Стандартчилал, хэмжил зүйн газрын дарга Г.Гантөмөр Үл эвдэх сорилтын Монголын нийгэмлэгт “Үл эвдэх сорилтын ажилтны баталгаажуулалт”  явуулах гэрчилгээг өчигдөр гардууллаа.

Ингэснээр Үл эвдэх сорилтын Монголын нийгэмлэг нь Монгол улсад  ISO/ IEC 17024: 2003 (MNS ISO/ IEC 17024:2004) стандартын шаардлагыг хангаж итгэмжлэгдсэн анхны Ажилтны баталгаажуулалтын  байгууллага болж байгаа юм.

Тус Ажилтны баталгаажуулалтын байгууллага нь Үл эвдэх сорилтын Үйлдвэрийн радиографи, Соронзон бөөмийн аргаар I, II, III  түвшинд, Хэт авианы шалгалт, Шингэн нэвчүүлэх сорилт, Хуйларсан гүйдлийн  I, II  түвшинд үл эвдэх сорилт, шалгалт, техникийн хяналт  хийх мэргэшсэн ажилтан, инженер-техникийн ажилтнуудыг анхдагч болон давтан баталгаажуулах, магадлан хяналт тавих үйл ажиллагааг  явуулна.

Үл эвдэх сорилт бол аж үйлдвэрийн бүх салбар (төмөр зам, нисэх, эрчим хүч, барилга, уул уурхайн)-ууд дах чанарын шалгалт ба техникийн оношлогооны технологи юм.
 
Үл эвдэх сорилт нь хэдийгээр цаг хугацаа, хөрөнгө мөнгө хэмнэдэг хэдий ч үр дүн нь сорилтыг гүйцэтгэгчийн ур чадвараас ихээхэн шалтгаалдаг учраас түүний ур чадварыг үнэлэх, баталгаажуулах нь ихээхэн ач холбогдолтой.

 “Үл эвдэх сорилт-Ажилтны мэргэшүүлэлт ба баталгаажуулалт” стандартын шаардлагыг хангаж итгэмжлэгдсэнээр:

-    Монгол улсад их бүтээн байгуулалт өрнөж байгаатай холбогдон  үл эвдэх сорилтын ажилтны хэрэгцээ их байгаа өнөө үед ажил олгогчдыг олон улсын стандартын түвшинд мэргэшсэн, ур чадвараа тогтоолгож баталгаажсан үл эдвэх сорилтын үндэсний мэргэжилтнээр хангах; ( Жишээ нь: Оюутолгой төсөлд үйлдвэрийн ажиллагаа эхэлснээс хойш 5 жилийн дараа инженер-техникийн ажилтны 50-аас, 10 жилийн дараа 70-аас дээш хувийг Монгол ажилтнаар бүрдүүлнэ гэсэн заалт байгаа.)

-    Бүс нутагт болон Олон улсад  энэ тогтолцоогоо хүлээн зөвшөөрүүлэх, улмаар  олон улсад хүлээн зөвшөөрөгдсөн, үл эвдэх сорилтын өндөр ур чадвартай Монгол ажилтан, инженер-техникийн ажилтнууд бэлтгэгдэх эхлэл тавигдах ач холбогдлыг бидэнд олгож байна.

Стандартчилал, хэмжил зүйн газар