Бага зайтай жижиг орон сууцны хувьд санаанд таарсан байдлаар тохижуулахад жаахан хүндрэлтэй. Мэдээж зай талбай багатай гэдэг нь хамгийн том асуудал бөгөөд тансаг, ганган тавилга тавичихвал бөгс эргэх зайгүй л болно гэсэн үг. Гэвч бид бага зайтай орон сууцанд тохирох бас энгийн биш дэгжин хэд хэдэн шийдлийг санал болгох гэж байна. Хэрэв та жижиг орон сууцанд нүүн орох гэж байгаа бол, эсвэл байрандаа засвар хийн шинэчлэх гэж байгаа бол тавилга хэрэгсэл, чимэглэл худалдан авахаасаа өмнө доорхи зүйлд анхаарлаа хандуулаарай.

Хэв загвар
 

Хэдийгээр цагаан өнгө зайтай цэлгэр харагдуулдаг хэдий ч өрөөний бүх ханыг цагаан болгохоос зайлсхийх хэрэгтэй. Ханын зарим хэсгийг цайвар шар, эсвэл цайвар саарал өнгөөр будсанаар дулаахан, бас тохитой мэдрэмжийг төрүүлэх болно. Тавилгын хувьд ч том биш, гэхдээ хурц өнцөгтэй бишийг сонговол зохилтой. Мөн өрөөнд дулаан, тохитой мэдрэмжийг авчирдаг хананыхаа өнгөтэй зохицуулбал янзтай.

Тавилгын хэлбэр

Гэрийн дотоод засалд классик юмуу миниталист загварын тавилга донжтой харагддаг хэдий ч жижиг зайтай орон сууцанд тийм тавилгыг санал болгомооргүй байна. Харахад сонирхолтой, загварлаг хэдий ч булан, хэлбэр нь зөөлхөнийг сонгох нь зүйтэй. Тухайлбал, дугуйрсан, бөмбөгөр, гэхдээ нимгэн тавилга өрөөний зай талбайг хэмнэхээс гадна маш эмх цэгцтэй харагдуулах болно.

Зай талбайг уужим харагдуулах хэрэгслүүд

Жижиг орон сууцны хувьд зай талбайг гарган тохицуулах нь амин чухал зүйл. Үүний тулд  зай талбайг уужим харагдуулах зарим нэг нэмэлт хэрэгслийг хэрэглэхийг санал болгож байна. Тухайлбал толь. Толь өрөөн дэх эргэн тойрныг харахад туслахаас гадна өрөө тасалгааг гэгээтэй, бас уужим харагдуулахад тусална. Цонхныхоо ойролцоо томоохон толь өлгөвөл гадна хэсгийн уужим зай өрөө тасалгаанд тусан уужим мэт сэтгэгдлийг төрүүлнэ.
 

Олон үйлдэлтэй тавилга

Олон талаар ашиглаж болох орыг та бүхэн харж байна. Ор болгон ашиглахаас гадна доод талыг нь агуулах сав болгох боломжтой бөгөөд энэхүү ор өрөөнд хөнжил гэх мэт эд зүйл хөглөрч эмх замбараагүй харагдахаас сэргийлнэ. Түүнээс гадна ханан дахь хураангуйлсан дүрс өрөөг уужим цэлгэр харагдуулж байгааг анхаарахад илүүдэхгүй.

Өрөөг тусгаарлагч

Өрөө тасалгааг дундуур нь хуваан нэмэлт зай гаргах шаардлага тулгарч болох юм. Тэгвэл шилэн юмуу, модон, эсвэл даавуугаар хийсэн тусгаарлагчийг хэрэглэвэл илүү тохиромжтой.

Угаалгын өрөөг уужим харагдуулах арга

Жижиг зайтай угаалгын өрөө маш нарийн төлөвлөлт шаарддаг. Өнгөнөөс авахуулаад тавилга, хэрэгслийг нарийн бодож төлөвлөж сонгох нь зүйтэй. Угаалгын өрөөний хувьд өнгө цайвар байх нь уужим харагдуулах гол арга. Мэдээж гэрэл ойсон, плита, нарны туяа нэвт гэрэлтэх хана энэ өрөөнд хамгаас чухал.
Тэгш өнцөгтэй гялалзсан тавилга сонгох хэрэгтэй. Гэхдээ тэдгээр нь шалны хамаг зайг эзлэхээс зайлсхийх нь зүйтэй. Алчуурын тавиур нь гялтгар, бас битүү биш байвал зүгээр.

 
Хэрэв танай угаалгын өрөө хэтэрхий жижиг бол шүршүүр байрлуулах хэсгээ хасах хэрэгтэй болно. Мэдээж усанд ордог онгоцоо баяртай гэж хэлэхийг хэн ч хүсэхгүй байх. Нэгэнт зай талбай бага болохоор онгоцоо нарийнхан, бас жижигээр больж, шүршүүрийн асуудлыг онгоцтой хамтад нь шийдэхээс аргагүй. Тэгээд тэрхүү жижиг зайгаа жаахан уужим харагдуулмаар байгаа бол шидэт арга болсон толийг ашиглаарай. Мөн зай талбайг нэмэгдүүлж харагдуулдаг элдэв дүрст ханын зураг ч үр дүнгээ өгнө.

Studio Apartment буюу бүгд нэг дороо байх өрөөг хэрхэн тохитой болгох вэ

Studio apartment гэдэг нь зочдын өрөө, унтлагын өрөө, ажлын өрөө, гал тогоо хамтдаа байх, манайхаар бол нэг өрөө орон сууц юм. Жижиг зайтай ганц өрөөг тохи тухай харагдуулахын тулд нэлээд зүйлийг анхааралтай бодож шийдэх ёстой. Өрөөний ханын өнгө бууралттай цайвар байвал зохимжтой. Цагаан өнгийн хана цайвар улаан, цайвар хөх, бууралттай ногоон, шар өнгөтэй тавилга хэрэгсэлтэй гайхалттай зохицдог.

Өрөөний хэсгүүдийг хэрхэн хуваарилах нь чухал асуудал. Хэрвээ танд ажиллах орон зай илүү хэрэгтэй байгаа бол чухам аль хэсэг нь илүү дээр вэ гэдэгт анхаарлаа хандуулаарай.
Ор болон ширээг тусгаарлагчийн цаана буюу нуугдмал газарт байрлуулах нь өрөөнд саад тотгор үүсгэхгүй, мөн зай талбайг хэмнэх талтай. Гал тогоо болоод зочдын өрөөг ч тусгаарлах хэрэгтэй. Гэхдээ тусгаарлагчаар өөр өөр зүйлийг хэрэглэх шаардлагатай. Галын өрөөг модоор хийсэн хагас тавцангаар хуваах нь хоёр хэсгийг ангилахаас гадна хагас тавцан өрөөг хоёр хуваах өндөр хана биш болохоор зай талбайг төдийлөн эзлээд байхгүй. Мэдээж толь болоод олон үйлдэлтэй тавилга өрөөг уужим харагдуулахна гэдгийг санахад илүүдэхгүй.
 
 

"Барилга.МН" сэтгүүлийн №21 дугаараас...