Хаягдал цаасаар тоосго үйлдвэрлэх боломжтой
Batsuh
Испанийн Хаений их сургуулийн судлаач, эрдэмтдийн баг хаягдал цаасаар тоосго бүтээх байгаль экологид тустай технологи гаргаад байна. Ингэхдээ тоосгыг цаасны үйлдвэрийн дайвар бүтээгдэхүүн болгон бүтээх гэнэ. Хаягдал цаасаар тоосго бүтээснээр энгийн тоосготой харьцуулахад богино хугацаанд, бага өртгөөр бүтээгдэхүүн үйлдвэрлэх боломж бүрдэх юм.
Цаасны үйлдвэрийн хаягдлыг хэрэглэсэн уснаас шүүн авч цавуутай холин нэгэн цул урт тоосго болгоно. Дараагаар нь зайдастай төстэй энэхүү материалыг тоосгоны хэмжээгээр хуваагаад зууханд шатаана. Энгийн тоосгыг бодвол цаасаар хийсэн тоосгыг зууханд шатаахад бага хугацаа зарцуулах юм байна.
Хэдий энэ технологи байгальд ээлтэй, хямд төсөр ч гэлээ чанарын хувьд энгийн тоосгоноос муу байгаа нь судлаачдын шийдвэрлэх гол асуудал болоод байна. Үүнээс гадна цаасны хаягдлаар хийсэн тул өндөр хэмд шатаахад хэлбэр дүрс нь тааруу болдог талтай гэнэ.
Судалгааны багийнхан цаашид энэ тоосгыг улам бат бөх болгохын тулд ажиллаж байгаа бөгөөд пивоны шаар, олив, био түлш зэрэгтэй хольж чанарыг нь сайжруулах туршилт хийх аж.