Хуурай хольцын зах зээлийн судалгаа

Zolo Zolo
2020-02-07
Хуурай хольцын зах зээлийн судалгаа
Эрдсэн барьцалдуулагч, дүүргэгч материал, тусгай зориулалтын полимер нэмэлт бодисыг зохистой харьцаагаар хуурайгаар хольж найруулсан бүтээгдэхүүнийг хуурай хольц гэнэ.
Эрдсэн барьцалдуулагчаар портланд цемент, агаарын шохой, барилгын гөлтгөнө, полимер нунтаг бодисыг ашигладаг.
Чигжээс буюу тэгшилгээний хуурай хольцод шохойн чулууны нунтаг /гурил/, нунтаг цэрд, маш жижиг ширхэглэлтэй элс хэрэглэнэ.

    
Хуурай хольцын ангилал:
Барьцалдуулагч материалын төрлөөр: цементэн, шохойн, гөлтгөнөн, шохой-цементэн, шохой-гөлтгөнөн гэж ангилна.
   
Хуурай хольцыг зориулалтаас нь хамааруулан дараах байдлаар ангилна. Үүнд:
  • Хөөсөн ба шахмал полистирол, полиуретан хатуу хавтан наах
  • Гадна болон дотор ханын керамик, чулуун хавтанцар наах
  • Торон, шилэн мяндсан арматур наах
  • Өнгө болон суурь шавардлагын цавуу
  • Шалны өнгөлгөө
  • Өргийн болон тэгшилгээний ажил
  • Бусад хавтан наах.
Тусгай зориулалтын хуурай хольц: заадасны чигжээс, суурь бэхжүүлэгч, ус тусгаарлах, дулаан тусгаарлах хуурай хольцууд орно.
Хуурай хольцын давуу талууд:
  • Барилгын ажилбарын тоог багасгах
  • Ажлын чанарыг дээшлүүлэх
  • Тээврийн зардлыг багасгах
  • Зуурмагийн зарцуулалтыг багасгах
  • Зуурмагийн уян налархай чанарыг дээшлүүлэх
  • Хөдөлмөрийн бүтээмжийг нэмэгдүүлэх
  • Өнгөлгөөний ажлын хугацааг багасгах
  • Хэрэглэх, тээвэрлэхэд хялбар
  • Хог хаягдал гаргадаггүй
  • Эдийн засгийн үр ашигтай
Импортоор орж ирсэн бүх төрлийн замаск, плитаны цавууг энэхүү судалгаанд хамруулан авч үзлээ.Хуурай хольцын сүүлийн 4 жилийн импортын хэмжээг бохир жин болон худалдан авсан мөнгөн дүнгээр гаргалаа. Доорх зургаас харахад 2016 онд худалдан авалт буурсан боловч цаашид өсөх хандлагатай байна. 2018 онд 32.4 мянган тонн хуурай хольцыг 8.2 тэрбум төгрөгөөр худалдан авжээ.

Зураг 1. Хуурай хольцын импорт, 2015-2018 он, мянган тонн, тэрбум төгрөг



Хуурай хольцын сүүлийн 4 жилийн хугацаанд импортын хэмжээг улсаар харьцуулан гаргалаа.  Хуурай хольцын 99.9% буюу 32.3 мянган тонн худалдан авалтыг БНХАУ-аас, 0.1%-ийг бусад улсаас импортолжээ.

Зураг 2. Хуурай хольцын импорт улсаар, тонн

  Хуурай хольцын сарын импортын хэмжээг 4 жилээр авч үзье. Хуурай хольцын худалдан авалт улирлын нөлөөтэй, бусад барилгын материалын адил зун, намарт өсөх хандлагатай байна. Сүүлийн дөрвөн жилийн хугацаанд харьцангуй жигд худалдан авалтыг хийсэн тогтвортой зах зээлтэй бүтээгдэхүүн байна.

Зураг 3. Замаскны импортын хэмжээ, сараар, сая төгрөгөөр

​Хуурай хольцын дотоодын үйлдвэрлэл ба тавигдах шаардлага
Манай улс 2013 онд барилгын хуурай хольцын техникийн шаардлагын стандарттай болсон ба  2013 оноос хойш хуурай хольцын үндэсний үйлдвэрлэл хөгжиж эхэлсэн.
2018 оны нэгдүгээр улирлын байдлаар хуурай хольцын 23 үйлдвэр үйл ажиллагаа явуулж байгаагаас 20 нь Улаанбаатарт, гурав нь орон нутагт ажиллаж байна. Эдгээр үйлдвэрүүд суурилагдсан хүчин чадлаараа жилдээ дунджаар 100 орчим мянган тонн хуурай хольц үйлдвэрлэх боломжтой ч нэг талаас барилгын ажил улирлын шинж чанартай, богино хугацаанд үргэлжилдэг, нөгөө талаас импортоор жил бүр 35,0-40,0 орчим мянган тонн хуурай хольц нийлүүлэгддэг зэргээс шалтгаалан хүчин чадал ашиглалт нь дунджаар 23% байна. Хуурай хольцын жилийн хэрэглээ нь 60,0-70,0 орчим мянган тонноор хэлбэлзэж байна. Дотоодын үйлдвэрүүд хуурай хольцын төрлүүд болох замаска, блокны цавуу, хөөсөнцөрийн цавуу, шал тэгшлэгч, плитаны цавуу, торны цавуу, шавардлагын болон шалны бэлэн зуурмаг зэргийг үйлдвэрлэж байна. 
Хуурай хольц нь “MNS6424-2013 Барилгын ажилд хэрэглэх цавуу. Техникийн шаардлага” стандартын дараах шаардлагыг хангах ёстой. 

