Дэлхийн хамгийн ухаалаг 5 барилга

Zolo

Дэлхийн хамгийн ухаалаг 5 барилга

Дэлхийн дахинд жишиг болон сүндэрлэж байгаа ногоон барилгуудыг урт хугацаанд тогтвортой хөгжиж, барилгын салбарт өөрийн орон зай, байр сууриа бататган, хурдацтай хөгжин, зөв хандлагаараа нийгэмдээ эерэг нөлөөллийг үзүүлж байгаагаар нь шалгаруулан АНУ-ын Ногоон барилга зөвлөлийн хөтөлбөрийн зүгээс LEED гэрчилгээг, BREEAM компаниас “Хамгийн эрчим хүчний хэмнэлттэй барилга” гэрчилгээг олгодог билээ. LEED /Leadership in Energy and Environmental Design/ гэдэг нь эрчим хүч ба хүрээлэн буй орчны манлайлал гэсэн утгатай, дэлхийн шилдэг барилгын төслүүдэд олгодог нэр хүндтэй шагнал бөгөөд барилгын “ногоон” гэрчилгээ гэж ойлгож болох юм. Энэхүү төсөл нь байршил, ус, эрчим хүч, агаар, орчны чанарыг хадгалах материал гэсэн таван чиглэлээр оноо өгч, авсан онооноос шалтгаалан 4 шатлалын гэрчилгээг олгодог ажээ. Үүнд:

· Certified:       40–49 оноо
· Silver:          50–59 оноо
· Gold:             60–79 оноо
· Platinum:         80 ба түүнээс дээш оноо

Дараах нөхцөлийг хангасан байдлыг нь харгалзан дээрх оноог олгодог байна: Үүнд:

Хэмнэлттэй тээвэрлэлт
Барилгын ажлын явцад бусдын тав тухыг алдагдуулахгүй байх
Агаарын бохирдолгүй эрчим хүч
Үр ашиггүй шөнийн гэрэлтүүлгийг багасгах
Гадна орчны тохижилт
Дулааны алдагдал багатай гадна дулаалга
Эрчим хүчний хэмнэлттэй гадна тохижилт
Үр дүнтэй усны хэрэглээ
Нүүрсхүчлийн хий ялгаруулалтыг багасгах
Барилгын явцын хог хаягдлын зохион байгуулалт сайтай, дахин ашигладаг
Тээврийн зардлыг хэмнэх үүднээс тухайн орон нутгийн материалыг ашиглах
Богино хугацаанд нөхөн сэргэдэг байгалийн гаралтай хулсан шал гэх мэт бүтээгдэхүүн ашиглах
Модон бүтээгдэхүүнүүдийн гарал үүсэл нь тодорхой, нөхөн төлжүүлдэг таримал ойн бүтээгдэхүүн байх
Дулааны эрчим хүчний хэмнэлтэй, тав тухтай орчинг бүрдүүлэх зэрэг шалгуурыг хангасан байх ёстой.

Харин BREEAM нь эрчим хүчний хэмнэлт, усны хэрэглээ, эрүүл аюулгүй орчин, бохирдол, материал, хог хаягдал, эколологийн байдал, менежментийн үйл явцаар нь үнэлж, “сайн”, “маш сайн”, “шилдэг” “гайхалтай” гэсэн үнэлгээгээр гэрчилгээ олгодог байна. Дээрх шалгуур, үзүүлэлтүүдийг бүрэн хангаж, дэлхийн улс орнуудын дунд жишиг болон баригдсан хамгийн ухаалаг, эрчим хүчний хэмнэлттэй шилдэг 10 барилгыг танилцуулж байна.

1. Амсдердам дахь “ The Edge” оффис

“The Edge” нь BREEAM компаниас хамгийн өндөр үнэлгээ буюу 98.4 хувийн эрчим хүчний хэмнэлттэй барилгаар нэрлэгдсэн бөгөөд энгийн барилгуудаас 70 хувиар бага эрчим хүчийг зарцуулдаг байна. Уг барилгын удирдлагын төв систем рүү өрөөний температур, агаарын чийгшилт, гэрэлтүүлгийн хувь хэмжээ, оффист байгаа хүний тоо гэх мэт олон тооны мэдээллийг хүргэдэг 28 000 мэдрэгч суурилагдсан байдаг. Мөн оффис нь ухаалаг гар утасны системтэй холбогдсон учраас ажилтнууд аппликэйшн ашиглаж, ажлын хуваарь, барилга доторх бүх байршлын талаарх мэдээллийг авах боломжтойгоос гадна оффиссын аль ч хэсгийн гэрэлтүүлэг, дасгалын өрөөний температурыг тохируулж болдог байна. Мөн гар утсаа ашиглан өдөр, оройн хоол захиалах боломжтой бөгөөд ажлаа тарахад тань савлагдсан халуун хоол хүлээж байх юм. Түүнчлэн автомашины гарааш нь бүрэн автомат.

