Манай яам бие даан салбараа хариуцах БХБЯ болж гарч байгаа учраас энэ асуудалд их анхаарал хандуулж байна. Сайд ч энэ асуудалд онцгой анхаарч, олон ажлыг хийхээр төлөвлөөд эрчимтэй ажиллаж байгаа. Мөн шинэчлэлийн Засгийн Газрын бодлогыг хэрэгжүүлэх, шинэ бүтээн байгуулалт зорилтыг хэрэгжүүлэхийн тулд БХБЯ-ны гүйцэтгэх үүрэг өндөр байна. Тийм болохоор энэ салбарт хийх шинэчлэл, тулгараад байгаа бэрхшээл, асуудлыг арилгахад гар нийлсэн баг ажиллаж, шинэ шинэ зорилтуудыг дэвшүүлж олон асуудлыг шийдвэрлэх шаардлагатай байгаа юм.

 

      БХБЯ-ны сайдын барилга, барилгын материалын үйлдвэрийг шинэчлэхэд барьж байгаа эхний бодлого нь барилгын материалын үйлдвэрлэл, барилга угсралтын ажлыг улиралын нөлөөлөл, хамаарлаас гаргах зорилт тавьж байна.

 

      Монголын барилгын салбар хүйтний улиралд бүрэн зогсож байна. Үүнээс болж хөрөнгө санхүүгээр гачигдаж, дутагдах, ажиллагсад цалингүй завсардан хүлээх тэгээд ч мэргэжлийн ажиллах хүчнээ гадагш нь алдаж байна. Энэ нь барилгын ажлыг улирлын нөлөөллөөс гаргахад юуны өмнө материалын үйлдвэрлэлийг барилга угсралтын ажлаас түрүүлж хөгжүүлэх тодорхой чиг бодлогыг БХБЯ гаргаад Засгийн Газрын хэмжээнд тогтоол шийдвэр гаргуулах асуудал яригдаж тусгай коммис гарчихсан ажиллаж байна.

 

     Цаашдаа “Банк – Барилгын материалын үйлдвэрлэл – Барилга угсралтын байгууллага” гэсэн гурвалсан схемийн дор хөрөнгө санхүүгийн эргэлтийг зохицуулах судалгаа хийгдэж байна. Мөн бид өвлийн улиралд барилгын ажил хийгдэх боломжийг судлаж байна. Тухайлбал хуурай технологийн арга, зураг төсөлд нь тусгаж өгөөд угсармал хийцүүдийг эргэн ашиглах боломжтой гэх мэт.

 

     Сая сайд ажлын шугамаар барилгын материалын үйлдвэрүүдтэй танилцсан. Барилгын материалын үйлдвэрүүдийн үйл ажиллагаа сайн, захиалага ч их байдаг юм байна. Өнөөдөр хучилтын нүхтэй хавтанг 9м-ийн урттай үйлдвэрлэн гаргаж байна. Энэ бол орон зайн хувьд маш том төлөвлөлт. Үүнийг зураг төсөлд нь тусгаж өгөөд ашиглах бүрэн боломж бий.

 

      Харин хуучин хөдөөгийн барилгын байгууллагуудыг бүсчлэх тухай ярьдаг байсан. Олон жил ярьсан боловч ямар ч үр дүн гарсангүй. Энэ тал дээр манай яамны барьж байгаа шинэ бодлого нь хөдөө хаана, аль аймагт барилгын материалын ямар үйлдвэрийг барих вэ? тэр дундаа цемент, арматурын үйлдвэрлэлээ түлхүү хөгжүүлэн, дотоодын хэрэгцээгээ яаж хангах вэ? гэдгийг судлаж, анхааран ажиллаж байна.

 

      2014 онд гэхэд Монгол Улс цементийнхээ хэрэгцээг дотоодоосоо бүрэн хангах боломжтой болно. Харин арматурын хэрэгцээг бүрэн хангаж арай чадахгүй. Бид бүгдийг бодлогоор зохицуулах гэж ярьж, арга замыг нь судлаж байна.

 

 

      Манай улсын барилгын салбарт үүсээд байгаа нэг чухал асуудал мэргэжилтэй ажилчдыг бэлтгэх, тогтвортой ажиллуулах асуудал. Энэ талаар сайд тодорхой бодлого барьж, бусад яамдуудтай хамтран ажиллах чиглэлээр ажил хэрэгч алхмууд хийгдэж байна.

