Хэнтий аймгийн барилгачдын зөвлөлгөөн өчигдөр болж, энэ оны зорилтоо дэвшүүллээ. Өмнөх зөвлөлгөөнөөр аймгийн удирдлага, тухайлбал аймгийн Засаг даргын санаачилгаар 2009-2011 онуудад эрх шилжиж ирсэн болон орон нутгийн төсвөөр баригдах барилга байгууламжийн гүйцэтгэгчийг сонгох, ажил үйлчилгээ худалдан авах үйл ажиллагааг зохион байгуулахдаа орон нутгийнхаа барилгын байгууллагуудад давуу эрх олгосноор тус аймгийн орон нутгийн гүйцэтгэгч байгууллагууд сүүлийн гурван жилд санхүүгийн хувьд чадавхжиж, ажлын байр олноор нэмэгдүүлснийг энэ үеэр дүгнэлээ. Тухайлбал, өнгөрсөн 3 жилд барилгын компаниуд, барилгын салбарт ажиллагсдын тоо нэмэгдэж, өмнөх 4 жилд 157 хүн ажиллаж байсан бол эдүгээ 500 гаруй хүн ажиллаж байна. 3,8 тэрбум төгрөгийн барилга угсралтын ажил гүйцэтгэж байсан бол энэ хэмжээ 3 дахин нэмэгдэж, барилгын 12 компани нийт 4,5 тэрбум төгрөгийн орлоготой, 335 сая төгрөгийн цэвэр ашигтай ажиллаж, үндсэн хөрөнгө нь 3,7 тэрбумаас 8,3 тэрбум төгрөгт хүрч өсчээ.
       Аймгийн Засаг дарга зөвлөлгөөнд оролцож, барилгынханд тулгамдаж байгаа асуудлыг дэвшүүлж саналаа солилцов. Хэнтийд барилгын салбарын боловсон хүчний чадвар чансаа тааруухан байгаа нь гол анхаарал татаж байна. Иймээс аймаг дутагдалтай байгаа мэргэжилтний тоонд барилгын нарийн мэргэжлийн инженерийг багтааж энэ чиглэлээр сурч байгаа оюутны сургалтын төлбөрийг орон нутгаас хариуцан сургаж байна. Тухайлбал, Хэнтийд барилгын зураг төсөв хийх барилгын эдийн засагч дутагдалтай байна.
     Мөн барилгын чанарт анхаарах шаардлагатай байна. Үүнд барилгын инженерийн сэтгэлгээ үгүйлэгдэж байгааг Засаг дарга онцоллоо. Барилгын компаниудын санхүүгийн чадавх сайжирч байгаа ч барилгын ажлын машин тоног төхөөрөмжүүд шинэчлэгдэж дорвитой өөрчлөлт гарахгүй байгааг сануулав. Хэнтий аймагт барилгын материалын үйлдвэрлэл олигтой хөгжихгүй байгаа нь санаа зовоосон асуудлын нэг болж байна. Иймээс аймагт цементийн үйлдвэр байгуулахад улсаас туслахыг хүсэв. Барилгын компаниуд хоорондоо уялдаатай ажиллаж, дундын эрсдэлийн болон тоног төхөөрөмжийн нөөцийн сантай болох нь зүйтэйг сануулав. Түүнчлэн энэ онд аймгаас дэвшүүлсэн “Шинэ Өндөрхаан” төслийг хэрэгжүүлэхэд барилгачид гол үүрэгтэй гэлээ.
         Барилгынхны өмнө тулгамдаж байгаа нэг асуудал бол зураг төслийн компанитай болох шаардлагатай байгааг зөвлөлгөөнд оролцсон Монголын Барилгачдын Холбоо болон Засгийн газрын агентлагийн төлөөлөгчид сануулж, энэ асуудалд анхаарч дэмжихээ илэрхийллээ. Мөн барилгачдыг сургахад бүх талын туслалцаа үзүүлэх өргөн боломж байгааг мэдээлэв. Учир нь энэ онд Хэнтийн барилгачдын өмнө аварга том төсөвтэй ажлууд хүлээж байгаа учир төлөвлөсөн ажил асуудлуудаа цаг алдалгүй шийдэж эрчимтэй ажиллах нь чухал юм.

Эх сурвалж: Хэнтий аймгийн хэвлэл мэдээллийн алба