Барилга МН сэтгүүл

     “Заг” ХХК-ийн захирал Байгальмаа: Нийслэлийн захирагчаас гарсан шийдвэрийг талархан дэмжиж байгаа

 

     Барилгын салбарт Хөдөлмөр Хамгаалал Аюулгүй Ажиллагааг хангаагүйн улмаас үйлдвэрлэлийн осол удаа дараа гарч эрдэнэт хүмүүсийн амь нас эрсдэх явдал гарсанд үнэхээр сэтгэл шимширч байна.

Манай салбарт Хөдөлмөр Хамгаалал Аюулгүй Ажиллагаанд анхаарлаа хандуулж энэ чиглэлийн болон хот төлөвлөлтийн норм, нормативийг яаралтай шинэчлэх шаардлагатай байна.

   Өнөөдөртөө хамгийн гол нь Барилгын байгууллагууд мөрдөгдөж байгаа хууль тогтоомжийг чанд баримтлан, ХХАА-нд тодорхой зардал төсөв гаргаж, ажиллах хэрэгтэй. Гарсан осол эндэгдэл нь үйл ажиллагаа явуулж байгаа нийт барилгын байгууллагуудад байгаа мэтээр мэдээллэж байгаа нь зүйд нийцэхгүй байдлыг сайжруулахын тулд бид хамтарч ажиллах шаардлагатай байна. Танайхаас зохион байгуулж буй арга хэмжээнүүд онцгой ач холбогдолтой юм.

 

     Нийслэлийн ИТХ, Засаг даргын зүгээс гаргаж, хэрэгжүүлж байгаа шийдвэр арга хэмжээг нийслэлийн нийт иргэдийн эрх ашигт нийцсэн чухал зүйл боллоо гэж талархаж дэмжиж байна.

    Одоохондоо энэ шийдвэрүүд нь цаг үеийн шинж чанартай мэт боловч тэдний ярьж хэлж буй яриа, бодлого чиглэл нь Нийслэлийн Газрын Харилцаа Хот Байгуулалтыг авилга, хүнд суртлын системтэй тогтолцоог устгаж, иргэдийн оролцоотойгоор төлөвлөж шийдвэрлэдэг жинхэнэ ардчилсан тогтолцоонд шилжиж байна гэсэн итгэл төрүүлж байна.

 

      Энэ байдлаас 1-рт. Мөрдөж байгаа хууль тогтоомжийг чанд мөрдөж ХХАА-нд онцгой анхаарч ажиллах,

      2-рт. Барилгын салбарын ХХАА-ний болон Хот Төлөвлөлтийн Норм, Норматив, Эрх зүйн байдалд үнэлэлт өгч, шинэчлэх шаардлагатай гэж үзэж байна.

 

 

 

 

   “Улаанбаатар барилга” ХХК-ийн захирал Б.Жүгдэр: Стандарт заавруудын шаардлагыг хангасан хэмжээний өртөгийг төсөвт суулгадаг ойлголт байхгүй

 

     Барилгын гүйцэтгэгч байгууллагуудын хариуцлагагүйгээс болж осол аваар гарч байгаа гэдэг нь бол үнэн. Харин хөдөлмөр хамгаалалын зардлыг ямар хэмжээнд тусгах, яаж шийдэх хэрэгтэйг нь ярих ёстой гэж зэж байгаа. Барилгын компаниудад хөдөлмөр хамгаалал, аюулгүй ажиллагаа, талбай дээр ажиллаж байгаа ажилчдын нийгмийн халамжийн асуудлаар ийм ийм ажлуудыг заавал хийсэн байх ёстой гэсэн стандартыг бий болгож, үүнийг нь барилгын өртөгт заавал тусгаж өгөх ёстой.

 

    Барилгын салбарт гарч байгаа осол аваар нь барилгачдыг хөдөлмөр хамгаалалын өдөр тутмын сургалтанд хамруулж чадаагүйтай холбоотой. Харин гудамжинд явж байгаа хүн осол аваарт өртөж байгаа нь барилгын эргэн тойронд хамгаалалт хийж чадаагүйтай шууд холбоотой.

 

      Барилгын салбарын хөдөлмөр хамгаалалын зардал бага байдаг. Хүний эрүүл мэнд, амь настай холбоотой энэ салбарын хөдөлмөр хамгаалалын зардлыг ихэсгэх боломж бололцоо хэр байдаг юм бол?

      Энэ маш чухал асуудал. Гүйцэтгэгч байгууллага хөдөлмөр хамгаалал, аюулгүй ажиллагааны зардал байхгүй учраас осол аваар гараад байна гэж ярьж болохгүй. Ямар ч байсан хөдөлмөр хамгаалал, аюулгүй ажиллагааны өндөр зардал шаардахгүй наад захын ажлыг хийх л ёстой.

 

   Манайд хөдөлмөр хамгаалалын стандарт зааврууд бий. Харин эдгээр стандарт заавруудын шаардлагыг хангасан хэмжээний өртөгийг төсөвт суулгадаг ойлголт байхгүй. Тийм учраас нэг барилгыг барихад хөдөлмөр хамгаалалын зардалд хэдий хэмжээний өртөг гарах юм бэ гэдгийг захиалагч, хөрөнгө оруулагчдад ойлгомжтойгоор тогтоох хэрэгтэй. Мөн хөдөлмөр хамгаалал, аюулгүй ажиллагааны сургалтыг байнга зохион байгуулах хэрэгтэй.

