Испанийн хоёр дахь том хот Барселонд байрлах энэхүү авсаархан нэг өрөө байранд зочны, унтлагын, ажлын, гал тогооны, ариун цэврийн өрөөнүүдийг нэг дор багтаажээ. Энэ байр анх хуучирч муудсан будагтай ханатай, жижигхэн цонхтой байсныг өөрчилж засахын тулд эзэн нь зургаан сар зарцуулсан гэнэ.

Юун түрүүнд байрны урагшаа харсан жижиг цонхтой ханыг тэр чигт нь цонх болгон томруулжээ. Цонхныхоо наана буйданг орлох модон суудал хийсэн бөгөөд түүн дотор хоёр хүний унтлагын хураагддаг ор багтдаг. Ор хураасан үед энэ хэсгийг зочны өрөөний зориулалтаар ашиглаж болно. Харин цонхны баруун талын ханыг саарал өнгөөр будсан бөгөөд хавтгай телевизор өлгөж, эвхэгддэг ажлын ширээ байрлуулжээ. Зүүн талын хана нь шаргал модон тавилгатай. Энэ тавилгын хаалгыг нээхэд угаалтуур, цахилгаан зуух, аяга таваг угаагч машин, хөргөгч бүхий гал тогооны хэсэг ил болох юм. Үүдний хэсэгт өмнө нь сантехникийн холболт байсныг ашиглаж угаалтуур болон шилэн ханатай шүршүүрийг байрлуулж өгчээ.

Байрны эзэн Шаллэрт хуучны барилгад төдийлөн дурладаггүй байсан ч энэ байрны зарыг харсан дариудаа үзэж сонирхохоор очоод худалдан авчээ. Энд тэр хоёр жил амьдарч байгаа бөгөөд одоо Барселоний хуучин байрнуудыг урьд урьдынхаасаа илүү сонирхох болсон гэнэ.