 

     Манайд мэргэжлийн сургалт үйлдвэрийн төвүүд /МСҮТ/ шинээр байгууллагдаж мэргэжилтэй боловсон хүчин бэлтгэгдэн гарч байгаа ч төгсөөд барилгын салбарт тэд бүрэн ажиллахгүй байна. Бид зүгээр л хүүхдүүдийг цалинтай сургаад л өнгөрдөг байдалтай болчихож. Тийм учраас аргагүйн эрхэнд монголын барилгын зарим компаниуд хятад ажилчдыг түр хугацаагаар авч ажиллуулдаг. Үүнийг буруутгаж болохгүй. Хятад ажилчид цутгамал технологийг монгол ажилчдаас 5 дахин хурдан хийж байна. Бид үүнээс суралцах хэрэгтэй. Мөн барилгын бусад засал чимэглэл, угсралтын ажил дээр монгол ажилчдаа ажиллуулах, мэргэшүүлэх, сурахад нь хөнгөлөлт үзүүлэх гэх зэрэг ажлуудыг хийх төлөвлөгөөтэй байна.

 

      Хамгийн гол нь өвлийн улиралд материалын нөөцийг бэлтгэж чадах хэмжээний хөрөнгийн нөөцтэй болгох, банкнаас зээлийн эх үүсвэрийг бий болгох асуудлыг л ярьж байгаа. Манайд орчин үеийн техник технологитой үйлдвэрүүд олноор байгуулагдсан байна. Америк стандартад шилжсэн бетон зуурмагын үйлдвэрүүд хүртэл байна. Бид ийм үйлдвэрүүдийг төрөөс дэмжих ёстой. Гэхдээ хамгийн гол дэмжлэг өвлийн улиралд эргэлтийн хөрөнгөөр дутаахгүй байх асуудал. Эргэлтийн хөрөнгийн асуудлыг БХБ-ын сайд идэвхтэй хөөцөлдөж, тодорхой үр дүн гарах хувилбарт хүрч байгаа.

 

     Мөн манайд үүссэн нэг сөрөг тал нь карьерийн аж ахуйнууд байгаль орчинг ихээр сүйтгэж байна. Бид бүхэн Түргэний гол, Туул голын сав газраар явж, судлаж үзсэн. Ихэнх нь гадаадын эзэмшилтэй газрууд байдаг юм байна. Үнэхээр голын ай сав газруудыг “сэглээд” дуусч байна. Харин монголын зарим нэг компаниуд “эх оронч” байдлаар хандаж дайрга үйлдвэрлэж байна. Бусад компаниуд нь голын хайрга савладаг.

 

      Тиймээс энэ байдлыг цэгцлэх зорилгоор Улаанбаатар хотын засаг даргын тамгын газартай санал бодлоо солилцож, санамж бичигт гарын үсэг зурсан. Энэ санамж бичигт карьерийн аж ахуйг цэгцлэх, барилгын материалын үйлдвэрлэлүүдийн бүсийг тодорхойлох, тээвэр ложистикийн асуудлыг шийдэх гэх зэрэг олон асуудалд БХБЯ, Улаанбаатар хотын захиргаатай тохиролцож байр сууриа нэгтгэж чадсан. Ирэх оноос хэрэгжиж эхлэх боломжтой.

 

      Шинэчлэлийн Засгийн газраас гаргасан бүтээн байгуулалтын хөтөлбөрүүд бүгд БХБЯ-тай холбоотой учраас эрч хүчтэй ажиллаж, шинэ дэвшилтэт техник технологиудыг барилгын салбарт нэвтрүүлэх, шаардлагатай хөрөнгө санхүүгийн тусламж үзүүлэх гээд бүх талаар нь барилгын компаниудаа дэмжин ажиллахын тулд ихээхэн анхаарч байна.   

Та ярианы эхэнд намайг ажлаа аваад удаагүй байгааг онцолсон. Тэр үнэн. Иймээс ажлынхаа эхлэлийг дурьдахад ийм байна.

     Танай сайтаар дамжуулан нийт барилгачдаа хандаж, барилгын салбарынхаа хөгжил дэвшилд хувь нэмрээ оруулахад хамтран идэвх зүтгэл гаргаж ажиллацгаая гэж уриалан тэдэнд эрүүл энх, ажлын амжилт хүсье дээ.