Хүн амьдралынхаа 90 орчим хувийг дотоод орчин буюу ажлын байр, гэрийн нөхцөлд өнгөрүүлж дотоод орчны агаараар амьсгалдаг. Дотоод орчны агаарын чанарт гадаад орчны агаарын бохирдол, тамхины утаа, гэрт гал түлэх, хоол хийх, эрүүл ахуй, ариун цэврийн хангалтгүй байдал, барилгын материал болон хулдаас, тавилга, угаалга цэвэрлэгээний бодис зэрэг олон эрсдэлт хүчин зүйл нөлөөлдөг. Эдгээр  дотоод орчны агаарыг бохирдуулагч эх үүсвэрүүдээс бий болсон нүүрстөрөгчийн дутуу исэл, азотын давхар исэл, тоос тоосонцор, дэгдэмхий органик нэгдлүүд зэрэг бохирдуулагч бодисууд нь арьс, амьсгалын замаар хүний биед нэвтэрч өвчинг үүсгэх гол хүчин зүйл болдог.
Тиймээс дотоод орчны агаар хүний эрүүл мэндэд асар их нөлөөтэй. Манай ихэнх барилгын агааржуулалтын систем нь зохих хүчин чадлаараа, тавигдах шаардлагын дагуу ажилладаггүйгээс агаар сэлгэлт муу явагддаг ба энэ нь дотоод агаарын чанарт муу нөлөө үзүүлдэг. Гэтэл иргэд болон албан байгууллагууд дотоод орчны агаарын чанарын талаар тодорхой ойлголтгүй, анхаарал бараг хандуулдаггүй, зөвхөн гадаад орчны агаарын бохирдлын асуудалд санаа зовниж байна.
Дотоод орчны агаарын чанарыг богино хугацаанд сайжруулах энгийн аргуудын нэг нь агаар цэвэршүүлэгч ашиглах явдал юм. Агаар цэвэршүүлэгчийг зааврын дагуу зөв ашиглаж хэвшвэл дотоод орчны агаарын чанарыг тодорхой хэмжээгээр сайжруулж улмаар амьсгалын замын өвчлөлөөс урьдчилан сэргийлнэ. Хамгийн сүүлийн үеийн, үнэтэй төхөөрөмжийг авчихвал хүүхдээ болон гэр бүлээ агаарын бохирдлоос хамгаалж чадна гэж боддог ч яг үнэндээ тэдгээр төхөөрөмж нь ямар хүчин чадалтай, үндсэн үүрэг, зориулалт, хэрэглэх хүрээний талаар төдийлөн сайн мэддэггүй. Хүний нүд 0,10 микроноос жижиг хэмжээтэй тоосонцрыг хардаггүй. Харин агаарт буй өвчин үүсгэгчид 0,03 микроноос ч бага хэмжээтэй байдаг. Тэдгээрийг шүүх нь агаар цэвэршүүлэгч төхөөрөмжийн үүрэг. Иймд агаар цэвэршүүлэгчийн хүчин чадал, зориулалт, шүүлтүүрийн төрөл, чийгшүүлэгчтэй эсэх, ажиллах горим зэрэг гол үзүүлэлтүүдийг анхаарах хэрэгтэй. Агаар цэвэршүүлэгчийг хүчин чадлаас нь хамааруулан хаана байрлуулна, тэр өрөө тасалгааны агаарыг л цэвэршүүлж чадна.
Орон сууцанд тавих зориулалттай агаар цэвэршүүлэгчийн талаарх зөвлөгөөг хүргэж байна.

Орчин үед орон сууцны өрөө тасалгаанд дараах шүүлтүүрүүд болон цэвэршүүлэгч технологи, тэдгээрийн бүрдэлийг ашиглаж байна:

1. HEPA шүүлтүүр
2. Электростатик шүүлтүүр
3. Нүүрсэн шүүлтүүр
4. Фотокаталик шүүлтүүр
5. Ионжуулалт
6. Агаар угаагч

Эдгээр шүүлтүүр болон технологийн төрлүүд нь өөрсдийн давуу болон сул талуудтай. Олон давхар шүүлтүүртэй агаар цэвэршүүлэгч төхөөрөмжийг сонгох нь давуу талтай ба ийм агаар цэвэршүүлэгч нь агаараас хамгийн их бохирдуулагчийг зайлуулж чаддаг.
Жишээ нь:

1. HEPA + фотокаталитик + нүүрс
2. Электростатик + фотокаталитик + нүүрс зэрэг давхар шүүлтүүртэй агаар цэвэршүүлэгчийг ашиглаж байна.

