Барилгын салбарт болж байгаа үйл явдал, Улаанбаатар хотод ашиглалтанд орох гэж байгаа болон орсон шинэ орон сууц, хуучин орон сууц, орон сууцны үнийн талаарх шинэхэн мэдээлэлтэй “Барилга.МН”  сэтгүүлийн 12-р сарын дугаар худалдаанд гарлаа.

    Шинэхэн дугаараас уншигч та бүхэн орон сууц худалдан авахаар төлөвлөж байгаа бол Улаанбаатар хотод 2013, 2014 оны I, II, III, IV улиралд хаана ямар орон сууц ашиглалтанд орохыг нэг дороос мэдэх боломжтой. Мөн орон сууцны зах зээлийн судалгаа, мэдээллийг “Барилга.МН” сэтгүүлийн 12-р сарын дугаараас уншаарай.

Мэдээ мэдээлэл

  Төрийн ордонд “Барилгын салбарын хөдөлмөрийн аюулгүй байдал, эрүүл ахуйн хяналтын тогтолцооны шинэчлэлт” сэдэвт үнэдсний зөвлөгөөн болж өнгөрлөө. Энэхүү зөвлөгөөнд Барилга Хот Байгуулалтын Яамны сайд Ц.Баярсайхан, БХБЯ-ны Төрийн нарийн бичгийн дарга Р.Эрдэнэбүрэн, “ХАБЭА-н Гурван талт үндэсний хороо”-ны дарга, Хөдөлмөрийн яамны төрийн нарийн бичгийн дарга Б.Ганцэцэг, Нийслэлийн Засаг даргын Барилга хот байгуулалт дэд бүтцийн асуудал хариуцсан орлогч Н.Гантөмөр, МАОЭНХ-ны гүйцэтгэх захирал Х.Ганбаатар нар оролцлоо. Зөвлөгөөнөөр БХБЯ-наас салбарын хэмжээнд авч хэрэгжүүлж байгаа ажлын талаар болон барилгын талбай дээр гарч буй осол аваарыг бууруулахад зориулсан “цэнхэр карт” хөтөлбөрийг санаачлан судалгааны шатандаа явж байгааг дуулгасан юм.

Идэвхтэн бичигч

  Манай орны барилгын салбарт ямар шинэчлэлт хэрэгтэй байна вэ? Барилгын материалын үйлдвэрлэл, импортоос авахуулаад хөдөлмөрийн аюулгүй ажиллагааны норм дүрэм, барилгын машин механизм тэдгээрийн түлш, ажиллах хүчин гээд энэ салбарт шийдэх асуудал маш олон.

Барилгын салбарыг шинэчлэх нь зайлшгүй шаардлагатай бөгөөд үүнийг тус салбарынхан нийтээрээ нэгэн дуугаар хөдөлж, хэлэлцүүлэг, уриалга, санаа бодлоо уралдуулж байж засч, залруулах хэрэгтэй. Салбарын шинэчлэл зөвхөн тухайн салбарт ажиллаж буй төрийн болон төрийн бус мэргэжлийн байгууллагууд, салбарын хэсэг бүлэг аж ахуйн нэгжүүдийн хийчих асуудал хэрхэвч биш юм. Үүнд эрчим хүч, зам тээвэр, уул уурхай, эрх зүй гээд бусад бүх салбарын асуудал нөлөөлдөг учир бүгд анхаарч оролцох хэрэгтэй.

Асуудал хөндсөн сэдэв

     Сүүлийн жилүүдэд барилгын салбарт болж бүтэхгүй, зарим тохиолдолд хүний санаанд оромгүй зүй бус хандлага гарч байгааг хэн бүхэн мэдэж байгаа. Үүнд хэн буруутай вэ? Усны булингарыг эхнээс нь цэвэрлэдэг шиг барилгын салбарт болж бүтэхгүй бүхний учир шалтгааныг олох учиртай. Зөвшөөрөлгүй баригдсан барилгыг шууд нураах гээд дайрах биш, яагаад ийм барилга баригдчихав, барьж байхад нь “болохгүй” гэдгийг нь хэлээгүй юм гэх мэт учир шалтгааныг нь эрэх ёстой. Өөрөөр хэлбэл, энэ бүхний цаана Төр засаг буруутай гэж шууд хэлмээр байна. Энэ бол замбараагүй Төр засгийн зангараггүй байдлын л илрэл.