  • Чийглэг - Хуурай цавууны чийглэг жингийн 0,2 %-иас ихгүй байна. 
  • Нунтаглалт - 02 шигшүүр дээрх үлдэгдэл 15 %-иас ихгүй байна. 
  • Асгаасан нягт - Хуурай цавууны асгаасан нягт 1200 кг/м3 -ээс багагүй, 1800 кг/м3 -ээс ихгүй байна. 

Хуурай хольцын түүхий эд:
Барьцалдуулагч материал:

  • Портландцемент MNS974-2008
  • Барилгын шохой MNS347-2002
  • Гөлтгөнөн барьцалдуулагч MNS3175-2002

Дүүргэгч материал:

  • Барилгын ажилд хэрэглэх элс MNS0392:2014
  • Барилгын болон технологийн шохой үйлдвэрлэхэд зориулсан шохойн чулуу MNS963-91 хэрэглэхээс гадна цавууны зориулалтаас хамаарч шинж чанарыг нь сайжруулах төрөл бүрийн химийн полимер нэмэлт хэрэглэнэ.
Хуурай хольцыг сонгон авахдаа дараах зүйлсийг анхаараарай:
  • Хэрэглэххүрээ- Хуурай хольцын төрөл, зориулалт, гадаргуугийн төрөл, дотор гадна тал алинд нь хэрэглэх эсэхийг сайн мэдэх шаардлагатай. Дотор зориулалтын хуурай хольц нь гадны нөлөөнд тэсвэргүй байдаг тул  барилгын гадна хэрэглэвэл хагаралт өгөх, хөндийрөх, улмаар ховхорч унах зэрэг гологдол гарах үндсэн шалтгаан болно.
  • Орц: Ихэвчлэн гадна уутан дээр бичсэн 1м2 талбайд орох хэмжээг мэдсэнээр хуурай хольцын орц хэмжээг тодорхойлох боломжтой. Жишээ нь: 5-8кг/м2 энэ нь 1м2 талбайд 5-8кг орно гэсэн үг. Нэг уут хуурай хольц нь 25 кг-аар ихэвчлэн савлагдсан байдаг тул жинг үзэж авбал илүүдэхгүй. Учир нь үйлдвэрийн биш нөхцөлд хуурамчаар бага хэмжээтэй савласан тохиолдол гарсан тул  зориулалтын үйлдвэрийн баталгаатай бүтээгдэхүүнийг дагалдах чанарын гэрчилгээтэй нь сонгож аваарай.
  • Ашиглах заавар- Уутан дээрх буюу бүтээгдэхүүнд дагалдах ашиглалтын заавартай заавал танилцаарай. Үүнд: Гадаргууг бэлтгэх, ямар температурт хэдэн л усаар найруулж, яаж хэрэглэхийг мэдэж аваарай. Мөн хэрэглэх үеийн бэлтгэл ажил, анхаарах зүйлс, аюулгүй ажиллагааны заавар, багаж хэрэгсэл ч чухал шүү.
  • Хадгалах хугацаа- Үйлдвэрлэсэн огноо, хадгалах хугацааг анхаараарай, хугацаа хэтэрсэн бүтээгдхүүний чанар, үндсэн шинж чанарын үзүүлэлт нь алдагддаг. 
  • Техникийн шинж чанар- хуурай хольцын хүйтэн тэсвэрлэлт ба ус тусгаарлалт, наалдах чадвар, бэхэжсэний дараах бат бэхийн үзүүлэлт чухал байдаг.
  • Технологийн шинж чанар- хатах хугацаа, уян хатан байдал, хэрэглэхэд хялбар байх зэрэг шинж чанарын үзүүлэлт чухал.
  • Дагалдах гэрчилгээ- Та тохирлын болон чанарын гэрчилгээтэй стандартын шаардлагыг хангасан бүтээгдэхүүнийг сонговол илүү найдвартай. Мөн итгэмжлэгдсэн сорилт шинжилгээний үр дүнг хараарай.  
  • Үнэ- Дотоодод үйлдвэрлэж байгаа хуурай хольц нь импортоос харьцангуй хямд байгаа нь тээвэрлэлт, орон нутгийн түүхий эд хэрэглэж байгаатай холбоотой.

Дотоодын томоохон зарим хуурай хольц үйлдвэрлэгчдийн бүтэгдэхүүний жагсаалт, үнийн саналыг нийтэлж байна.

  1. “Гурван марал групп” ХХК 

     

  2.  Магнет импорт ХХК

  3.  “Ньюгрийн Лайф” ХХК