Францын барилгын салбарын стандартыг монголд нэвтрүүлнэ
Batsuh
ШУТИС-ын хурлын танхимд “Барилгын салбарын байгаль орчинд ээлтэй, тогвортой хөгжлийг хангах Францын туршалага” сэдэвт семинар зохиогдлоо. Тус семинарыг Монгол-Францын бизнес зөвлөл, Франц улсын элчин сайдын яам хамтран зохион байгуулсан бөгөөд БНФУ-аас Монгол Улсад суугаа Элчин сайд Ив Дөлүнэ, Улаанбаатар хотын захирагчийн ажлын алба, БХБЯам, барилгын чиглэлээр суралцаж байгаа оюутнууд оролцсон юм.
Семинарын үеэр Францын барилгын салбарыг танилцуулж, салбартаа дэлхийд тэргүүлэгч болгосон туршлагуудаас хуваалцсан юм. Тус улс Улаанбаатарын хот төлөвлөлт дээр хамтран ажиллаж эхлээд байгаа бөгөөд Франц улсын Засгийн газрын санхүүжилтээр Эрдэнэт хотын ус цэвэршүүлэх байгууламжийг засан шинэчилж байна. Мөн тус улс дэлхий дахинд Ногоон хууль буюу Эрчим хүчний хэмнэлттэй барилгын хуулийг амжилттай хэрэгжүүлж буйгаараа алдартай бөгөөд энэ тал дээр манай улстай хамтран ажиллахад бэлэн байгаагаа илэрхийлж байлаа. Мөн энэ үеэр Дэлхийн шилдэг 100 архитектурын компанийн 55 дугаарт бичигддэг Аркетайп групп Монголд салбараа нээсэн талаар мэдэглээ.
Семинарт оролцсон БХБЯ-ны Хот байгуулалт, газрын харилцааны бодлогын хэрэгжилтийг зохицуулах газрын дарга Ц.Баярбат Монгол Улс барилгын стандартаа олон улсын түвшинд хүргэхээр хууль эрх зүйн шинэчлэлийг хийж эхлээд байгааг энэ үеэр онцлон тэмдэглэсэн юм. Тиймээс цаашид манай барилгынхан олон улсын байгууллагууд, гадаадын барилгын компаниудтай хамтран ажиллахад тэр хэрээр дөхөм болох нээ.
тэмдэглэсэн: Б.Мөнхтуяа