Өөдлөх айл үүднээсээ гэдэг. Үнэхээр хаалгаар орж ирэхэд л тухайн айлын өнгө төрх танигддаг. Үүдээр хөглөрсөн гутлуудаа хэрхэх, өөрсдийн болон зочдын гадуур хувцсыг хаана өлгөх, ойр зуурын тоглоом эд хэрэгслээ тавих газрыг хэрхэн шийдэх гэх мэт асуудал гэр бүлүүдэд байнга тохиолддог. Тэгвэл бид энэ удаад үүдний өрөөний буюу коридорын хэсгийн 10 шилдэг шийдлийг танилцуулахаар бэлтгэлээ.

    Нарийхан босоо ширээ үүдний өрөөний зайг тийм ч их хугаслахгүй мөртлөө эмх замбараатай байхад их үүргийг гүйцэтгэнэ. Бас гэр бүлийн гишүүд орж гарахад төдийлөн саад учруулахгүй. Энэ ширээн дээр сонин, ирсэн шууданг түр тавихаас гадна гадагш авч гарахад ойр байлгах шүхэр, сүүний шил зэргийг тавихад тохиромжтой байгааг та бүхэн харж байгаа байх. Гэрийн, гараашийн, шуудангийн хайрцагний гэх мэтээр түлхүүр тус бүрийг тусад нь өлгөх жижиг ханын өлгүүр, орж ирэнгүүт хувцсаа өлгөх зай бага эзлэх өлгүүр ч орчныг цэгцтэй харагдуулж байна. Заавал сандал дээр сууж гутлаа өмсөхгүй байхад ширээний хажуугийн жижиг тавцан тус болох нь дамжиггүй. Мөн ширээн дээрх радиогоос гадна цүнх, ойр зуурын хэрэгслээ тавихад болохгүй зүйл байхгүй.

     Танай гэрийнхэн хэтэрхий олон гуталтай юу. Түүнийгээ эмх цэгцтэй байлгахад хүндрэл учирч байна уу? Тийм бол үүдний өрөөндөө ийм гутлын тавиур тавьж яагаад болохгүй гэж. Хаана ч зөөж тавьж болохоор, бас хөнгөн, зөөлөн гутлын тавиур зай талбайг хэмнэхээс гадна ямар ч байсан 18 хос гутлыг агуулж чадна. Мэдээж гутлын хэлбэр хэмжээнд тохирсон том жижиг шүүгээ байдгийг бодолцох хэрэгтэй. Том хэмжээтэй гутал олон байдаг бол тийм гутлууд тохирох шүүгээг авахад л болно. Тэгээд дээр нь хэн хаана нь гутлаа хийх вэ гэдгийг тогтоон дээр нь нэрийг нь бичиж яагаад болохгүй гэж?

   Дээр нь суугаад гутлаа өмсөх юм уу, хэсэг зуур амрах сандал болгох энэ жижиг тавилгыг бас гутал, бусад хэрэгсэл агуулах шүүгээ болгож болно. Энэ нь зай багатай үүдний хэсэгт гайхалтай тохирно. Энгийн нэгэн сүлжмэл сагс байгаа ч хөнгөн мөртлөө орчиндоо зохицсон боломжийн шийдэл биш гэж үү?

    Хүүхдүүд л болсон хойно орж ирэнгүүтээ тоглож байсан цохиур, бөмбөг зэргээ хаа хамаагүй шидэж орхидог. Тэгээд дараа нь гарч тоглох болохоороо нөгөөхөө эрж хайн орон гэрийг бужигнуулж орхидог биз дээ. Тэгвэл эцэг эхчүүдэд үүдний өрөөний хэсэгт тавьж болох энэхүү сагсыг санал болгож байна. Бэйсболын болоод теннисны цохиурууд, хаа хамаагүй өнхрөөд алга болчихдог бөмбөгүүдийг агуулах энэ сагс тийм ч их зай эзлэхгүй. Үүдний хэсэгт байрлуулснаар хүүхдүүд гадагш гүйхдээ тоглоом хэрэгслээ шүүрээд гарахад хамгийн ойр байх юм.

     Энгийн нүдээр харахад ханан дээрх модны зураг мэт байгаа биз. Харин энэ нь хамгийн бага зай эзлэх бас хананд наалддаг “мод”-он өлгүүр. Навч бүр нь дэгээ буюу өлгүүртэй. Бяцхан хүүхдүүд доод навчнаас, томчууд дээр ургасан навчнаас өлгөж болно. Орчин цагийн орон гэрийн дотоод заслын хамгийн бага зай эзэлдэг өлгүүрт тооцогдох бөгөөд харахад ч үзэмжтэй.

  Үүдний өрөөнд байрлуулах хувцасны өлгүүрийн өнгө өнгийн бөмбөлөг энэ хэсэгт өнгө гэрэл авчрах нь мэдээж. Өнгө өнгийн бөмбөлөг нь өлгүүртэй хувцас тогтооход дэмтэй, бас малгайнд ч...

    Үүдний өрөөнд жинхэнэ тохирсон тавилга биш гэж үү. Бүх зүйл эмх цэгцтэй. Өлгүүрийн дээд хэсэгт малгай, ороолт, бээлий хийх хэсгүүдтэй. Түүний доорх өлгүүрт хувцас, шүхэр, цүнх гээд бүгдийг өлгөж болно. Харин доод шүүгээ бүхий сандлыг гутал, шаахай хийн ашиглахаас гадна сууж амрах, гутлаа өмсөхөд зориулжээ. Хажууд нь өлгөсөн түлхүүр өлгөх болоод шуудангаа тавих жижиг тавиур ч та бүхэнд таалагдах болов уу.

     Танай үүдний өрөөний хэсэг маш бага зайтай юу. Тэгвэл энэ ханан дахь зохион байгуулагч тусаа өгнө. Энэ жижиг хэрэгсэл хоёр үүрэгтэй, бас хоёр тасалгаатай. Дээд хэсэгт гар утас, нүдний шил гэх мэт аваад гарахад ойр байх зүйлүүдийг, түүний арын хэсэгт ирсэн шуудан, түлхүүр, бичиг баримтыг хийхэд тохиромжтой. Доод хэсгийн өлгүүрийг татан буулгаад хувцсаа өлгөж болох нь.

   Үүнийг дизайнерууд эмх замбараатай үүдний өрөөний жишээ гэж үзэж байна. Тавиурын дээд хэсэгт утас гэх мэт ойр зуурын эд зүйлийг тавих бол доод хэсэгт гутал шаахайгаа хийчихнэ. Голын хэсэгт сэтгүүл зэргийг тавьж болно. Хувцас өлгөх найман том, бас нэмэлт жижиг гурван өлгүүрийг харж байгаа байх. Түүнчлэн Босоо том толь гэрээсээ гарахдаа бүх зүйл ОК байна уу гэдгээ шалгахад тус болно.

   

 

 

 

 

 

 

 

 

    Маш бага зайтай үүдний хэсэгт тохирсон шийдэл. Хангалттай олон өлгүүр нь хувьцас, малгай, ороолт зэрэгт хангалттай хүрнэ. Түүнчлэн шүхрээ хийх хэсэгтэй. Доод суурь нь хангалттай тулгууртай болохоор хамаагүй их хувцас өлгөснөөс болоод өлгүүр уначих вий гэж айлтгүй.

 

"Барилга.МН" сэтгүүлийн №22 дугаараас