Ярилцлагаа Монгол Улсын барилгын салбартаа үндэсний томоохон компани гэж зүй ёсоор нэрлэгдэх “Нийслэл-Өргөө”ХК түүхэн замналаас яриагаа эхлэе.
       Манай компани анх үүсэн байгууллагдсан түүх гэвэл 1962 онд Улаанбаатарын байшин үйлдвэрлэх комбинатын дэргэд “Угсармал орон сууцны анги” нэртэй байгууллагдаж улмаар 1964 онд Сайд нарын Зөвлөлтийн тогтоолоор Улаанбаатар хотын Угсармал орон сууцны контор болж хожим улам өргөжин Улаанбаатар хотын Техник туслалцааны “Угсармал орон сууцны барлга трест” буюу Угсармал барилгын үйлдвэрийн нэгдэл болж 1999 он хүртэл ажиллаад мөн оноос хувьчлагдан “Нийслэл өргөө” ХК нэртэй болж, хагас зуун жилийн түүхийнхээ хугацаанд нийслэл хотынхоо хаяаг тэлж, хөгжил дэвшилд нь хувь нэмрээ оруулж, өнгө төрхийг нь шинэчлэх, ард иргэдийг нь тохилог орон сууцаар хангах үйлсэд манай байгууллага, үе үеийн хамт олон маань гарамгай гавъяатай түүхэнд үлдэх өндөр бүтээлтэй ажиллаж ирсэн уламжлалтай.
 
     Хагас зуун жилд байгууллага тань өргөжин, хөгжиж дэвшиж, хүчин чадал нь өсөн тэр хэмжээгээр тухайн үеийн төр засгаас үүрэх ачааг нь нэмж бас нэр алдрыг нь өөрчилж иржээ. Гэвч “Улаанбаатарын”, “Нийслэлийн” гэсэн нэр овог ямагт байгууллагын тань нэрийг тодотгон нэршиж ирсэн юмаа даа?
     Тэр үнэн шүү. Арга ч үгүй юм. Улаанбаатар хотынхоо иргэдийг тохилог орон сууцаар хангах дагнасан, үүрэг хүлээсэн мэргэжлийн байгууллага байснаар энэ их үйлсэд олон жилийн турш маш их бүтээн байгуулалт хийсэн.
      Тухайлбал орон сууцны 2, 3, 5, 6, 10, 11, 15, 21 –дүгээр хорооллууд, 6-р бичил хороолол болон Нисэх, Биокомбинатын орчмын угсармал орон сууцны барилгуудыг иж бүрнээр нь барьж ашиглалтанд оруулсан нь бахархалтай түүх шүү. Тийм учраас бид чөлөөт зах зээлийн нийгэмд шилжээд үйл хэргээ үргэлжлүүлэхээр “Нийслэл өргөө” гэсэн нэрийг сонгон авч ажилласан юм.  
    
       Улаанбаатар хотын хотын бүтээн байгуулалтанд танай хамт олны оруулсан хувь нэмэр асар их. Зах зээлийн тогтолцоонд хэрхэн шилжиж, өнөөдрийн энэ өндөрлөгт хүрэв? Ямар саад бэрхшээл тохиолдож байв?
       Бидний хамгийн хүнд үе 1980-аад оны сүүлээс 2000-аад оны эх хүртэл байсан. Тэр үед нийгэм маань орвонгоороо эргэсэн үе байлаа. Зах зээлийн эдийн засаг гэж чухам юуг хэлээд байгааг ч сайн ойлгохгүй, чухам ямар хүнд хэцүү бэрхшээл саад бидний өмнө нүүрлэн байгааг мэдэхгүй тийм л үед барилгын салбар бүхэлдээ уналтад орж, хуучин Зөвлөлт Холбоот Улсаас ирдэг зээл тусламж зогсож, барилга барих нь битгий хэл өдрийн хоол хүнсээ яая гэдэг хүндхэн он жилүүдийг даван туулж өдрөөс өдөрт мэдэхгүй шинэ зүйлтэй учирч байсан үеийг бодвол өнөөдөр зах зээл гэдгийн учир утгыг нийтээрээ мэддэг болжээ.
     Манай байгууллага, хамт олон ч бэрхшээл саадыг давж, хөл дээрээ бат зогсож, салбартаа томоохон аж ахуйн нэгж болж чадлаа.
 
     Одоо “Нийслэл-Өргөө”ХК өнөөдрийн байдлаар ямар барилга байгууламж бүтээн босгож байна вэ? гүйцэтгэж байгаа ажлуудаас дурьдвал …..
      Зах зээл гэдэг цэвэр шудрага өрсөлдөөн юм. Манай компани өнөөдөр барилгын ажил, үйлчилгээ явуулахад зах зээлд ямар бүтээгдэхүүн онцлон хэрэгтэй байна вэ? түүнийг боломжийн хирээр өөртөө үйлдвэрлэх, түүгээрээ чанартай барилга барих зорилт тавьсан. Тэр зорилтоо үе шаттай хэрэгжүүлж байгаа ур чадвартай эвсэг сайхан хамт олонтой их бүтээн байгуулалтын талбарт өрсөлдөн, бүтээн босгож чамлалтгүй амжилттай ажиллаж байна. Сүүлийн 10 жилд гэхэд л Төрийн Ёслол Хүндэтгэлийн өргөө цогцолбор, Багануурын орон сууцны 7 барилга, Завханы Түдэвтэй суманд дунд сургуулийн барилга, Зүүн болон Төвийн бүсийн 11 аймгийн 21 сургуулийн их засвар, Монгол Улсын эрдэнэсийн сангийн барилга, МУИС-ын хичээлийн байрны өргөтгөл гэх мэт худалдаа үйлчилгээ, офиссийн олон арван барилгыг барьж ашиглалтанд өглөө.
      Мөн өнөөдөр Үндэсний Архивын Барилга, Улаанбаатар хотын Эх Нялхас Төв 4-р төрөх эмнэлэг зэрэг барилгуудыг барьж, тэдгээрийн үндсэн угсралтын ажлыг дуусгаад байна. Бас энэ 8-р сард Говь-Алтай аймгийн Алтай хотод онгоцны нисэх буудлын барилгыг барьж байнгын ашиглалтанд өглөө.
 