Монголд үйлдвэрлэв

   Манай улсад вакум цонх хаалганы үйлдвэрлэл эрчимтэй хөгжиж, олон улсын технологийн хөгжилтэй мөр зэрэгцэн алхах боломж бий болсон. Монгол шиг эрс тэс уур амьсгалтай оронд хаалга цонхны чанарын асуудал туйлын чухал. Тиймээс цонх хаалганы чанарт нөлөөлж байсан техникийн асуудлуудыг шийдвэрлэж, ахиц дэвшил гаргаж байгаа “Fensterbau construction” ХХК-ийн үйл ажиллагааг энэ удаад танилцуулах болно.

Тус үйлдвэр цонхны бэлдэцээ Хятадад байрлах Канадын үйлдвэрээс авдаг бөгөөд өмнөд хөршид үйлдвэрлэсэн цонхнуудаас хавьгүй чанартай, хямд үнэтэй бүтээгдэхүүнийг хэрэглэгчиддээ хүргэдэг юм байна.

Дуулгах мэдээ

 Их эзэн Чингис хааны бичгийн сайд Тататунгаагийн номын өргөө буюу 13-р зуун цогцолборын “Номын Өргөө”-г энэ удаагийн дугаартаа танилцуулж байна. Монголчууд бид эртнээс уламжилж ирсэн зан заншил, өв уламжлал, түүх соёлтой ард түмэн хэдий ч хотшиж суурьшихын хэрээр үүнийг мартаж гээх тохиолдол гарах нь элбэг болжээ. Тиймээс бид түүх соёлынхоо нэгээхэн хэсэг болох бичгийн соёлоос хүргэхээр 13-р зуун цогцолборт саатсаныг та бүхэн уншаарай.

Факт ньюс

  Энэ дугаарын Факт ньюс буланд барилгын тусгай зөвшөөрлийг тойрсон асуудлуудыг хөндлөө.

   Интернэт, сонин хэвлэлээр “Барилгын тусгай зөвшөөрөлтэй компани авсан зөвшөөрлөө зарна, худалдаж авна, гаргуулна” гэх зар чөлөөтэй гарах болжээ. Ингэхэд барилгын тусгай зөвшөөрөл гэдэг тэгж амархан зарж борлуулдаг эд үү?

  “Тусгай зөвшөөрлийг наймаалцвал тухайн зөвшөөрлийг хүчингүй болгоно” гэж Барилгын Хөгжлийн Төвийн гүйцэтгэх захирал Б.Отгончулуун мэдэгдэж байна.

Орон сууцны үнэ ханшийн судалгаа

  Шинээр баригдаж буй орон сууцнаас хамгийн өндөр үнэтэй нь Хан-Уул, Сүхбаатар дүүргүүдийнх бөгөөд эдгээр дүүрэгт дундаж үнэ 2 300 000-2 450 000 хооронд байна. Үүний шалтгаан нь эдгээр дүүрэг хотын төвд оршдог, дэд бүтцэд холбогдсон, агаарын бохирдол багатай зэргээс шалтгаалж байгаа юм.

  2012 оны 12-р сарын байдлаар шинэ орон сууцны 1 кв.метрийн үнэ 1 900 000 төгрөг байгаа нь өнгөрсөн оны мөн үеийнхээс 26%-иар өссөн үзүүлэлт юм.

    Орон сууцны үнэ ийнхүү өсөхөд байршил, дэд бүтцээс гадна импортын барилгын материалын үнэ ихээхэн нөлөөлж байгааг эндээс уншиж танилцана уу.

Үнэ ханш

 “Барилга.МН” сэтгүүл дугаар бүртээ Улаанбаатар хотын дүүргүүдэд баригдаж буй шинэ орон сууцны үнэ ханшийг танилцуулдаг уламжлалтай. Хүйтний эрч чангарсан энэ үед та бүхний сонирхож буй шинэ орон сууцны үнэ өөрчлөгдсөн эсэхийг та энэ дугаараас үзэж сонирхоорой.