Агаар цэвэршүүлэгчийг сонгоход дараах үзүүлэлтүүд чухал байдаг. Үүнд:

1. Цэвэршүүлэх талбайн хэмжээ: Энэ нь тухайн агаар цэвэршүүлэгч хэр их талбайг хамран цэвэрлэх хүчин чадалтай вэ гэдгийг харуулдаг үзүүлэлт юм. Манай улсад худалдаалагдаж буй агаар цэвэршүүлэгч төхөөрөмжүүд ихэвчлэн 25-70 м2 талбайн агаарыг шүүх чадалтай байдаг. Тиймээс төхөөрөмжийг сонгохдоо талбайн хэмжээнээсээ хэтрүүлэх болон багасгахгүй байх нь чухал. Учир нь ихдүүлсэн тохиолдолд цахилгааны болон ашиглалтын зардал нэмэгдэх ба багассан үед бүтээгдэхүүнээс хүссэн үр дүнгээ авч чадахгүйд хүрнэ. Хамгийн том хэмжээтэй өрөөнийхөө талбайн хэмжээгээр тохирох үзүүлэлттэй төхөөрөмжийг сонгох хэрэгтэй юм.
2. Агаарын урсгалын хурд: Энэ хэмжигдхүүний нэгж нь м3/цаг ба цагт хэдий хэмжээний м3 агаарыг эргэлтэнд оруулж цэвэршүүлэхийг тодорхойлно. Энэ үзүүлэлт өндөр байх тусам төхөөрөмж цагт олон удаа агаарыг дамжуулж, илүү сайн цэвэршүүлдэг. Энэ үзүүлэлт нь өрөөний эзэлхүүнээс 1-3 дахин их байх ёстой. Таазны өндөр нь 2.7-3 м байдаг зочны өрөөний хувьд агаарын урсгалын хурд нь үйлчилгээний талбайгаас ойролцоогоор 3-9 дахин их байх ёстой бөгөөд энэ нь цагт агаарын эргэлтийг 1-3 дахин нэмэгдүүлэх боломжийг олгоно. Жишээ нь: 20 м2 талбайтай бол 60-180 м3 / цаг хүчин чадалтай төхөөрөмж шаардлагатай болно.
3. Шүүлтүүрийн төрөл: PM 2.5 нарийн тоосонцрыг шүүх, нян бактерийг устгах хувь, хэдэн давхар, ямар төрлийн шүүлтүүртэй, түүний үүрэг зориулалт, солих боломжтой эсэхийг мэдэх нь чухал.  Агаар цэвэршүүлэгчид дараах шүүлтүүрийг түгээмэл  хэрэглэж байна.

• Агаар дахь нарийн ширхэглэгт тоосонцор шүүдэг “HEPA- Хэт өндөр үр ашигтай агаарын шүүлтүүр” нь (High-efficiency particulate air filter) ихээхэн үр ашигтай ба “НЕРА”  шүүлтүүр нь агаар дахь 0,3 мкм-ээс том тоос, жигнэгдэгч хэсгүүдийг 99,97%-ийн үр ашигтай шүүдэг тул агаараар дуслын замаар дамждаг бактери, халдвар тараагч организмуудыг тархахаас урьдчилан сэргийлнэ.
• Бага температурын нано каталитикийн аргачлал дээр үндэслэсэн шүүлтүүр нь тоос, тоосонцор, бактери, мөн хивс, шал, будаг, гэр ахуйн цэвэрлэгээний бодисоос агаарт тархдаг химийн бодисуудыг устгадаг. Тамхины утаа, янз бүрийн эвгүй үнэрийг дарж, тасалгааны агаарыг эрүүлжүүлэн цэвэршүүлнэ.
• Нүүрсэн буюу карбон фильтр нь үнэр хорт хийг шүүдэг. Идэвхижүүлсэн нүүрсэн шүүлтүүрийн зөгийн үүрний сархиагны загвар нь хортой хийг шингээх чадварыг ихэсгэдэг. Агаар байгаа тосны хиншүү, эвгүй үнэр болон бусад нүүрс устөрөгчийг цэвэрлэнэ.
• Агаар угаагч буюу airwasher нь усыг фильтр болгож ашигладаг ба энэ загварууд дотроо модны нүүрсэн дисктэй нь агаарт байгаа хорт хийг цэвэрлэхдээ илүү сайн байдаг. Мэдээж энэ төрлийн загварын давуу тал нь усыг нь солиод ашигладаг ба дараа фильтр солих шаардлагагүй байдаг. Мөн агаар чийгшүүлдэг.
• Нян бактерийн эсрэг нэхээсгүй даавуун шүүлтүүр нь бактерийг халдвар тарааж, таагүй үнэр гаргах эрсдлийг эрс багасгаж, урьдчилан сэргийлнэ. Таагүй организмуудын эсрэг удаан эдэлгээтэй хамгаалалт юм.
• Ионжуулагч нь агаарт тархсан хатуу бодис буюу нэмэх  цэнэгийг өөртөө татдаг. Хатуу бодис гэдэгт  утаа ордог.

