Нөхөр бид хоёр дөнгөж гэрлээд жижигхэн байшин худалдан авч амьдарсан юм. Би үргэлж жижиг байшинг үлгэрт гардаг шиг гурвалжин дээвэртэй, ид шидийнх мэтээр төсөөлж ирсэн. Тийм болоод ч тэрүү анхны байшин маань жижиг ч гэсэн харангуут сэтгэл татсан юм. Тэр байшиндаа амьдарч байхдаа зай талбайг нь хэрхэн том болгох талаар боддог байлаа. Зарим ханыг нь буулган цонх хийх, зарим хэрэгцээгүй зүйлийг гадагш гарган зай гаргах гэх мэтээр байнга төсөөлж бодно. Мэдээж би жижиг байшингаа илүү зайтай болгохыг мөрөөдөж байсан хүслээ биелүүлсэн. Гэхдээ байшин минь ч гэсэн хуучин өнгө төрхөө хадгалж үлдсэн шүү.
Ингээд жижиг байшинг зайтай болгох 10 шилдэг санаагаа танилцуулья.
 

Зочны өрөөг харахад нэлээд зайтай харагдаж байгаа нь мэдээж. Гэхдээ ийм харагдуулахад ханыг нь цөмлөн томосгосон цонх үлэмж үүрэг гүйцэтгэж байгаа юм. Өөр элдэв зүйл нэмэлгүйгээр ийм замаар та өрөөгөө уужим цэлгэр болгож чадна.

Өрөөний хаалга шилэн байснаар гэрэл шууд нөгөө өрөө рүү нэвтрэн уужим цэлгэр мэт сэтгэгдлийг төрүүлнэ. Гэхдээ унтлагын өрөөг оройд зочдын өрөөнөөс тусгаарлах шаардлагатай болох нь мэдээж. Энэ асуудлыг дээш нь эвхдэг туузан хөшгөөр шийдэж болно. Оройдоо хөшгөө буулгаснаар унтлагын өрөө зочдын өрөөнөөс тусгаарлагдаж, өдөрт нь хөшгийг нээснээр хоёр өрөөг холбосон гэрлийг шууд нэвтрүүлэн гэрийг улам зайтай, тохилог харагдуулах болно.
 

Байшингийнхаа гадна гоёмсог саравч барих нь тун ч зөв санаа юм шүү. Энэ нь өглөөний цэвэр агаар амьсгалан цайгаа ууж суухад тун ч тохиромжтой нь мэдээж. Түүнээс гадна амьдралынхаа хэсэг хугацаагаа өнгөрүүлдэг газар тань болж, нэг үгээр хэлбэл орон зайг тань нэмж байна гэж ойлгож болно. Үзэсгэлэнт цэцэгс тарьж, сэтгэлийн таашаал эдлэхээс гадна, энэ хэсэг унтлагын өрөөтэй ойр байвал зүлэг цэцэгсийн сайхан үнэрт сэтгэл амгалан нойрсох боломжтой болно.
 
 

Хуучны бас жижиг байшингуудын угаалгын өрөө хэзээнээсээ том байдаггүй. Тэрхүү жижиг зайг ашигтай талбай болгон хувиргах гол арга бол олон тооны шургуулга, шүүгээ. Шургуулга, шүүгээнүүд ил харагдах элдэв зүйлсийг далдлан цэгцтэй харагдуулахаас гадна жижиг зайг ашиглах хамгийн зөв арга юм шүү.

Үүдэн хэсгийнхээ хаалгыг шилэн байлгавал илүү дээр. Эсвэл тэр хэсэгт цэлгэр цонх суурилуулж бас болно шүү дээ. Энэ арга нь орон зайг илүү том болгох бөгөөд уйтгартай бүрхэг өдөр ч сэтгэл санааг тань өргөнө гэдэгт итгэлтэй байж болно.

Зарим зай талбайн бөглөөс болсон зарим ханыг буулгахад гэмгүй. Тийм хана нь өрөөг хайрцагласан мэт болгож, давчуу сэтгэгдлийг төрүүлээд байдаг талтай. Гэхдээ даацын бус ханыг л оролдож болно гэдгийг санахад илүүдэхгүй. Дээрх зургийг хараарай. Шатны наана байсан ханыг буулгаснаар илүү зай талбайтай болсон бөгөөд энэ хэсгийг хооллох хэсэг болгон ашиглахад таарахаар болсон байгаа биз дээ.
 

Шатны доорх хөндийг хэрхэн ашигтай талбай болгосныг анхааралтай ажиглаарай. Шатны доорх хөндийг хувцасны өлгүүр, олон шургуулга, тавиур гэх мэтээр олон янзаар ашиглах боломжтой.

Хэрвээ танд угаалгын өрөөгөө арай орчин үеийн маягаар тохижуулах боломж байгаа бол дээрх зурган дээрх шүршүүрийг нэг хараарай. Шүршүүрийн шилэн хаалга өрөө тасалгааны зайг илүү уужим харагдуулж байгаа гэдэгтэй та санал нийлэх болов уу. Мөн шүршүүрийн цаана хийсэн жижиг цонх хүртэл ямар гэрэл гэгээ нэмж буйг анзаараад нэг үзээрэй.

Ажлын өрөөний зай талбайг ашиглахын тулд олон тооны тавиур, шүүгээг байрлуулбал зохистой.

Доторх зайг нь ашиглаж болох хүнхэр шүүгээ өрөөг уужим болоод анхаарал татахуйц болгоно.

"Барилга.МН" сэтгүүлийн №23 дугаараас...