Нью Йорк, Дубай, Шанхай... Эдгээр хотыг нэгтгэдэг ганц томруун зүйл нь тэнгэр баганадсан барилгууд... Толгой эргэм өндөр барилга бол орчин үеийн хотын нэрийн хуудас. Гэвч анхны өндөр барилгууд Америк юм уу, Европт биш чухам Азийн цөлд үүссэнийг тэр бүр хүн мэдэхгүй. Йемений Шибам хотыг “дэлхийн хамгийн ахмад тэнгэр баганадсан хот” буюу “цөлийн Манхэттен” гэж нэрлэдэг билээ.

Энэ хотын хамгийн гол онцлог нь энд дэлхийн хамгийн анхны тэнгэр баганадсан барилга буюу 30 метртэй байшингууд баригдсанд оршино. Өндөр барилгуудыг шавар тоосгоор бөөр бөөрөөр нь шахцалдуулан барисан учраас цайз мэт байгууламж болжээ. Энэ хот руу одоо ч гэсэн зөвхөн ганц л дааман хаалгаар орж болдог нь Шибан эрт дээр цагт нутгийн ардыг нүүдэлчдээс хамгаалдаг бэхлэлт байсныг нь гэрчлэнэ.

Ихэнхи барилгыг 16-р зуунд барисан ч өнөөг хүртэл үүргээ гүйцэтгэсээр. Өнөөдөр энэхүү архитектурын гайхамшигт дурсгалыг Юнескогийн Дэлхийн өвийн хөтөлбөрт багтаасан бөгөөд жуулчид 6-11 давхар бүхий 500 байшинг сонирхож болно. Тэдний давхар болгонд нэг л гэр бүлд зориулсан сууц байрлана. Эхний давхарт цонх байхгүй, үр тарианы агуулах, малын хороо байх жишээтэй. Дунд хавьд нь зочдын хэсэг, дээшээгээ бол гал тогоо, унтлагын өрөөнүүд байна. Ихэнхи байшингууд хоорондоо хүзүүвчээр холбогдсон нь эрт дээр цагт дайны үед харилцаа холбооны үеэр хэрэглэгдэж байжээ. Харин өнөөдөр бол олон шат өгсөхөөс түвэгшээсэн настайчуудад энэ нь тун их тусаа өгч байгаа юм.

Хотод одоогоор 7000 гаруй хүн амьдарч байна. Цаг хугацаа Шибамыг тун бага өөрчилсөн нь гайхалтай. Зуу зуун жилийн өмнө хийсэн өнгөлгөөний цагаан будаг одоо ч гэсэн цасан цагаанаараа л байна. Шинэ эриний бүдэг ул мөр нь шавар ханан дээрх тавган антенн, агааржуулагч төдий зүйлс...

                                                                                                                                                News.mn