Манай өвөө, аав хоёр амьдралаа барилгатай холбосон. Би ч мөн адил инженер мэргэжлийг сонгосон. Ер нь манайхан дархан, мужаан, барилгачин хүмүүс байдаг. Өвөө, аав хоёр маань Улаанбаатар компанид олон жил ажилласан. Одоо ч гэсэн аав маань надтай хамт ажилладаг. Үе дамжсан барилгачид гэдгээрээ бахархаж явдаг.

 

     Шинэ барилга эхлүүлэхээр шав тавих миний хувьд сайхан санагддаг. Барилга барина гэдэг асар их хариуцлага. Тэр тусмаа инженер хүн бүх л юмаа мэдэхгүй бол амаргүй.  Олон юмыг давж туулсаны дараа барилга сүндэрлэн босдог. Бүтээж  босгосон зүйлээ  хараад явах бүр ч сайхан.

 

     Бид барилгын талбай дээр маш олон хүнтэй харьцдаг. Хүн бүхэн өөр өөрийн араншинтай. Тэдний араншинд тааруулж харьцах амар ажил биш. Заримд нь ширүүхэн үг хэлэхээр ажил хаяад явна. Зарим нь өмнөөс сөргөлдөнө гээд олон асуудал бий л дээ. Сайн ажилтантай байж сайн инженер төрдөг учраас энэ хоёрын амжилт бие биенээсээ их хамаарна.

 

       Аль аль талдаа л асуудал бий. Юм чадахгүй байж “цалин” гээд амандаа орсон тоогоо хэлчихээд зогсож байдаг монгол ажилчид ч бий. Гэхдээ монголчууд нэг хийвэл мундаг хийдэг л дээ. Барилгын зарим компаниуд хятадаас , хойд солонгосоос ажиллах хүчин авчирдаг. Тэд монголчуудаас дээрдэх юм алга л байна. Би хувьдаа хэрэгцээгүй мэргэжлээр сурч байгаа хүмүүсийг барилгын мэргэжилтүүд болоосой л гэж хүсдэг. Ер нь энэ салбарыг дагасан хүн буруудана гэж байхгүй.

 

     Хяналтын механизмыг сайжруулмаар санагддаг. Өөриймсөг сайн ажилладаг компани зөндөө л дөө.  Гэхдээ чанаргүй барилга гэж ярих болж. Энэ нь бүтээгчид биш, барилгаар бизнес хийдэг хүмүүсээс гардаг үр дагавар. Барилгаар суралцсан хүмүүсийн сэтэхүйд чанаргүй барина гэсэн ойлголт байдаггүй гэж боддог. Тиймдээ ч манай компани мэргэжилтнүүдээр хүрээгээ тэлдэг.

 

      Бусад компаниудыг сайнмэдэхгүй юм. “Улаанбаатар барилга” компани  бол байх ёстой норм, стандартыг сайн баримталж ажилладаг.  Барилга тус бүр дээр аюулгүй ажиллагааг зааварчилан ажилладаг хөдөлмөр хамгаалалын инженер байдаг. Энэ чиглэлээр явагдсан сургалт, семинарт манай инженерүүд тогтмол хамрагддаг.

 

      Энэ компани ажилчиддаа их ээлтэй. Манай өвөө, аав би гээд үе дамжин энэ компаний бүтээн босголтод хувь нэмрээ оруулж  ирсэн. Би ч гэсэн сургуулиа төгсөөд шууд орж ирсэн. Одоо яг л гэр бүл шиг минь болж. Талбай дээр нэг ширхэг хадаас байсан ч түүгээд л явж байх жишээтэй. Цаанаа л нэг өриймсөг байдаг. Элдэв цалин амлаад ийшээ тийшээ ажиллах санал ирж л байдаг юм. Гэхдээ би компаниасаа гарахыг боддоггүй. Тууштай байх нь амжилтын үндэс гэдэг биз дээ.

 

     Тийм шүү. Үнэхээр инженер гэдэг хүн байхгүй бол хөгжил дэвшил  үгүй юм. Инженер хүн л шийнийг сэтгэж, шинэ зүйл хийж байж хорвоо өөрөө хөгжиж дэвждэг гэж би хувьдаа боддог. Ер нь ч тэгээд хүндтэй, бүтээмж сайтай мэргэжил шүү дээ.

 

      Би аливаа зүйлийг гэгээлэг талаас нь харахыг хичээдэг. Нэг үеэ бодвол манай улс орон сайхан хөгжиж байна. Залуус ч их ухамсартай болж. Би өөрөө барилгын хүн болохоор барилгын салбарын тал дээр хүсэж мөрөөддөг юм их бий. Манайд барилга барих боломжит хугацаа хавраас намрын хооронд л үргэлжилдэг. Бусад үед ер нь зогсонги байдалд ордог. Шилдэг шинэ технологиор  чанартай барилгыг өвлийн улиралд барина гэж ярьцгаадаг. Тийм технологийг нэвтрүүлээд, эрч хүчтэй ажиллах юм бол монгол улс улам бүр л сайхан болно. Гэхдээ бас төр засгаас шалтгаалсан юм их байна. Одоо V-р цахилгаан станцаа барихгүй бол нийслэл хот ачааллаа дийлэхээ байлаа шүү дээ. Хэрэгцээ нь  даацаас хэтэрсэн. Үүнд шилжилт хөдөлгөөн, шинэ баригдаж байгаа барилгууд их нөлөөлж байгаа. Шилжиж суурьших нь хүний эрх, шинэ барилга босох нь хөгжлийн эх учраас цахилгаан станцаа л түргэн барих хэрэгтэй байгаа юм.

 

Хамгийн гол нь мэргэжилдээ эзэн болж мэргэших хэрэгтэй гэж боддог. Сурсан юмандаа эзэн байна гэдэг  сэтгэл ханамжтай байдлыг авчирна гэж боддог. Гэхдээ би тэгтлээ их баян болъё гэж боддоггүй. Энгийн сайхан амьдарч, зөв амьдрах юмсан л гэж боддог.

 

      Хүмүүс байртай, машинтай, ажилтай байхыг таатай орчин бүрдэх гэж ярьдаг. Би бол байранд амьдрах дургүй. Эхнэр хүүхэдтэйгээ хотын утаанаас хол агаар салхинд амьдрахыг илүүд үздэг. Манайх хотоос 22км зайтай Өлзийт гэдэг газар байдаг.  Тэнд өөрийн гэсэн газар аваад өөрийнхөө сансанаар 2 давхар байшин барьж байгаа. Ер нь ч тэгээд байгальтайгаа ойр амьдрах чухал.

 

      Би барилгын талаар гадаад дотоодын юм уншиж судлах дуртай. Саяхан ШУТИС-ийг мэргэжлийнхээ дагуу Магистраар төгслөө. Одоо зав гарвал мэргэжлийн талын орчуулга бага саг хийнэ. Чөлөөт цаг гарвал аль болох л мэдэж сурахыг хичээнэ дээ.