Орон байрандаа засвар хийсэн ч гэр тань нэг л тохь тухтай санагдахгүй байна уу? Эсвэл шинэхэн байранд нүүж орсон ч сэтгэл ханамж тань 100 хувь байж чадахгүй байна уу? Хуучин тавилга гологдохоос эхлээд санаанд нийцэх зүйл маруухан байгаа бол Та дараах зөвлөгөөг дагахад илүүдэхгүй.

1. Өөдлөх айл үүднээсээ гэдэг. Байрны болон өрөөний хаалга гоёмсог атлаа бат бөх, өнгөлөг байх нь тав тухтай амьдрахын нэг шалтгаан болдог. Харахад хээнцэр боловч эдэлгээ муутай хаалганд хууртаж болохгүй. Хаалганы сонголтод ач холбогдол өгөөд үз, үр дүнг нь та насан туршдаа амсах нь дамжиггүй.

2. Орон гэрийн байршил төгс орчин бүрдүүлэхэд нөлөөлөх томоохон хүчин зүйл. Хичнээн тансаг байшинд амьдарлаа ч гаднах орчин нь таагүй, тохиромж муутай бол сэтгэл ханамжтай байж чадахгүй. Цонхоо онгойлгонгуут утаа униар үнэртэж, хаалганы цаана хөршүүдийн таагүй уур амьсгал сонсогдох нь тух алдагдуулдаг. Тийм учраас хэнтэй хөршлөхөө судлахад гэмгүй.

3. Хана туурга, шал, тавилга, гоёл чимэглэлийн өнгө хоорондоо ууссан, зохицол сайтай байх нь тохь тухтай орчныг үүсгэдэг. Ингэхдээ тод өнгөнөөс болгоомжлох хэрэггүй. Зочны өрөөгөө тод өнгийн ханын цаасаар гоёж, интерьер засал хийвэл төгс орчинд алхам ойртож байна гэсэн үг. Зочны өрөө оюун номин өнгөтэй, унтлагын өрөө сараана цэцэг бүхий хар-хөх ягаан өнгөтэй ханын цаастай бол тун дажгүй сонголт болно. Цагаан саарал өнгө гал тогоо, угаалгын өрөөнд амгалан тайван орчныг авчирна.

4. Үзэгдэх орчин сайтай уужим саруул цонх. Энэ бол айл гэрийг тав тухтай, чамин харагдуулах гол зүйл юм. Цонх хэдийчинээ том байна, төдийчинээ гэр оронд дулаахан уур амьсгал бүрдэнэ. Байр сонгохдоо цонх нь ямар хэмжээтэй, нарны гэрэл тусах боломжийг нь анхаар.

5.  Гэр орны тавилга, эд зүйлс, өнгөний зохицол хамаатан садан, найз нөхөд, танилуудынхтай давхцахгүй байна гэдэг сэтгэл ханамжтай байхын эхлэл юм. Үүдээр оронгуут тавилга сэлт чинь хэн нэгнийхийг санагдуулам байвал тийм ч сайхан зүйл биш. Тиймээс юун түрүүнд гэртээ хэний ч сэтгэлийг соронздох дахин давтагдашгүй орчныг бүрдүүл.

6. Цаг хугацаа өнгөрсөн ч эртний эдлэлүүд “гэрэлтсээр” л байдаг. Гэр оронд эцэг өвгөдөөс өвлөж үлдээсэн, эсвэл өөрийн чинь цуглуулсан эртний эд зүйлс ээлтэй.

7. Нэг орон зайд янз бүрийн гоёл чимэглэл, сэлтийг донжийг нь олж байрлуулах нь тав тухтай амьдралын нэг үндэс. Өрхийн гишүүн бүрийн хүсэл сонирхол бүхэн үүнд шингэсэн байх учиртай. Тэгвэл сэтгэл ханамж дээд зэргийнх байна.

8. Өдөр бүр ширээн дээрээ шинэхэн цэцэг тавьж бай. Цэцэг том, эсвэл жижиг байх нь тийм ч чухал биш.

9. Өрөөнүүдийн дунд хаа нэгтээ буйдхан булан байх нь зохимжтой. Ийм буланд нуугдаж ч болно. Номын тавиураас эхлээд жижиг сажиг юмаа тавих боломжтой. Бас өрөөг гоё харагдуулдаг.

10. Эцэст нь таны гэр бүлийн уур амьсгал таагүй бол төгс, тохилог орчныг мянгантаа бүрдүүлээд ч тус болохгүй. Стресс, уур уцаар, хэрүүл уруул гэрт байнга ноёрхох нь сайн сайхан бүхнийг үнэ цэнэгүйдүүлдэг. Иймд та төгс орчин, тав тухтай байдлыг бий болгогч хамгийн том хүчин зүйл, эзэн нь гэдгээ бүү мартаарай.