба гадагшлуулдаг, уур нэвтрүүлэлт өндөр буюу амьсгалдаг материал юм.
Бүтээгдэхүүний найрлагад химийн ямар нэгэн хортой нэгдэл агуулаагүй учраас хүний эрүүл мэнд болон байгаль орчинд ямар нэгэн сөрөг нөлөөгүй.

Хийт бетон блокны хэмжээ ба орц:

Хэрэв та хийт бетон блокоор хана өрөхөөр шийдсэн бол эхлээд хэдэн м3 хана өрөх, блокны тоо хэмжээ, өрөх цавууны хэмжээг тооцохын тулд дараах хэмжээсүүдийг тогтоож доорхи хүснэгтийг ашиглаж тооцоорой.
Үүнд:

Өрөх ханын нийт урт, ханын дундаж өндрөөр тооцсон талбай
Цонх, хаалганы талбай
Блокны хэмжээ /урт, өндөр, өргөн/

Өргөн хэрэглэгддэг хийт бетон блокны хэмжээ ба орц:

Евроблокны хэмжээ ба орц:

Евроблокны хэмжээ ба орц:

Блокны үйлдвэрлэлд зүсэлтийн нарийвчлалтай зүсэх төхөөрөмжийг өргөнөөр хэрэглэх болсноор хэмжээ нь бодитой, гадаргуу, ирмэг нь тэгшхэн болсон. Иймд блокон өрөгт сүүлийн үед зориулалтын цавууг их хэрэглэж байна. Блокны цавуу нь наалдах чадвар сайтай, нимгэн үеэр түрхэгддэг, хөдөлмөр зарцуулалт багатай зэрэг давуу талуудтай.
1м2 талбайд 1мм зузаантай түрхэхэд ойролцоогоор 1,5-1,7 кг цавуу ордог. 1м3 гулдмайн өрөгт 20-30кг цавуу орно. Цавууны үйлдвэрлэгчид нэг уут цавууг 25-30 кг-р савладаг ба энэ нь 1м3 өрөгт хэрэглэхэд тохиромжтой байдаг.

Блокыг өрөх, арматурчлах:

1. Барилгын ажлын болон хадгалалтын явцад гулдмайг чийгнээс тусгаарлаж, тэгш гадаргуу дээр байрлуулж горимын дагуу хадгалах хэрэгтэй

2. Цавууг бэлтгэхийн тулд хувинд 6 л орчим ус /нэг уут хуурай хольц буюу 25 кг-д бодож/ хийгээд хуурай хольцыг бага багаар хийж цахилгаан зуурагчаар (800 ватт-аас доош хүчин чадалтай) тасралтгүй нэг төрлийн болтол хутгаж бэлтгэх ба ажлын явцад цавуугаа тогтмол хутгаж байх нь зүйтэй. Зуурмагт өөр төрлийн бодис нэмж болохгүй.

3. Суурийг зургийн дагуу цутгасаны дараа хэвтээ ба босоо ус тусгаарлалтыг хийж өгнө. Эхний үеийг хэрхэн өрөхөөс өргийн чанар бүхэлдээ шалтгаална. Өргийн суурийг тэгшлэх үүднээс цементэн зуурмаг дэвсэж өгнө.

4. Өргийн үеийн өндөржилтийг тогтоож, буланд нь өндрийн тэмдэглэгээ бүхий босоо чиглүүлэгчийг байрлуулж болох ба үе болгоныг өрөхөд чиг утас татах хэрэгтэй.

5. Эхний блокыг булангаас эхэлж өрөх ба чиг утасны дагуу блок тус бүрийг өрөхдөө тэгш усыг ашиглан резинэн алхаар тогшиж суулгана.