1. Дуу чимээний түвшин: Төхөөрөмжийн дуу чимээний талаарх ойлголт нь зөвхөн эзэлхүүнээс төдийгүй давтамжаас хамаардаг. Агаар цэвэршүүлэгчийн паспортын дуу чимээний децибелүүд ижил байсан ч бүх төхөөрөмжүүд өөр өөр чимээ гаргадаг. Дуу чимээний тохируулгатай агаар цэвэршүүлэгчүүд байдаг. Жишээ нь: Сэнсний дуу чимээг тохируулж болдог. Жишээ нь:   46/40/20 дБ (өндөр / дунд / бага) Хүүхдийн болон унтлагын өрөөндөө зориулан авах гэж байгаа бол сэнсний дуу чимээ хамгийн багатайг худалдан авахыг зөвлөе.
2. Ажиллах горим: Сүүлийн үед ашиглаж байгаа ихэнх агаар цэвэршүүлэгч нь агаарын чанарын болон чийгшүүлэгчийн индикатортой, цагийн тохиргоотой, унтрах горимтой, хурдны тохиргоо нь 3 төрлөөр ч байдаг (бага/дунд/өндөр), үйл ажиллагааны горим нь гар болон автоматаар явагддаг, шөнийн горимтой, хүүхдийн цоожтой, сэнсний хурдыг тохируулдаг зэрэг ухаалаг автомат горимтой болсон тул яаж ажиллуулах талаар дагалдах зааварчилгаа, борлуулалтын хүмүүсээс сайн судалж ашиглаарай. Зарим агаар цэвэршүүлэгч өөр дээрээ байрлах мэдрэгчийн тусламжтайгаар агаарын чанарыг хэмжиж, цэвэршүүлэх шаардлагатай тохиолдолд ажилладаг удирдлагатай ба агаарын чанар мэдрэгч индикатор буюу гэрэлтэй байдаг. Энэ нь бохирдол ихтэй үед улаан гэрэл аслаад, хэвийн ажиллаж байгаа үедээ цэнхэр, цэвэршүүлээд дуусах юм бол ногоон өнгийн гэрэл асдаг.

Мөн гар утаснаасаа Wifi-д холбогдож, “Mi Smart Home App” ашиглаж, өрөөнийхөө агаарын үзүүлэлт, температур, чийгшил, шүүлтүүрийн солих хугацаа зэрэг олон талын мэдээллийг харах боломжтой болсон.

Агаар цэвэршүүлэгчийг хэрэглэх үед анхаарах зүйлс:

• Өвлийн улиралд тасалгаанд хүн байгаа үед тогтмол асаах, энэ үед тасалгааны хаалга, цонх байнга хаалттай байх;
• Шүүлтүүрийг тогтмол шалгаж, HEPA болон карбон шүүлтүүрийг тогтсон хугацаанд солих. Ялангуяа гадаад орчны агаарын бохирдлын түвшин өндөр манай улсын хувьд үйлдвэрлэгчийн заасан хугацаанаас богино хугацаанд солих шаардлага тулгардаг. Иймд төхөөрөмж дэх шүүлтүүрийн солих хугацааг хянаж байх;
• Агаар шүүгчээ бохирдуулагчтай аль болох ойрхон байрлуулах;
• Илүү их талбайн агаарыг цэвэршүүлэхийн тулд төхөөрөмжийг өрөөний голд буюу аль нэг талыг нь таглалгүй тавих хэрэгтэй.
• Хэрвээ та ханандаа суурилуулах эсвэл нэг буландаа байрлуулахыг төлөвлөж байгаа бол агаар сэлгэх хэмжээний үзүүлэлтийг ихэсгээрэй.
• Цэвэршүүлэгчийг зааврын дагуу ашиглах, ашиглалтын гарын авлагатай сайн танилцах хэрэгтэй.