Өмнөд Лондонд байрлах Дунравэн сургуулийн сурагчидад 3 хоногт боссон асар том угсардаг спорт заал үнэхээр зугаатай байгаа гэнэ. Архитектурын “Скабал” хэмээх пүүсийн бүтээсэн энэхүү угсардаг спорт заал нь контейнераар бүтсэн бөгөөд пүүсийн инженерүүд сургуулийн хүүхдүүдэд хөгжилтэй, шинэлэг уур амьсгал, өнгөлөг орчинг бүрдүүлж чадах материалыг сонгосон гэнэ.

 

      Хамгийн чухал нь сургуулийн захиргаа ч уламжлалт аргаар барих байсан зардлаа хэмнэсэн байна. Гэвч арвич хямгачдаа гол нь биш, шинэлэг уур амьсгалтай, байгаль орчинд ээлтэй гээд олон давуу талтайгаас гадна спорт заалны дизайн нь хүүхдүүдийн спортоор хичээллэх идэвхийг 2 дахин нэмэгдүүлсэн явдал юм.

 

      Контейнер заалны дотор талыг хувцас солих өрөө, агуулах болон оффиссийн зориулалтаар ашиглах бөгөөд хайрцаглан өрсөн контейнерүүдийн голд гарсан зайг хүүхдүүдийн биеийн тамирын боловсролд зориулагдсан уужим саруул танхим болгон тохижуулсан байна. Энэхүү давхарлан өрсөн контейнерүүдийг дөрвөн үндсэн өнгө, олон төрлийн гэрэлтүүлэгч болон цонхийг орлох зиг заг маягийн зүсэлт зэргээр чимэглэсэн нь олон нийтэд маш их таалагдаж, ийм спорт заалтай болох гэсэн хүсэлтэй хүмүүс их байгаа гэнэ.

 

      Энэ заал нь 8200 м² газарт хуучин контейнер, байгалд ээлтэй байшин барихад хэрэглэдэг гэрэл нэвтрүүлдэг тунгалаг поликарбонат зэрэг байгалд ээлтэй материалууд их хэмжээгээр ашигласан. Тус сургуулийн барилга нь ч мөн байгалд ээлтэй дизайнаар баригдсан бөгөөд борооны ус хуримтлуулах систем хамгийн сайн системүүдийн нэг билээ.