Шинэ бүтээн байгуулалт дунд хугацааны зорилтот хөтөлбөрийн хүрээнд хэрэгжиж байгаа 100.000 айлын орон сууц хөтөлбөр иргэдийн дунд хамгийн их хүлээлт, оочер дугаар, бухимдал үүсгэж байгаа билээ. Хямд өртөгтэй орон сууцтай болох гэсэн иргэдийн цуваа өдрөөс өдөрт нэмэгдэж байгаа ч хаанаас ямар материал бүрдүүлэхээ тэр бүр сайн мэдэхгүй байгаа юм. Тиймээс та бүхэнд хэрэг болохуйц дараах зөвлөгөөг хүргэж байна.

     Юуны өмнө таны сарын өрхийн орлого орон сууцны зээл авахад хүрэх нь үү гэдгийг \www.ossk.mn\ хаягаар орж моргейжийн тооцоолуураар тооцож үзэх шаардлагатай. Мөн 100.000 айлын орон сууц хөтөлбөрийг хэрэгжүүлэхээр эхний ээлжинд шалгарсан Капитал болон Төрийн банкны зээлийн мэргэжилтэнд хандан орон сууцны зээлд хамрагдах боломжтой эсэхээ бодуулж болно.

    Та орон сууцны зээл авах шаардлагыг хангаж байгаа бол Улсын бүртгэлийн Ерөнхий газраас анх удаа орон сууц худалдан авч байгаа гэсэн үл хөдлөх хөрөнгийн лавлагаа болон гэрлэлтийн лавлагааг авах ёстой юм.

    Лавлагаа бөглөх хуудсыг УБЕГ-ын гуравдугаар байран дахь Голомт банкны салбарт очоод 5500 төгрөг тушаагаад авна. Анкет дээр овог нэр, регистрийн дугаар, иргэний үнэмлэхний дугаар оршин суугаа хаягаа бичиж 24 дэх буюу лавлагаа гэдгийг дугуйлна.

    Мөн уг анкеттай хамт "тэр овогтой тэр нь үл хөдлөх хөрөнгөгүй гэсэн дэлгэрэнгүй лавлагааг гаргаж өгнө үү" гэх утга бүхий өргөдөл бичиж оруулах хэрэгтэй. Үүнийгээ бөглөөд УБЕГ-ын 1дүгээр байран дахь үл хөдлөх хөрөнгийн газар гэсэн хоёрдугаар давхрын цонхонд өгнө.

     Гэрлэлтийн лавлагаа мөн адил 1100 төгрөг Голомт банкиндаа тушаагаад хоёрдугаар байранд байрлах лавлагаа гэсэн цонхноос авах юм.

-Иргэний үнэмлэх

-Үзэг бал -Бичгийн цаас

-Тэмдэгтийн хураамжийн мөнгө

      Лавлагаагаа авсан бол 100.000 айлын орон сууц хөтөлбөрт хамрагдсан барилгын компаниудын жагсаалтыг авч та байраа сонгох юм. Барилгын компанитайгаа гэрээ хийхдээ, орон сууцны чанарыг нэн тэргүүн тавих хэрэгтэй. Компани таниас багадаа урьдчилгаа болох 10 хувь буюу 5 сая төгрөг шаардах учраас арилжааны банкинд байршуулсан 5 сая төгрөгийн баримтаа авч очоорой. Ингээд байраа сонгоод гэрээгээ байгуулах ёстой.

     Байраа сонгочихсон бол одоо ОССК-ийн зээлийн мэргэжилтэнд хандах хэрэгтэй. Таны өрхийн орлого зээлийн нөхцөлд хүрч байгаа бол ОССК-д дараах материалыг бүрдүүлэн өгөх шаардлагатай.

Үүнд:

-Зээлийн хүсэлт (Маягтыг танд эхээр нь хүргэж байна.)

-Иргэний үнэмлэхийн хуулбар /нотариатаар баталгаажуулсан/

-"100 мянган айлын орон сууц хөтөлбөр"-т хамрагдсан орон сууцнаас сонгоод урьдчилгаа 10 хувь төлсөн гэрээ барилгын компанитай байгуулсан баримтаа /нотариатаар баталгаажуулсан байх/

-УБЕГ-аас авсан лавлагаа Орон сууц санхүүжилтийн корпораци таны зээлийн хамгийн уртдаа 14 хоногт судлаад танд хариу өгнө.

    ОССК-аас танд харилцах банкийг чинь хуваарилж өгнө. Тухайн хуваарилсан банк дээрээ очоод орон сууцны зээлийн мэргэжилтэнтэй уулзаж шаардагдах бичиг баримтыг бүрдүүлэн өгөх хэрэгтэй. Үүнд:

-Зээлийн өргөдөл

-Зээл хүсэгчийн анкет /иргэн/

-Иргэний үнэмлэх нотариат /гэр бүл/

-Шүүхийн шийдвэр гүйцэтгэх албаны тодорхойлолт

-Банкны өр барагдуулах албаны тодорхойлолт

-Байрны захиалгын гэрээ

-Урьдчилгаа төлсөн баримт

-Өрхийн гишүүдийн орлого тодорхойлох баримт /НДД, Хөдөлмөрийн гэрээ, Цалингийн тодорхойлолт/

-ЦЕГ-ын тодорхойлолт

-Гэрлэлтийн гэрчилгээ

-Хорооны тодорхойлолт

     Хэрвээ банкны зээлийн мэргэжилтэн шаардлагатай гэж үзвэл таниас бусад баримт шаардах эрхтэй. За ингээд арилжааны банкнаас таны бүхий л мэдээллийг хянаж үзээд зээл олгох боломжтой гэж үзсэн бол гэрээгээ байгуулна.