Монгол Улс барилгын материалынхаа 60 гаруй хувийг импортлодог. Барилгын салбарын гол нэрийн бүтээгдэхүүнүүд гадны орноос шууд хамааралтай байгаа нь манай улсын барилгын салбарын хөгжилд тун муу нөлөөтэй. Тиймдээ ч БХБЯ-наас саяхан Барилгын материалын үйлдвэрлэлийг дэмжих хөтөлбөрийг батлаад байна.

 

     Яг ийм чухал үед манай оронд урьд өмнө байгаагүй шинэ технологийг нэвтрүүлсэн нэгэн шинэ үйлдвэр үүд хаалгаа нээгээд удаагүй байгаа нь “Айзава Монгол” ХХК-ийн бетон зуурмагийн үйлдвэр юм. Тус компанийг 60 жилийн түүхтэй, Япон улсын бетон зуурмагийн үйлдвэрлэлийн тэргүүлэгч компаниудын нэг “Айзава” корпорацийн хөрөнгө оруулалттайгаар 2009 онд байгуулж, 2012 оны наймдугаар сараас үйлдвэрлэлээ эхлүүлжээ. Үйлдвэрийн бүхий л тоног төхөөрөмжийг манай орны нөхцөлд тохируулан Япон улсад үйлдвэрлэсэн бөгөөд Японоос технологичид тогтмол ирж ажиллахын зэрэгцээ монгол ажилтнуудаа тус улс руу сургалтанд байнга хамруулдаг байна.

 

      Манай улсад ажиллаж байгаа бетон зуурмагийн үйлдвэрүүд өвөл эхлэхтэй зэрэгцэн үйл ажиллагаагаа зогсоодог. Харин Айзава Монгол компанийн үйлдвэр жилийн турш ажиллах боломжтой. Учир нь тус компани өвлийн улиралд ч бетон зуурмаг үйлдвэрлэдэг бөгөөд тэд бүтээгдэхүүнээ хөлдөж, хагарч, цуурахгүй JIS буюу Japan International Standard хэмээх Японы технологиор үйлдвэрлэдэг онцлогтой. Өөрөөр хэлбэл, байгаль цаг уурын ямар ч нөхцөлд бат бөх чанараа алдахгүй, олон зуун жилийн насжилттай бетон зуурмаг үйлдвэрлэдэг нь тэдний давуу тал юм байна. Тус үйлдвэр цагт 150 м.куб бетон зуурмаг үйлдвэрлэх хүчин чадалтай бөгөөд 2000 м.куб зуурмаг үйлдвэрлэх байнгын нөөцтэй гэнэ.

      Япон улс газар хөдлөлтийн идэвхитэй бүсэд хамаардаг. Түүнийгээ дагаад барилгын материал үйлдвэрлэгч нар нь хамгийн сайн чанарын бүтээгдэхүүн үйлдвэрлэхийн зэрэгцээ байнга шинэчлэн сайжруулдаг аж.Тухайлбал, байгалийн гамшигт тэсвэртэй барилга барихын тулд бүтээгдэхүүн үйлдвэрлэгч нар нь байнгын туршилт шинжилгээ хийдэг байна. Эрс тэс уур амьсгалтай манай орны хувьд өвлийн улиралд барилга угсралтын ажил зогсдог нь тухайн салбарт үйл ажиллагаа явуулж байгаа аж ахуйн нэгж, ажилтнуудад эдийн засгийн талаасаа ихээхэн хүндрэл учруулдаг. Харин бүтэн жилийн турш өндөр чанарын бетон цутгаж эхэлснээр

Нэгдүгээрт: Тухайн барилгын төсөвт хэмнэлттэй

Хоёрдугаарт: Тухайн барилга газар хөдлөлт зэрэг байгалийн гамшигт тэсвэртэй болно

Гуравдугаарт: Барилгын салбар байнгын ажилтай байснаар эдийн засагт чухал нөлөөтэй.

 

      “Сүүлийн жилүүдэд МонголУлсын эдийн засаг хурдацтай хөгжиж буйг дагаад гадаадын хөрөнгө оруулалттай компаниуд олон улсын түвшинд хүрсэн, өндөр чанарын бетон зуурмагаар барилга барих шаардлага тавьдаг болсон. Энэ шаардлагыг манай үйлдвэрийн бүтээгдэхүүн бүрэн дүүрэн хангаж байгаа. Үүний илрэл нь М Си Эс группийн Шангри Ла зочид буудлын төсөлд манай бүтээгдэхүүнийг ашиглаж байгаа явдал юм” хэмээн Айзава Монгол компанийн Үйлдвэр хариуцсан дарга Тошихико Кон хэлж байлаа.

 

      Тус компанийн үйлдвэрлэж буй бетон зуурмагийн талаар товч танилцуулъя. Бетон зуурмаг элс, хайрга, цемент, ус, химийн нэмэлт гэсэн үндсэн түүхий эдүүдээс бүрддэг. Эдгээрийг ямар орцоор, хэрхэн хольж хийхээс бетон зуурмагийн чанар шууд хамаарна. Мөн бетон зуурмагийн шинж чанараас хамаараад хол газар олон цагаар тээвэрлэх боломжгүй байдаг. Ямар төлөвлөлттэй, хэдэн давхар барилгыг хаана барих, бетон зуурмагийг барилгын талбай руу хэр удаан тээвэрлэх зэргээс шалтгаалж орц найрлагыг нь өөр өөр тогтоодог байна. Учир нь барилга бүр харилцан адилгүй байдаг тул зөвхөн тухайн барилгад тохирсон бетон зуурмагийг тооцоо судалгааны үндсэн дээр тусгайлан бэлтгэж нийлүүлдэг.

 

      Мөн өвлийн улиралд хамгийн чухал нь бетон зуурмагийг цутгахдаа тодорхой хэмжээний дулаан бүхий битүү орчинг бүрдүүлэх хэрэгтэй. Цутгаж дууссаны дараа мөн тодорхой хугацаагаар зуурмагийг технологийн дагуу зохих арчилгааг хийх ёстой. Айзава Монгол компанийн зүгээс захиалагчиддаа эдгээр шаардлага тавьж, зөвлөгөө өгдөг байна. Үүнд л Япон стандартын давуу тал оршдог аж.

 

 Бетон зуурмаг үйлдвэрлэх шат дамжлага

 

1.Түүхий эдийг конвейроор татан авч зуурах тогоонд хийнэ.

2.Үйлдвэрийн бүх ажиллагаа бүрэн автомат бөгөөд өгсөн үзүүлэлтийн дагуу бүтээгдэхүүн үйлдвэрлэж байгааг дэлгэцээр хянана.

3.Үйлдвэрлэж байгаа зуурмагийн хөдөлгөөнт чанарыг спамп монитор дээр харуулж байна.

4.Энэ тогоонд цагт 150 м.куб бетон зуурмагийг зуурдаг.

5.Бэлэн болсон бүтээгдэхүүний дулааныг байнга хэмжинэ.

6.Бетон зуурмагаас дээж авч, бат бэх чанарыг нь шалгана.

7.Захиалагчийн хүссэн чанартай бетоныг зуурмагийн автомиксерт ачна.

8.Өвлийн улиралд бетон зуурмагийг тодорхой хэмжээний дулаан бүхий битүү орчинд цутгана.