Хөтөлийн "Цемент-Шохой"ХК-ийн гүйцэтгэх захирал А.Шоовдор: Хөтөлийнхөн 4 сая тонн цементээ үйлдвэрлэн гаргалаа
Batsuh
Зэрвэс сонсоход4 сая гэсэн тоо, эрэгцүүлж, харьцуулаад бодохоор их тоо гарч байна шүү. Танд болон Танай хамт олонд баяр хүргэе.
Баярлалаа. "Барилга.МН" сэтгүүл мэргэжлийн байгууллагууд болон хэрэглэгчдэдээ тун хэрэгцээтэй мэдлэг, мэдээлэл байнга өгч байдаг сэтгүүл, сүүлийн үед нийтлэл болон хэвлэлийн чанар улам ч сайжирч байгааг бид бас анзаарч явдаг, Та бүхэнд ч бас баяр хүргэе.
Баярлалаа. Ер нь Хөтөлийн цементээр олон барилга, байгууламж баригдсан байгаа, томоос нь тоймлон хэлбэл...
Улаанбаатар хотын 1, 3, 4, 10, 11, 13-р хороолол, Маршалын гүүр, "Москва", "Орчлон" хороолол, "Жигүүр гранд"-ын цогцолбор, "Чингис" зочид буудал, "Чингис" нисэх онгоцны буудлын өргөтгөл, Монгол бөхийн өргөө, Дархан, Эрдэнэт, Багануур, Шивээ-Овоогийн орон сууцны хорооллууд, Засгийн газрын өргөтгөл, Тусгаар тогтнолын ордон, мянганы замын гүүр, үерийн усны хоолой байгууламжууд, УБТЗ-ын төмөр бетон дэрний үйлдвэрийн бүтээгдэхүүнүүд гээд олон доо, олон.
Төвлөрсөн хот, суурингаас гадна хөдөө орон нутгийн дэд бүтэц - барилга байгууламж, орон сууц, төмөр зам, авто замыг хөгжүүлэх бодлого түлхүү тавигдах боллоо. Үйлдвэр үүнд ямар бодлого, төлөвлөгөө барьж байна даа?
Бид одоо, улсынхаа цементийн хэрэглээний 20-30%-ийг хангаж байна. 2013 оны сүүлээр хуурай аргын шинэ технологийн үйлвэрийг ашиглалтанд оруулахаар урин дулааны энэ үед цаг мөчтэй уралдан өдөр шөнөгүй ажиллаж байна. Энэ үйлдвэр ашиглалтанд орсноор Засгийн Газрын 100'000 айлын орон сууц, гэр хорооллыг орон сууцжуулах хөтөлбөр, уул уурхайн салбарыг дагасан төмөр зам, авто замын олон ажилд бидний оролцоо улам нэмэгдэнэ. Энэ ч утгаараа бид хөдөө орон нутаг болон бүсийн хөгжилд хувь нэмрээ оруулах нь ойлгомжтой. Улсаас бодлого болгон жаахан дэмжээд өгвөл манай Хөтөлд барилгын материалын олон үйлдвэрүүд баригдах боломжтой гэж бид ойлгодог.
1990 - ээд оноос хойш зах зээлийн эдийн засагт шилжих шилжилтийн хүнд үеүүд, 2008, 2009 оны дэлхийн эдийн засгийн хямрал гээд олон хямрал, бэрхшээлийн үед Хөтөлийн үйлдвэр хөл дээрээ зогсож тэсэж гарсан туршлагаасаа сонирхуулахгүй юу, нууц биш бол?
Юун нууц байх вэ. (инээв) Харин ч манай хамт олны гол бахархаж явдаг сэдвийг асуулаа. Манайх цементийн 2 зуухтай, 90-ээд оноос хойш, зах зээлгүй, борлуулалт муудаж 1 зуухаа зогсоолоо. Нөгөө зуухаа ажиллуулж байтал байсхийгээд л эвдэрнэ. 1983 онд ашиглалтанд орсон үйлдвэрийн сэлбэг хэрэгсэл олдоц бага, өртөг өндөр, тэгээд л нөгөө зуухныхаа эд ангийн салгаж болох бүх л эд ангийг салгаж зөөсөөр бүр тоногдож 2008 онтой золгосон. Энэ үед барилгын салбарын ажил жаахан сэргэж, цементийн хэрэгцээ ч өсөх хандлагатай боллоо. Тоногдсон зуухаа сэргээх санаатай ийш тийшээ хөөцөлдсөн чинь олдоц багатай сэлбэг хэрэгслийн үнэ өндөр, орос ах нараар тавиулахаар өртөг өндөр гээд тэр үедээ л тэвдүүлсэн баахан ажил ундарч байсан.
