Барилгын салбарын нэгдсэн сүлжээ “Барилга.МН” сайтын эрхэм харилцагч, нийт гишүүд та бүхэнд Хөхөгчин хонин жилийн сар шинийн мэндийг өргөн дэвшүүлж, өнгөрөгч жилийн тань өлзий буян улам арвижиж, угтах жилийн тань ажил үйлс, цог хийморь бадран,  ураг төрлөөрөө элэг бүтэн, баяр баясгалан дүүрэн байхын өлзийтэй ерөөлийг  өргөн дэвшүүлье.
 
      Барилгын Зөвлөгөө Мэдээллийн Төвөөс эрхлэн гаргадаг “Барилга.МН” сэтгүүлийн хамт олон барилгын салбарын №1 мэдээллийн хэрэгсэл байж, энэ салбарт тулгамдсан асуудал, шийдвэрлэх арга зам, ололт амжилт, ахиц дэвшил, шинэ техник технологи, содон соргог мэдээ мэдээлэл, дэлхий нийтийн барилгын салбарын хөгжлийн чиг хандлагыг  харилцагч, хэрэглэгчиддээ хүргэсээр тав дахь оноо үдлээ.
Хөхөгчин хонь жилдээ ч  амжилт бүтээл арвин байж, баялаг бүтээгч та бүхнийхээ байнгын туслагч байна гэдэгтээ бид итгэлтэй байна.
       Мэдээллийн эрин зуунд “Барилга.МН” сэтгүүлтэйгээ зэрэгцэн ажилладаг  манай www.barilga.mn  вэбсайт ч хэрэглэгч та бүхэнд барилга, бүтээн байгуулалтын салбарын өдөр тутмын мэдээ мэдээллийг цаг алдалгүй, түргэн шуурхай, цогцоор нь хүргэж, уншигчид, харилцагчдынхаа маркетингийн үйл ажиллагаанд үргэлж тус дэм болохыг хүсэж, хэрэгжүүлсээр ирлээ.
Мөн жилд хоёр удаа, хавар намартаа уламжлал болгон зохион байгуулдаг,  “Барилга-Экспо” үзэсгэлэн жилээс жилд өргөжин тэлж, олон улсын хэмжээнд зохион байгуулагдах болсон бөгөөд хөхөгчин хонь жилийн  “Барилга-Экспо”  үзэсгэлэн уламжлал ёсоор тун удахгүй үүд хаалгаа нээхээр, бэлтгэл ажилдаа ороод байна.

     Техник технологийн хөгжилтэй зэрэгцэн Барилга.МН аппликейшн нь ухаалаг гар утсанд суурилагдан нийт хэрэглэгчиддээ хүрэх боломжтой болсны дээр бид вэбсайтаа улам бүр баяжуулан барилгын компани, аж ахуйн нэгжүүдэд олон шинэ боломжийг санал болгосоор байна.
Ирэх онд манай хамт олон барилгын салбарынхныхаа хамтын ажиллагааны уялдаа холбоог сайжруулан энэ талбарын гол холбогч гүүр нь байж “Таны бизнесийн хурдасгуур” уриан дор сэтгүүл болоод вэбсайт маань улам бүр эрч хүчтэйгээр тэмүүлж ажиллах урам зориг дүүрэн байна.
 
      Морилон ирж буй Согтууруулагч хэмээх Хөхөгчин хонь жилдээ та бүхэн эрүүл энх, элбэг дэлбэг байж,  юу санасан есөн цагаан хүсэл сэтгэлчлэн бүтэхийн өлзий дэмбэрлийг ерөөе.


 “Барилга.МН”-ийн хамт олноос