Төрийн байгууллагын зарим чиг үүргийг ТББ-уудад шилжүүлэх шийдвэрийг 2010 оны Засгийн газрын 325-р тогтоолоор баталсны дагуу ЗТБХБЯ, Барилгын салбарын 11 мэргэжлийн холбоодын нэгдэл болох “Барилгын Хөгжлийн Үндэсний Нэгдсэн Төв”-тэй хамтран ажиллахаар болж, 2012 оны 03 сарын 27-нд талууд харилцан санамж бичигт гарын үсэг зурсан юм. Ингээд тус санамж бичигт гарын үсэг зуралцсан эрхмүүдийн яриаг товчоор хүргэе.

ЗТБХБ-ын дэд сайд Б.Цэнгэл

-Манай Барилгын салбарт одоогийн байдлаар 50 орчим төрийн бус байгууллага үйл ажиллагаа явуулж байгаа гэсэн мэдээлэл байдаг. Эдгээрийн 11 ТББ нь нэгдэж, Монголын Барилгын Хөгжлийн Үндэсний Нэгдсэн Төв гэдэг тугийн дор үйл ажиллагаа явуулахаар болсон. Энэ нэгдсэн төвтэй Засгийн газрын нэрийн өмнөөс манай ЗТБХБЯ хамтран ажиллах санамж бичигт гарын үсэг зурж, 2012 оны төлөвлөгөөгөө батлан хэрэгжүүлэхээр болсон явдлыг маш чухал ач холбогдолтой арга хэмжээ боллоо гэж үзэж байна. Энэхүү санамж бичигт Засгийн газрын тухай хуульд заасан Төрийн тодорхой чиг үүргийг нэгдсэн холбоогоороо дамжуулан ТББ-уудад шилжүүлэх ажлыг хэрэгжүүлэхээр тусгасан байгаа. Үүнд тодорхой хэмжээний барилгын үйлдвэрлэлийг явуулах, тусгай зөвшөөрөл олгох, барилгын сургалт зохион байгуулах, цаашлаад нарийн мэргэшүүлэх үйл ажиллагаануудын тусгай зөвшөөрлийг олгох тухай асуудлыг тодорхой зааж, үүнийг хэрэгжүүлэх цаг хугацааг тохирч байгаа юм. Манай 2 байгууллага хамтарч ажилласнаар Төрийн бодлого шийдвэрт олон нийтийн санаа бодол, нэн ялангуяа барилгын чиглэлээр үйл ажиллагаа явуулж буй ТББ-уудын бодол санааг тусгаж, Засгийн газрын томоохон мөрийн хөтөлбөр, төслүүд дээр хамтарч ажиллах боломж нээгдэж байна. Барилгын салбарт стандарт, нормативыг маш ихээр шинэчлэн, хэрэгжүүлж байгаа. Үүн дээр ч гэсэн энэ нөхдийнхээ санал бодлыг авч, хамтран ажиллах юм.

Барилгын Хөгжлийн Үндэсний Нэгдсэн Төвийн удирдах зөвлөлийн дарга Л.Нямсамбуу

-Монголын нийгмийн хөгжилд мэргэжлийн холбоодын гүйцэтгэх үүрэг их чухал. Тиймээс Барилгын салбарын мэргэжлийн 11 холбоо нэгдэж, “Барилгын Хөгжлийн Үндэсний Нэгдсэн Төв”-ийг байгуулсан. Энэ төв бол өөрийгөө үүсгэн байгуулсан 11 холбоо болон Барилгын салбарын бусад ТББ-уудын хамгийн түгээмэл асуудлаар засаг төртэй харилцаж ажиллана. Эдгээр холбоодын бүрэн эрх хадгалагдана. Холбоод өмнө нь ажиллаж байсан чиглэлээрээ үйл ажиллагаагаа явуулна. Тус төв Барилгын салбарыг хөгжүүлэх үйлсэд мэргэжлийн төрийн бус байгууллагуудын хүчийг нэгтгэн, Засгийн газар, Яам агентлагтай хамтран ажиллаж, үр дүнд хүрэх гол зорилтыг тавьж байгаа юм. Бид Төрийн байгууллагуудаа хүндэтгэн, хийвэл зохих зүйлүүдийг өөрсдөө санаачлан асуудлаа боловсруулаад, шийдүүлэх гэсэн зарчмын арга хэлбэрүүдийг гол болгож ажиллах сонирхолтой байгаа.