Барилгын салбарын удирдах ажилтаны зөвлөгөөн 2012 оны 3 сарын 30-нд болно.

Барилгын болон нийтийн аж ахуйн салбарын удирдах ажилтны зөвлөгөөнийг жил бүр тогтмол зохион байгуулж, өнгөрөгч оныхоо ажлыг дүгнэж ирэх оныхоо зорилтыг тодорхойлдог уламжлал тогтсон билээ. Удирдах ажилтны зөвлөгөөний зохион байгуулалт жилээс жилд сайжирч байгаа ч улам боловсронгуй болгох шаардлага байна. Зөвлөгөөнийг урьдын адил нэг хэвийн загвар, арга барилаар зохион байгуулахаас татгалзан өөрчлөлт, шинэчлэлт, шинэлэг уур амьсгал оруулах хэрэгтэй байна. Удирдах ажилтны зөвлөгөөнийг зохион байгуулахтай холбогдуулан Зам, тээвэр, барилга, хот байгуулалтын яамны ахлах мэргэжилтэн Л.Болдын гаргасан саналыг хүргэж байна.

 Удирдах ажилтны зөвлөгөөнтэй холбогдуулж доорхи санал дэвшүүлж байна

1.      Номинаци, түүнийг дагалдах шагналын төрөл, хэмжээг 2 жил тутамд тухайн үеийн нийгэм, эдийн засаг, салбарын онцлог, нөхцөл байдалтай уялдуулж өөрчилж, шинэчилж байх нь зүйтэй.

Энэ нь салбарын байгууллага, аж ахуйн нэгж, тэдгээрийн удирдах ажилтнуудын идэвхи санаачилга, сонирхолыг татах өгдөг сайн талтай. Мөн зөвлөгөөний үеэр салбарын шилдэг байгууллага, захирал, инженер, менежер, ажилчдыг мэдээллийн төрөл бүрийн хэрэгсэлүүдээр олон арга хэлбэрээр сурталчилж байх нь чухал юм.

2.      Зөвлөгөөнийг 3 хоногт багтаан зохион байгуулдаг байх.

    Зөвлөгөөн бас сургалт, семинар зохион байгуулдаг, хичээл заадаг, салбарын зарим байгууллага, аж ахуйн нэгжүүдийн тайлан, мэдээллийг холбогдох байгууллагын удирдлагын түвшинд сонсдог, сайшаадаг, сануулдаг, урамшуулдаг, шүүмжилдэг мөн сайд, дарга нарын зүгээс үүрэг даалгавар өгүүлдэг байх нь зүйтэй.

3.      Зөвлөгөөнийг угтаж тодорхой асуудал, сэдвийн хүрээнд байгууллага, аж ахуйн нэгжийн удирдлага, холбогдох ажилтнуудын санал, шүүмжлэлийг урьдчилан бичгээр авч, салбарынхаа сэтгүүл болон төвийн сонин, хэвлэлд төрөл бүрийн хэлбэрээр, ярилцлага байдлаар, гэрэл зурагтай нь нийтэлж нийтийн хүртээл болгож байя.

4.      Зөвлөгөөний талаархи мэдээлэл, реклам, сурталчилгааг урьдчилаад сайн хийх ёстой.

   Зөвлөгөөнөөр хэлэлцэх асуудлыг сарын өмнөөс мэдээлж, танилцуулдаг, түүний дагуу холбогдох байгууллага, албан тушаалтнуудыг сайн бэлтгэлтэй оролцуулдаг байх нь зүйтэй.

Ингэж байж салбарын бодлого, үйл ажиллагааны талаарх мэдээлэл, ойлголтыг төрийн болон төрийн бус байгууллага, ард иргэдэд таниулдаг, мөн салбарын хүмүүсийн санаа, бодлыг бүрэн сонсдог, цаашдын ажилдаа тусгадаг байх нь чухал.

5.      Зөвлөгөөнд салбарын байгууллага, аж ахуйн нэгжүүдийн үйл ажиллагааг харуулсан мэдээллийн самбар, шинэлэг бүтээгдэхүүн, шинэ техник, технологи нэвтрүүлэлтийг гэрэл зургийн үзэсгэлэн байдлаар дэлгэж үзүүлэх хэрэгтэй.

6.      Зарим тохиолдолд салбарын удирдах ажилтны зөвлөгөөнийг тухайн яам, агентлагийн Тамгын газар өнөөдрийн хэллэгээр Төрийн захиргааны удирдлагын газар, хэлтэс нь зохион байгуулдаг юм билээ. Энэ нь нэг талаас зөв байх боломжтой.

7.      Яам, агентлаг, салбарын бодлого, үйл ажиллагааны талаарх танилцуулга, тайлагналт, мэдээлэл, сурталчилгааг хэдий чинээ зөв, сайн, оновчтой хэлбэрээр хүргэнэ, төдий чинээ тухайн байгууллага, салбарын нэр хүнд нь дээшлэхээс гадна хийсэн ажил нь олон нийт, иргэдэд хүрдэг. Гагцхүү мэдээллийг ямар арга зам, хэлбэр, маркетингаар хүргэж байгаагаас үр дүн хамаардаг.

8.      Зөвлөгөөнөөс гарах уриалга түүний зорилго, агуулга нь оновчтой, бүрэн хэрэгжих боломжтой байхаас гадна салбарын үйл ажиллагааг үнэлж дүгнэх нэг гол шалгуур үзүүлэлт болдог. Мөн салбарт болон яам, агентлаг, газар, хэлтсүүдэд хийгдэж, хэрэгжиж буй аливаа шинэлэг бодлого, үйл ажиллагаа нэг бүрийг тухай бүрд нь олон нийтэд мэдээлж, танилцуулж байх нь ямар ч шагналаас илүү үр дүн авчирдаг гэдгийг анхаарахад илүүдэхгүй.