      Энэ их бүтээн байгуулалт, компанийн үйл ажиллагаанд оруулсан ахмад үеэ дурсахын зэрэгцээ өнөөдрийн хамт олныхоо талаар товчхон яривал ...
     Өмнөх үеийн түүхээ мэдэхгүй бол ойд төөрсөн сармагчин луугаа адил гэдэг үг байдаг байхаа. Энэ их бүтээн байгуулалтыг хийж компанийхаа үе үеийн түүхийг бичилцэж явсан ахмад үеэрээ бахархаж, хүндлэн, үлгэр дуурайлал авч байдаг. Манай байгууллагаас Монгол Улсын хөдөлмөрийн баатар эмэгтэй Жүгдэр, гавъяат барилгачин Я.Жадамбаа, М.Бэгзсүрэн, Д.Жамъян гээд алдарт гавъяатнууд төрж гарсан. Мөн төрийн өндөр дээд шагнал одон медалиар шагнагдсан олон хүн бий.
      Өнөөдөр “Нийслэл өргөө” ХК-ийн бүтээлч хамт олны дотор Монгол Улсын зөвлөх инженер 2, Магистр 6, бакалавр инженер 20 гаруй, санхүү, эдийн засгийн болон техник технологийн мэргэжлийн ур чадвар, дадлага туршлагатай олон арван хүмүүс ажиллаж байна. Тиймээс ч барилгын салбартаа үндэсний томоохон компани гэж зүй ёсоор тооцогдож, нийслэлээрээ овоглон тэр нэр алдрыг ямагт өндөрт өргөн ажиллаж байна даа.  
 
Амжилт бүтээл арвин түүхтэй байгууллагын цаашдын зорилго зорилт нь юу байдаг юм бол?
      Энэ сайхан түүхтэй бүтээлч хамт олон маань цаашид улам ихийг бүтээж Монголын барилгын салбарыг тэргүүлэгч гэдэг нэрээ хамгаалахаас гадна өнөөдөр хэрэглэгчээ дээдлэсэн, барилгын чанар, хөдөлмөрийн аюулгүй ажиллагаагаа зорилго болгосон Улаанбаатар хотын их бүтээн байгуулалтанд бид манлайлагч байсан цаашид ч манлайлагч байх болно гэсэн зорилт тавин ажиллаж байна.
 
50 жилийнхээ ойг угтаж, ямар ажлуудыг хийхээр төлөвлөөд байна вэ?
       Манай хамт олон кампанийхаа 50 жилийн ойг хөдөлмөр бүтээлийн өндөр амжилтаар угтахаар бүтэн жилийн турш байгууллага хамт олон, харилцагчдынхаа дунд олон арван арга хэмжээ зохион байгуулж, бүтээлч ажлыг өрнүүлж байна. Удахгүй Улаанбаатар хот байгуулагдсан түүхт өдөртэй давхцан манай байгууллагын 50 жилийн ойн баярын арга хэмжээ болно. Энэ үеэр ажил хөдөлмөрөө дүгнэж, шилдгүүдээ шалгаруулж шагнан урамшуулах болно.
 
     Та бид хоёр байгууллагын түүхэн замнал, бүтээн байгуулалтын талаар дагнан ярилцлаа. Та өөрийнхөө тухай танилцуулаач. Анх барилгын салбарт хэрхэн орж ирэв. Таны ажил үйлсийн түшиг тулгуурт, эрч хүч нь юу байв?
 
       Намайг Балхүүгийн Ганзориг гэдэг эхнэр 4 хүүхэдтэй. Баянхонгор аймгийн Баянбулаг сумын уугуул. Улаанбаатар хотод төрж өссөн. Угсармал барилгын тоног төхөөрөмж засварын механик мэргэлжилтэй “Нийслэл Өргөө” ХК-г 1999 оны 2-р сард хувьчлан авснаас хойш өнөө хүртэл 13 жил удирдан ажиллаж байна.
     Надад ажиллах урам өгч, эрч хүч хайрлаж байдаг хамт олондоо их баярлаж явдаг. Манай хамт олон зах зээлийн энэ үед үнэхээр компаниа гэсэн сэтгэлээр, багаар ажилллаж чаддаг эвсэг сайхан түшиг тулгууртай хамт олон болсон. Нийт ажилчдийн 25% нь ахмад, 50% нь идэр насны, 25% залуучууд байдаг. Мөн барилга угсралтаас гадна барилгын материалын том жижиг 11 үйлдвэртэй, нийт байгууллагын хэмжээнд 500 гаруй ажиллагсад ажилладаг ийм л нэг “ажлыг хийе бүтээе” гэсэн эрмэлзлэлтэй хамт олон бий дээ. Та нартаа “Барилга.МН” сайтаар дамжуулан бид цаашид ихийг бүтээнэ, та нартаа баярлаж явдаг шүү! гэдгээ хэлье.
 
   
 
 
Ярилцсан: Г.Одгэрэл