Ингээд үйлдвэр эрхэлсэн захирал Д.Баатаржаваар ахлуулсан хэдэн шижигнэсэн идэр насны инженер техникийн ажилтнууд маань хэдэн туслах ажилчдаа аваад 14 жил зогссон зуухаа ажилд оруулахаар ханцуй шамлан өдөр шөнөгүй "нухсаар" 4 сарын дотор зуухаа босгоод ирлээ. Босгох босгохдоо, тэр үеийн Оросын технологиор бус орчин үеийн шийдэл бүхий тоног төхөөрөмж, технологитой хослуулж босгосон нь одоо хүртэл хэвийн сайхан ажиллаж байна. Харин хүнд хэцүү үед ажиллаж байсан нөгөө ганц зуухаа энэ зун их засварт оруулаад гаргах гэж байна.
Үйлдвэрээ үр ашигтай ажиллуулах бас нэг хөшүүрэг нь "Бага зардлаар чанартай бүтээгдэхүүн үйлдвэрлэе" уриан доор зардлын тайлангийн хурал хийж, цалингийн тарифыг интервалтай болгож, цех нэгжийн ажиллагсдын цалин хөлс, шагнал урамшлыг тухайн цех нэгжийн зардлын хэмнэлттэй шууд холбон дүгнэсэнээр хүн бүр зардлаа хэмнэх хүсэл эрмэлзэлтэй болж бүтээгдэхүүний өртгийг бууруулж, ашигтай ажилласан явдал юм.
Мөн ажилтан цагаа бүртгүүлсэн л бол цалин авдаг тогтолцоог өөрчилж, хүний хөдөлмөрийн оролцоог бүтээгдэхүүн үйлдвэрлэлийн хэмжээтэй шууд холбож өгсөний үр дүнд 2009 онд 151.000, 2010 онд 220.000, 2011 онд 280.000 тонн цемент үйлдвэрлэсэн ашигтай ажиллалаа.
Мөн цементийн чанарт онцгой анхаарч, улсын итгэмжлэгдсэн өөрийн лабораторитой болж PC52.5 ангиллын бат бэх, өндөр чанартай цемент үйлдвэрлэн гаргаж байна. Ийнхүү өртөг, зардлаа бууруулж, бүтээгдэхүүн үйлдвэрлэлтээ нэмэгдүүлснээр, 2004 онд 2,1 тэрбум төгрөгийн алдагдалтай ажиллаж байсан үйлдвэр маань одоо 2011 онд бүр эсрэгээрээ 2,4 тэрбум төгрөгийн цэвэр ашигтай ажиллаж байна.
Өөр шинээр ямар ажлууд хийж байна даа
Тоочвол ч тоолж баршгүй л дээ.(инээв) Товчхон хэлэхэд урьд нь бид үйлдвэрээ яаж зогсоочихгүй байх вэ? яаж хувьчлуулахгүй байх вэ? ажилчдаа яаж цалинжуулах вэ? гээд олон болох болохгүй асуудлын ээдрээнд замнаж, одоо энэ бүхэн ард хоцорч.
Одоо үйлдвэрийнхээ техник технологийг өөрчлөх, орчин үеийн үйлдвэрийн ажилтан, ажилчдын зиндаанд хүрч ажиллах, хөрвөх чадвартай мэргэжилтэн бэлтгэх, мэргэжүүлэх, мэргэшүүлэх, хөдөлмөрийн аюулгүй байдал, эрүүл ахуй, чийрэгжүүлэлт, нийгмийн асуудал гээд олон ажлыг жигд хийхээр төлөвлөж байна даа.