Тус оффис гайхалтай цэлгэр, саруулхан мэдрэмжийг төрүүлэх бөгөөд ажлын хэсэг бүр цонхноос 7 метр дотогш байрладаг байдаг. Энэ тухай уг барилгын архитектор Рон Баккер “Оффисын дөрөвний нэгд нь ширээ бус ажилтнууд бие биетэйгээ уулзах талбайг бүрдүүлсэн. Ингэснээр ажилтнуудын харилцаа сайжирч, илүү бүтээлч, үр дүнтэй ажиллахад тусалдаг” хэмээн ярьжээ. Дэлхийн барилгын судалгааны байгууллагаас уг оффисыг дэлхийн хамгийн “sustainable” буюу ирээдүйтэй, тогтвортой барилга хэмээн тодорхойлжээ.

Лондон хотын “Тоттенхэм Хотспур” цэнгэлдэх хүрээлэн

Дэлхийд технологийн шийдлийг гайхалтайгаар харуулсан анхны томоохон цэнгэлдэх хүрээлэн бол Лондон хотноо байрлах “Тоттенхэм Хотспур” стадион юм. 62 062 хөгжөөн дэмжигчийг нэгэн дор цуглуулах хүчин чадалтай уг цэнгэлдэх хүрээлэн нь LG-тэй хамтран 4 талдаа том ухаалаг LED дэлгэц, 1800 орчим жижиг видео дэлгэцийг байрлуулсан төдийгүй 700 орчим bluetooth зам чиглүүлэгч, 1600 орчим утасгүй интернэтийн цэгийг байрлуулжээ. Цэнгэлдэх хүрээлэнгийн эргэн тойронд чөлөөт цагаа өнгөрөөх, спортоор хичээллэх гэх мэт бүхий л зүйлийг цогцоор нь шийдэж өгсөн бөгөөд дээрх bluetooth-ыг ашиглан бүх байршлыг төвөггүйхэн олох боломжтой юм. Ариун цэврийн өрөө орохдоо ч урт дараалалд зогсохгүйгээр хамгийн бага хүнтэй байршилд очих боломжийг бий болгожээ.

Дашрамд дуулгахад уг барилгын төслийг 2007 онд боловсруулсан боловч 2015 онд хэрэгжүүлж, 2019 оны 4 сард ашиглалтад орсон байна. Энэхүү стадион нь Премьер лигийн хамгийн том цэнгэлдэх хүрээлэн бөгөөд 48 м өндөр, хойд урд тэнхлэгээрээ 250 м урт, зүүнээс баруун тийш 200 метрийн өргөнтэй. Хойд хэсэг нь зоороос дээш 9 давхар U хэлбэрийн, өмнө хэсэг 5 давхар бөгөөд нийт 119,945 м2 талбайг хамардаг. Хөл бөмбөгийн тэмцээн зохион байгуулагдахаас гадна урлагийн томоохон тоглолт хийх зориулалтаар баригдсан учраас маш сайн акустик доторлогоо бүхий танхимтай юм. Мөн “тэнгэрийн гүүр” буюу цэнгэлдэхийн дээврээр алхах боломж бүхий шилэн гүүрийг бий болгосоноороо дэлхийд анхдагч болжээ.

3. Сан-Франциско хотын хамгийн өндөр ухаалаг тауэр “ Salesforce”

326 м өндөр энэхүү тауэрын ухаалаг технологиуд нь барилга доторх бүхий л байршлыг тодорхойлдог бөгөөд та гар утсаа ашиглаад хайж байгаа газраа төвөггүйхэн олох боломжтой. Уг барилгыг “LEED” төслийн загварын дагуу төлөвлөж барьсан. Энэхүү загвар нь эмх цэгцтэй, энгийн хялбар байдлаар ногоон барилга барих боломжийг бүрдүүлснээрээ давуу талтай.

Барилгын дотор агаарын чанарт ихээхэн анхаарлаа хандуулж агаар сэлгэлтийн HVAC ухаалаг системийг суурилуулсан байна. HVAC систем нь ажиллаж буй орчноо хянах зориулалттай бөгөөд халаах, хөргөх замаар өрөөний температурыг тогтвортой байлгадаг. Түүнчлэн доторх агаарын хөдөлгөөн, тархалтыг хянах байдлаар тухайн орчин дахь чийгшлийн түвшинг давхар хянаж, автоматаар тохируулдаг байна. Мөн усыг дахин боловсруулан ашиглаж, халаалтаа нарны эрчим хүчээр шийджээ. Гаднах шилэн фасад нь нарны хэт туяаг бууруулах давхар бүрхүүлтэй гэдгээрээ онцлог. VOIP, WAN, LAN болон өндөр хурдны WiFi сүлжээг нэвтрүүлсэн уг цамхагийг 2019 оны “Дэлхийн хамгийн өндөр, ухаалаг барилга” - аар нэрлэсэн байна.