 

 

      Энэ арга хэмжээг буруутай үйлдлийн эсрэг тэмцэж байгаа зөв шийдвэр л үзэж байгаа. Яагаад гэхлээр барилга эхлэх зөвшөөрөлгүй, хот төлөвлөлтийн дүрэм журмыг зөрчсөн, хэн дуртай нь барилга барьдаг асуудлыг цэгцлэх хэрэгтэй. Тодорхой хэмжээний зөрчилтэй байгаа болоод л зогссон байх. Түүнээс биш зүгээр энэ олон барилгын ажлыг зогсоосон гэж үзэхгүй байна.

 

    Харин жирийн барилгачин ажилгүй болж байгаа хариуцлагыг дүрэм журмаа дагаагүй аваагүй барилга эхлүүлсэн хүмүүс л хүлээнэ шүү дээ.

 

 

 

 

 

       “Баянхайрхан трейд” ХХК-ийн захирал Ж.Дамба: Нэг юм хийх гээд нөгөөг нь хаяаад байж болохгүй.

 

 

      Энэ шийдвэр зөв. Гэхдээ асуудлыг иж бүрнээр авч ярихгүйгээр шийдвэрлэхэд хэцүү. Барилгын компаниудын хариуцлагатай шууд холбоотой асуудал. Дээр нь барилгын ажилчдыг мэргэшүүлэхгүйгээр ерөөсөө явахгүй. Одоо барилга дээр ажиллах мэргэжилтэй боловсон хүчин байхгүй байна. Үнэхээр мэргэжлийн боловсон хүчнээр нь хангаж чадахгүй бол гаднаас өндөр мэргэжлийн цөөн тооны ажилчин авах хэрэгтэй. Үүнийг хүлээн зөвшөөрөх ёстой. Дээр нь хөдөлмөрийн хуулиа өөрчилж хүлээсэн үүрэгтэй болгох шаардлагатай.

 

      Мөн барилгын стандартуудын асуудал байна. Стандарт гэхээр барилгын салбар нь аль хэдийн хөгжчихсөн улс орны дүрмийг хуулаад боловсруулчихдаг. Дараа нь шалгалт ирээд барилгачдын усанд ордог газар хаана байна гэдэг. Тэрний оронд барилга дээр хүний аюулгүй ажиллах бололцоог хангах, зайлшгүй байх ёстой зүйлсийг нь тодорхой зааж өгөөд биелүүлээгүй тохиолдолд хариуцлага тооцдог байх хэрэгтэй. Өнөөдөр зарим барилга дээр техникийн нөхцөл өгөхгүй зөөврийн устай, тоггүй мотор асааж ажлаа хийж байгаа барилгууд зөндөө л байна. 

      

 

     Барилгын салбарт эмх замбараагүй байдал бий болчихсон байгаа нь үнэн. Үүнийг цэгцлэх нь төрийн үүрэг. Нэг үзүүрийг нь барьж аваад нөгөө үзүүрийг нь хаячихаж болохгүй. Барилгачид шулаачин, хулгайчид бүгдийг нь зогсоох хэрэгтэй гээд байна. Өнөөдөр үндэсний нийт бүтээгдэхүүний 17 гаруй хувийг бүтээж, ажиллах хүчний 20 гаруй хувь нь барилгын салбарт ажиллаж байна. Иргэдээ ажилтай байлгах нь төрийн үүрэг. Нэг юм хийх гээд нөгөөг нь хаяаад байж болохгүй.

 

 

     Шаардлага зөв тавиад хийх юм бол бүр хяналтаас гарчихсан асуудал биш. Үүнийг хийхэд олон зуун сая төгрөг шаардах ажил биш.

 

 

      Хариуцлагагүй хандаж байгаа асуудал их бий. Гэхдээ үүнийг нь чиглүүлж бодлогоор зангидаж, нөлөөлж байгаа хүчин зүйлийг нь засаж, арилгахгүйгээр шийдэгдэх асуудал биш.

 

 

 

 

 

   “Од мөнх” ХХК-ийн дэд захирал Дэлгэрмөрөн: Барилгачдыг хөдөлмөр аюулгүй ажиллагааны талаарх мэдлэгээр бүрэн хангах хэрэгтэй

 

 

    Ер нь жил бүр иймэрхүү осол аваар гардаг харин ил гардаггүй л байсан. Гарч байгаа осол аваар нь барилгад мэргэжлийн ачаа шилжүүлэх үеийн аюулгүй ажиллагаа хариуцагч байхгүй. Мөн крануудад засвар үйлчилгээ хийдэггүй, кранист нь мэргэжлийн бус өөрийн барьж байгаа краны даац үзүүлэлтийг мэддэггүй, краны тросс нь зориулалтын бус тросс байдаг зэргээс үүдэн ийм осол аваарууд гарч байна.

 

   Тухайн барилга дээр ажиллаж байгаа машин, тоног төхөөрөмжүүдийг байнга үзлэг шалгалтанд оруулж, хэрэгтэй засвар үйлчилгээг нь байнга хийж байх ёстой. Мөн тухайн барилгачдыг хөдөлмөр аюулгүй ажиллагааны талаарх мэдлэг мэдээлллээр бүрэн хангаж, сургалт явуулж мэргэшүүлэх, барилгын ачаа шилжүүлэх үеийн аюулгүй ажиллагааг хариуцах эзэнтэй байлгах нь аваар ослыг үндсэнд нь байхгүй болгох боломжтой.

 

  Барилгын салбарыг цэгцлэх зорилготой нийслэлийн засаг даргын гаргасан шийдвэрийн талаар ямар бодолтой байна вэ?

 

    Зөв зүйтэй шийдвэх болсон гэж үзэж байгаа. Гэхдээ “монголын хууль гурав хоног” гэдэг шиг эргээд хуучин байдалдаа орчихгүй байх л хэрэгтэй.