6. Бэлтгэсэн цавуугаа хамгийн ихдээ 2-3 блокны гадаргуу дээр бүхэлд нь 3 мм-ээс ихгүйгээр зузаан жигд түрхэнэ. Ингэхдээ блокны өргөний хэмжээнд тохирсон зориулалтын шанаган багаж ашиглаж болно. Бэлэн болсон зуурмагийг зориулалтын шанаган багаж ашиглан блокон дээрээ жигд татна. Жигд татсан цавуун дээр блокыг наасны дараа нэг бүрчлэн тэгш усаар хэмжинэ. Технологийн дагуу ховилгүй блокын нийлэх хэсгийн босоо заадаст цавууг нийвийний тусламжтайгаар гадаргүу дээр жигд тарааж түрхэнэ.

7. Эхний үеийн цавуу бүрэн барьцалдсаны дагуу /1-2 цаг/ 2 дахь үеийг өрж эхлэхэд бэлэн болно. Өргийг булангаас эхлүүлэх ба блокыг ам дарж өрөхдөө мөн тэгш ус, резинэн алхыг ашиглана.
8. Ээлжит үеийг өрж дуусаад гадаргууг зүлгүүрээр тэгшилнэ. Зэргэлдээ өрөгдөх блокнуудын түвшин алдагдах ёсгүй. Тоос шороог сойзоор цэвэрлэх хэрэгтэй.

9. Эхний үе болон 2 дахь үеийг өрөөд бат бэхийг нэмэгдүүлэхийн тулд 6-10мм диаметртэй 2 эгнээ арматурыг /блокны өргөн 250-500мм/ ханын уртын дагуу хийж өгвөл сайн Үүний тулд ховил татагчаар болон гар хөрөөний тусламжтай ховил гаргаж өгнө. Арматурыг тавихаас өмнө ховилд цавуу түрхэнэ. Булангийн хэсгийн ховилыг дугуйлж гаргана.

10. Давхрын хучилтын түвшинд газар хөдлөлийн эсрэг төмөр бетон бүс байх шаардлагатай. Энэ нь 10мм-ээс багагүй диаметртэй 4 арматур байвал зохимжтой ба U блокыг ашиглан дотор хөндийд нь арматурын каркасаа байрлуулна.

11. Гадна болон дотор ханыг тулгаж өрөхөд холбоос бэхэлгээнд блокны 3-4 үе тутамд Т хэлбэрийн анкер, цайрдсан ган бэлдэцийг ашиглаж болно. Эсвэл гадна хананы өргөний хэмжээгээр дотор ханыг түрж өрөх, гадна хананд 150 мм-р оруулж өрөх зэрэг аргууд бий. Өрөө тусгаарлах ханыг 100-150 мм өргөнтэй блокоор өрж болно.

12. Блокон өргийг арматурчлах алхам 1 м байх ба эсвэл блокны өндрөөс хамааран өргийн 3-4 үе тутамд бэхэлж өгөх шаардлагатай. Үүний тулд 500 мм зузаантай хананд 8 мм-ийн 2-оос доошгүй арматур эсвэл өргийн тор ашиглана.

13. Цонхны доод талд ховил гаргаж бэхэлгээний хоёр үе арматурыг цонхноос 2 тал уруу 900мм илүү гаргаж тавина. Цонх хаалганы дээд талд бетон ялуу байрлуулна.

14. Дээд давхрын түвшинд газар хөдлөлийн эсрэг төмөр бетон бүс байрлуулахдаа шувуу нурууны тулгуурыг бэхлэх 1000 мм-ийн алхамтай анкер гаргаж өгсөн байх шаардлагатай.

15. Блокон өргийг хийхдээ үе болгоны хэвтээ чиглэлийн хазайлтыг тэгш усаар, босоо чиглэлийн хазайлт, гадаргуугийн тэгшийг отвес, рейк шугам зэрэг хэмжин шалгах багажуудыг ашиглан шалгаж хянах шаардлагатай.

Хэрвээ та амины орон сууцныхаа ханыг блокоор өрөхөөр шийдсэн бол мэргэжлийн байгууллагаар хийлгэсэн зураг, тооцооны дагуу өргийн ажил, арматурчлалыг гүйцэтгэвэл бат бэх, удаан эдэлгээтэй болж тав тухтай амьдрах нөхцөл бүрдэнэ. Танд амжилт хүсье.