4. Лондонгийн “Кристал”

Энэ бол Лондонгийн хамгийн тогтвортой барилга бөгөөд ухаалаг технологиороо тэргүүлэгч “Siemens” компаний эзэмшилд байдаг. Нарны эрчим хүч, газрын эх үүсвэрийн дулааны насосыг ашиглан халаалтаа шийдсэн нь өндөр жишиг тогтоосон юм. Түүнчлэн хүрээлэн буй орчны ландшафтыг нийгмийн үзэл санаанд өөрчлөлт оруулахад туслах, үлгэр жишээ болох, цаашид ногоон хөгжлийг дэмжих иргэдийн идэвхийг нэмэгдүүлэхийн тулд тогтвортой тохижилтыг бий болгосон бөгөөд энэхүү цэцэрлэг нь олон нийтэд нээлттэй, зугаалах боломжийг бүрдүүлжээ.

Энэхүү барилгын дэлхийн жишиг болох гол цөм нь удирдлагын систем /management system/ болон KNX дэд бүтэц юм. Гэрэлтүүлэг, цонх, халаалт гэх мэт барилгын хяналтын 2500 гаруй KNX төхөөрөмжийг байрлуулсан байна. Жишээлбэл, гэрэлтүүлгийн систем гэхэд байгууламж доторх гэрэл бүрийг хянаж, цахилгаан эрчим хүчийг хэмнэх зориулалттай бол цонхны систем нь цаг агаар тогтуун, дулаан үед автоматаар нээгдэж, цэвэр агаарыг дотогш оруулдаг бол эрс хүйтэн үед хаагдаж, агааржуулалтын систем өөрөө ажиллаж эхэлдэг байна. Уг барилга нь “LEED” гэрчилгээний хамгийн өндөр оноо буюу platinum сертификат, BREEAM компаниас гаргадаг хамгийн эрчим хүчний хэмнэлттэй барилгын жагсаалтыг тэргүүлж байсан анхны барилга юм. Дашрамд дуулгахад уг барилгыг нео-футуризм чиглэлээр, “WilkinsonEyre” олон улсын архитектурын компани зураг төслийг гаргасан бөгөөд 30 сая фунт стерлингийн өртгөөр 2011-2012 оны хооронд баригджээ.

5. Германы Мюнхен хотод байрлах “Allianz Arena”
Германы Мюнхен хотод байрлах уг цэнгэлдэх хүрээлэнгийн гадна экстрьер нь яг л хамилеон шиг өнгөө сольдог бөгөөд үүгээрээ дэлхийд анхдагч юм. Тоон удирдлагын систем нь 3 сая гаруй гэрлийг удирдах хүчин чадалтай. Гэхдээ хамгийн гайхалтай технологи нь дотроо байрлах бөгөөд энэ нь Siemens компаний MindSphere платформ дээр суурилсан cloud-based хэмээх нээлттэй үйлдлийн систем юм.

Энэхүү систем нь ухаалгаар дотор агаарын эрүүл ахуйг хянадаг. Тодруулбал, барилгын дотор температур хүйтэн байвал автоматаар дулаацуулж, агаар нь хуурай бол байх ёстой чийгшлийг өгдөг гэх мэт. Түүнчлэн урлагийн шоу тоглолтын гол агшинд фэнүүд нь хариу үйлдэл хэрхэн үзүүлж буйг мэдэрдэг дууны програм хангамж бүхий акустик камер ашигладаг. Энэ нь тоглолтын оргил агшин болон тухайн үед сэтгэлийн хөдөлгөөнөө илэрхийлж байгаа хөгжөөн дэмжигчдийг алдахгүй бичдэг ажээ.

Уг цэнгэлдэх хүрээлэн нь 75 000 хүний багтаамжтай, аяга хэлбэртэй бөгөөд барилгыг төмөр бетоноор барьж, дээвэр хэсгийг нь ган төмрөөр бүтээжээ. Европын хамгийн том буюу 4 давхраас бүрдсэн 9800 машины зогсоолтой. Мөн хөгжлийн бэрхшээлтэй иргэдэд зориулсан 130 цэгийг бий болгосон байна.