Ганц хоёр жишээ хэлэхэд, 2011 оны шинэ жилээр ажилчдынхаа нийгмийн асуудлыг баталгаажуулахад анхаарч хүн тус бүрт 800.0-1.0 сая төгрөгийн урамшуулалт хадгаламж нээн шагналаа. Ашиглахгүй шахуу байсан хуучин захиргааны байрыг иж бүрнээр нь засаж тохижуулан ажилчдын “Эрүүл ахуй-чийрэгжилтийн төв”-ийг ашиглалтанд өглөө. Энэ төв нь урьдчилан сэргийлэх иж бүрэн үйлчилгээ үзүүлэх зорилготой.
Үйлдвэр ийм сайхан болж, үйлдвэр дагасан хот маань хэр хөгжиж байна?
Үйлдвэрээ дагаад хотын маань амьдрал өргөжиж байгаа. Ажилчид маань, ажилтай, цалинтай, байртай, гэртэй, гэрэлтэй, дулаантай, соёл ахуй үйлчилгээ, төрийн болон төсөвт байгууллагууд хэвийн ажилаж байна. Ганц асуудал бол дулааны асуудал.
Манай үйлдвэр дулааны станцаа хариуцан ажиллуулж, үйлдвэрлэсэн дулааныхаа 34%-ийг төрийн болон төсөвт байгууллагад, 38%-ийг Хөтөлийн оршин суугчдын халаалтанд, 3%-ийг бусад аж ахуйн нэгжүүд, үлдсэн 25%-ийг манай үйлдвэр ашигладаг. Хөтөл хотын хэрэглэсэн энэ дулааны зохих хувийн алдагдлыг бид хариуцан төлсөөр ирсэн.
2010 онд 783 сая төгрөгийн дотацийг Засгийн газар шийдсэнээс бусад бүх он жилүүдийн алдагдлыг бид үүрч явлаа. Байгуулагдсанаасаа хойш 6 тэрбум төгрөгийн алдагдал гараад байна. 2011 он гэхэд 1,6 тэрбум төгрөгийн алдагдалтай. Хөтөл хот өнөөдөр дулаан амгалан аж төрж байгаагаа үйлдвэрийн маань хүч хөлс шингэсэн хөдөлмөрийн үр дүн гэдгийг харин сайн ойлгож байдагт бид баярлаж явдаг.
Улсын болон барилгын салбарын томоохон томоохон шагналуудад Хөтөлийн цемент шохойн компанийн нэр байнга дуулдаж байдаг
Үнэхээр тийм шүү. МҮХАЖҮТ-аас жил бүр олгодог шилдгийн шилдэг аж ахуйн нэгж байгууллага шалгаруулах “ТОП-100” шагналыг 2005 оноос одоог хүртэл Монголын Үндэсний шилдэг 99 бүтээгдэхүүн шалгаруулалтанд “Үлэмжийн чанарын батламж”-ийг 3 удаа, Монгол улсын барилгын шилдэг 10 байгууллагын нэгээр 3 удаа, Шилдэг материал үйлдвэрлэгч компаниар 4 удаа шалгарсан гээд олон шагнал, өргөмжлөлийг авсан байна.
Одоо манай үйлдвэрт барилгын гавъяат ажилтанэ Ц.Сампилгоров, аж үйлдвэрийн гавъяат ажилтан Т.Цоодол нараас гадна “алтан гадас одонтой 7, хөдөлмөрийн гавъяаны улаан тугийн одонтой 5 хүн байна. энэ дашрамд хэлэхэд манай үйлдвэр байгуулагдсаны 30 жилийн ой 2013 оны сүүлээр болно.
Цаг зав гарган ярилцлага өгсөн Танд баярлалаа. Сүүлийн хэдэн мөрийг танд үлдээе.
4 сая тонн цемент үйлдвэрлэх хүртэл энэ хугацаанд манай хамт олон их олон даваа давсан. Үйлдвэрээ өдий зэрэгтэй авч явахад манай баг хамт олон, үйлдвэрээ гэсэн эгэл жирийн ажилчдын хөлс хүч, үйлдвэрээ дагасан хотын иргэдийн сэтгэл зүтгэл бүгд нийлж ийнхүү амжилтанд хүрсэнийг харахад үнэхээр сайхан байна. Хамт олон та бүхэндээ аж жаргал, сайн сайхныг “Барилга.МН” сэтгүүлээр дамжуулан дахин илэрхийлье. Баярлалаа.