Барилга МН сэтгүүл

     Барилга архитектурын хөгжилд хүч түрэн орж ирж байгаа Хятад улсад аялах бүртээ шинэ барилга нэмэгдсэнийг олж харах нь дамжиггүй. Ялангуяа урд хөршийн нийслэл Бээжинд өдөр бүр нэг барилга нэмэгддэг гэвэл хэтрүүлсэн болохгүй биз ээ. Энэ удаа ч мөн нийтлэлийн сэдэв болохоор гайхалтай нэгэн барилгыг олж харсан юм. Барилга бүтээн байгуулалтаараа тэргүүлэгч Хятад улсын үзүүштэй барилга байгууламжуудын нэг нь Хятадын телевизийн хамгийн том сүлжээ CCTV буюу Хятадын төв телевиз юм. Энэхүү барилга нь Бээжин хотод сүндэрлэсэн онцгой содон шийдэлтэй байгууламжуудын тоонд зүй ёсоор орох болов уу?

    Этгээд ч гэмээр архитектурийн шийдлийг харахад телевиз гэхээс илүүтэй загварын ордон , эсвэл үзэсгэлэн, үзвэр үйлчилгээнд зориулсан байгууламж мэт харагдана. Барилгын талаар сонирхуулахад CCTV барилга 2004 оны 7 сарын 1-нээс эхлэн 2008 оны 1 сарын 1 хүртэл 4 жилийн хугацаанд баригдаж дуусжээ. Уг барилгыг архитекторын салбартаа дэлхийд тэргүүлэгч Герман, Голландын архитекторчид Английн инженертэй хамтран бүтээжээ. 234 метр 44 давхар энэ барилгат хэвтээ болон босоо хэрчимээр торлож гадаргууг бүржээ. Энэ нь барилгын суурь хэсгээс орой хүртэлх 473 мянган метр талбайг тэгш бус хэмтэйгээр бүхэлд нь бүрхсэн гэсэн үг.

     Байршлын хувьд газар хөдлөлтийн идэвхитэй бүсэд хамаарагдах учраас барилга угсралтын ажлыг сайтар тооцоолж барьсан байна. Барилга баригдаж дуусахад таксины жолоочид барилгыг “боксчны богино өмд” шиг гэж хэлж хоч өгсөн гэнэ. Телевизийг барихдаа гурван хэсгээр нь тусад нь барьсан бөгөөд  нэгтгэж нэг барилга болгосон байна. Тэгэхдээ хоёр босоо байгууламжыг холбосон хөндлөн хэсгийг холбохдоо барилга угсралтын хүйтний хэмийг тохируулах үүднээс үүр цайхаас өмнөхөн нийлүүлж угсарсан.

    CCTV барилгын эргэн тойронд нийтийн цэцэрлэгт хүрээлэн, кино зураг авалт хийх чөлөөт талбай, студи продакшныг байрлуулахаар төлөвлөсөн байна. Энэ бол Бээжингийн худалдааны дүүрэгт баригдсан 300 шинэ барилгуудын нэг юм. Уг барилга дотор телевизийн захиргаа, мэдээллийн алба, нэвтрүүлгийн алба болон студи бүгд байрладаг гэнэ. Барилгын нээлтийн ажиллагаанд Хятадын төрийн томоохон өндөрлөгүүд болох Хятад улсын Ерөнхийлөгч Ху Жин Тао, Жианг Зимин, Вин Жабао нар хүрэлцэн иржээ.

     2009 оны 2 сарын 9-нд CCTV-ийн залгаа байрлах телевизийн соёлын төв галд бага хэмжээгээр өртсөн байна. Энэ нь телевиз нээлтээ хийхээс ердөө хэдхэн сарын өмнө болжээ. Гал гарсан шалтгаан нь CCTV-ийн хажууд баригдсан “Мандарин Ореантал” зочид буудалд хүмүүс дэнлүүний баяр тэмдэглэсэнээс үүссэн байна. Уг зочид буудалд жуулчид байрлахаас гадна том кино театр, бичлэгийн 2 студи, дуу бичлэгийн 3 хяналтын танхим мөн дижитал кино студи, 2 дэлгэцийн танхим байрладаг байсан бөгөөд зочид буудлын 158 мянган метр талбайтай өндөр барилга тэр чигтээ галд автаж нэг гал сөнөөгч нас барсан эмгэнэлтэй явдал болсон юм. Харин 2009 оны 10 сард Телевизийн соёлын төвийн гол хаалганы шатыг нээсэн нь барилга дахин сэргэсэнийг баталсан ч телевизийн үндсэн барилга 2010 он хүртэл эзэнгүй хоосон хэвээр байсан бөгөөд шөнийн цагаар барилгын зөвхөн доод хэсгийн гэрлийг асаадаг байж.