Гүржийн банк
Batsuh
Гүржийн нийслэл Тбилис хотноо Кура голын эрэг дээр Гүржийн Банкны 18 давхар энэхүү барилга оршдог. 1975 онд эл барилгыг Зөвлөлт Социалист Бүгд Найрамдах Гүрж Улсын Зам Тээврийн Яаманд зориулан барьжээ. Гүрж ЗСБНХУ-аас тусгаар тогтносны дараагаас 2007 онд Гүржийн Банк байрлах хүртэл уг барилгыг ямар нэгэн зорилгоор ашиглаж байсангүй. Банк байрлах болсонтой холбогдуулан энэ барилгын гадна болоод дотор заслыг шинэчлэн өөрчилсөн байна.
Тухайн үед Зам Тээврийн Яамны орлогч сайд байсан архитектор Георгий Чахава өрсөн тоосго мэт өвөрмөц загвартайгаар бүтээсэн нь тус барилгыг туйлын алдартай болгожээ. Барилгын хэсгүүдийг газраас хөөрсөн мэт хөндий барьсан нь доорх ургамал, модыг эргэн тойрны ногоон байгууламжтай хослуулах зорилготой байв. Хэсэг бүрийг хооронд нь солбилцуулахдаа гурван хэсгийг өрнө болон дорно зүг тийш, хоёр хэсгийг өмнөд болон умард зүг рүү чиглүүлэн бүтээжээ.
Георгий өвөрмөц загварын барилгадаа тохирох газрыг өөрөө сонгосон бөгөөд тухайн үед 6 сая рублийн өртгөөр барьжээ. Барилгын 10,960 м.кв талбайг 2007 онд өргөтгөн 15,600 м.кв болгохоор төлөвлөсөн ч хийлгүй хуучнаар нь үлдээсэн.
Энэхүү барилгын өвөрмөц загвар 1920-иод оны үеийн Оросын барилгачдын бүтээлүүдтэй тун төстэй. Мөн бетон зуурмагаар геометрийн ер бусын дүрслэл бүтээдгээрээ алдартай Брутализмын элементүүдийг оруулсан нь уг барилгыг өвөрмөц болгожээ. Харагдах байдлын хувьд тун төстэй Хабитат 67 хэмээх өөр нэгэн барилга Канадын Монреалд бий.
Зөвлөлтийн үед баригдсан барилгууд дотроос Гүржийн Банкны эл барилга онцгой ялгардаг ч гэлээ өнөө үед барилгын гадна үзэмжийн талаар хүмүүс санал хуваагдах нь элбэг болжээ. Гэсэн хэдий ч энэ барилга Зөвлөлтийн үед баригдсан хамгийн өвөрмөц загвартай барилгуудын нэгд зүй ёсоор тооцогддог юм.