УОЛТ ДИСНЭЙН КОНЦЕРТЫН ТӨВ
Batsuh
Калифорни мужийн Лос Анжелес хотын төвд Уолт Диснэйн Концертын Төв оршдог бөгөөд энд Лос Анжелесийн Филармони оркестр болон Лос Анжелесийн Найрал дууны хамтлаг байрладаг.
Уолт Диснэйн урлагт оруулсан хувь нэмрийг хүндэтгэж, түүний бэлэвсэн гэргий Лилиан Диснэй 1987 онд энэ төвийг байгуулахаар суурийг нь тавьжээ. Барилгын загварыг архитектор Фрэнк Гэри бүтээсэн бөгөөд концертын төв 2003 оны 10-р сарын 24-нд нээгдсэн юм байна.
Лилиан Диснэй концертын төвийн барилгын ажилд зориулж 50 сая ам.доллар хандивласнаар барилгын ажил эхэлсэн бол 1991 онд барилгын зураг төслийг архитектор Фрэнк Гэри хийж дуусчээ. Барилгын доор байрлах авто зогсоолыг л гэхэд 110 сая ам.доллараар байгуулахдаа Лос Анжелес хотын захиргаанаас гаргасан бондын хөрөнгөөр санхүүжүүлсэн байна. Харин концертын төвийн барилгыг 1994-1996 оны хооронд хандив цуглуулж барьсан юм. Барилгын ажилд анх баталсан төсвөөс илүү хэмжээний мөнгө шаардлагатай болсон тул нэмж хандив цуглуулахаас аргагүйд хүрчээ. Төсвийн асуудлаас болоод зарим зүйлсийг өөрчлөх хэрэгтэй болсны нэг нь барилгын гадна засал байв. Анх барилгын гадна талыг чулуугаар хийхээр төлөвлөж байсан ч мөнгөө хэмнэх үүднээс зэвэрдэггүй ган төмөр гадаргуугаар хийжээ.
Хотын удирдлагууд бондын төлбөрийг авто зогсоол түрээслэгчдээс олох мөнгөөр төлөхөөр төлөвлөжээ. 2003 онд барилга ашиглалтанд ороход нийт 274 сая ам.долларын хөрөнгөөр бүтсэн тоооцоо гарчээ. Барилга барихад шаардлагатай мөнгийг хүмүүсээс хандиваар цуглуулсан бөгөөд Диснэйн гэр бүлийнхэн л гэхэд 84,5 сая, Волт Диснэй компани 25 сая ам.долларыг тус тус хандивлажээ.
Барилгын ажил дууссаны дараа гадна тохижилтын ажил эхэлсэн байна. Барилгын гадна талын ихэнх хэсгийг зэвэрдэггүй ган төмрөөр хийсэн бол Хүүхдийн Амфитеатр болоод Үүсгэн байгуулагчдын Өрөөний гадна талыг толин хавтангаар гадарлажээ. Үүнээс болж тэр хавийн зарим оршин суугчид дэндүү их гэрэл өөрсдийнх нь байр руу ойн тусч байгаа талаар гомдол гаргасан бол гадаргууд ойсон гэрлээс болж тухайн хэсэгт авто машины осол гарах нь хэт ихэссэн судалгаа гарсан байна. Хүмүүсийн зүгээс удаа дараа гаргасан эдгээр гомдлоос болж гадаргууг өөрчлөх саналыг барилгын эзэд Гэри Партнэрс компанид тавьжээ. 2005 онд толин хавтангуудыг бүрзгэр хавтангуудаар сольсноор энэ асуудлыг шийдсэн гэнэ.
Тоглолтын танхимын тайзан дээр маш том хэмжээтэй орган хөгжмийг бүтээн байгуулсан байдаг. Орган хөгжмийн загварыг Фрэнк Гэри дууны дизайнер Мануэл Розалесийн зөвлөгөөг даган гаргасан юм. Гэри анхнаасаа хөгжмийг тун өвөрмөц загвартай бүтээхээр оролдож байв. Тэр гаргасан загваруудаа Розалест үзүүлж түүний зөвлөгөөг сонсож байлаа. Гэригийн эхний загварууд ер бусын байсан ч төдий л хэрэгцээний бус байжээ. Тэд хэд хэдэн удаа санал солилцсоны дүнд орган хөгжмийн одоогийн загварыг бүтээсэн байна. Хөгжмийг Германы орган бүтээгч Каспар Глаттэр-Гуц бүтээсэн бөгөөд бүтээх зардлыг нь АНУ дахь Тоёота Моторсын Худалдааны компаниас Лос Анжелес хотын удирдлагад бэлэг болгон өгчээ.