Тус зөвлөгөөнийг Нийслэлийн засаг дарга бөгөөд Улаанбаатар хотын Захирагч Г.Мөнхбаяр: “Төрийн захиргааны төв байгууллага хувийн хэвшилтэй ярилцаж, Улаанбаатар хотод зураг төслийн ажил хийдэг, яамнаасаа зөвшөөрөл авсан байгууллагуудыг урьж ярилцъя гэж шийдлээ.” хэмээн эхлүүлсэн. Тус зөвлөгөөнд Зам тээвэр, барилга , хот байгуулалтын яамны мэргэжилтэн “ Хот байгуулалтын талаар баримталж буй бодлого, цаашдын зорилт”, Улаанбаатар хотын ерөнхий архитектор бөгөөд Нийслэлийн барилга, хот байгуулалт, төлөвлөлтийн газрийн дарга Э.Хүрэлбаатар “Хот байгуулалтын бодлогыг хэрэгжүүлэх шинэ алхамууд”, Газрын харилцаа, барилга, геодези зураг зүйн газрын дарга Ц.Ганхүү “Тусгай зөвшөөрөл олголт, барилгын зураг төсөл, экспертизийн чанарыг сайжруулах боломжууд”, Нийслэлийн Газрын албаны дарга Ц.Сандуй “Газрын харилцаа, хот төлөвлөлтийн уялдааг сайжруулах нь”, Монголын барилгачдын холбооны ерөнхийлөгч М.Батбаатар “Нийслэлийн хот байгуулалтад барилгын салбарын оролцоо, үүрэг, хариуцлага”, JICA төслийн баг “Нийслэл хотод метро байгуулах талаар” гэсэн илтгэлүүдийг тус тус тавьж оролцлоо.