Одоогоос хоёр жилийн өмнө шав тавих ёслолоо хийж байсан “Амгалан Дулааны станц” ирэх 10-р сард ашиглалтанд орно. Тус станцын үндсэн барилга угсралтын ажил 95 хувьтай явагдаж байгаа талаар салбарынхан нь танилцуулсан юм. Монгол Улсын Ерөнхий сайд Ч.Сайханбилэг, Эрчим хүчний сайд М.Зоригт болон Нийслэлийн засаг дарга бөгөөд Улаанбаатар хотын захирагч Э.Бат-Үүл тэргүүтэй албаны хүмүүс Станцын бүтээн байгуулалтын ажилтай танилцан, салбарын мэргэжилтнүүдийн үгийг сонслоо.

Нийт 75.9 сая ам.долларын төсөвт өртөгтэйгөөр төлөвлөгдсөн, 348 МВт-ын хүчин чадалтай “Амгалан Дулааны станц”-ын дутуу хэсгийн ажлыг гүйцэтгэхэд одоогоор 3.9 тэрбум төгрөг шаардлагатай байгаа аж.

Станц ирэх 10 дугаар сарын 15-ны өдөр бүрэн ашиглалтанд орох хүртэл туршилтын халаалт хийхэд бэлэн болжээ. Угсралтын ажлын хүрээнд 116 МВт-ын хүчин чадал бүхий гурван зуух, компьютерийн иж бүрэн удирдлагын систем, 2Ф700 мм диаметртэй хойд, урд хэсгийн хоёр дулаан дамжуулах гаргалгаатай дулааны шугам, 110 кВ-ын хоёр хэлхээт 350м цахилгаан дамжуулах агаарын шугам, цахилгааны дэд станц, түлш дамжуулах байгууламжууд, төмөр замын өргөтгөл, сүлжээний усны насос, шугам хоолой болон цахилгаан хуваарилах байгууламжийн барилга, тоног төхөөрөмжүүдийг “Амгалан Дулааны станц”-д суурилуулсан байна.


“Амгалан Дулааны станц” ашиглалтанд орсноор Улаанбаатар хотын төв хэсэг болон зүүн хэсгийн 13, 14, 15-р хорооллын дулаан хангамжийн асуудал шийдэгдэх юм. Ингэснээр хотын бусад хэсгийн дулаан хангамжид ачаалах асуудал тулгарахгүй байх давуу талтай. Тодруулбал, 20,000 айл өрхийн 250 орон сууцны дулаан хангамжийн нөхцөл сайжирч, шинээр ашиглалтанд орох 40,000 айл өрх, 500 орон сууцыг дулаанаар хангах хүчин чадалтай гэсэн үг юм.

“Амгалан Дулааны станц”-ын ерөнхий инеженер Ч.Цогтсайхан албаны хүмүүст ярихдаа, эхний ээлжинд дулааны шугам сүлжээ, түгээлтийн үйл ажиллагаанд саад болж байгаа арваад айлын газрын асуудлыг шийдвэрлэж өгөхийг хүслээ.

Монгол Улсын Ерөнхий сайд Ч.Сайханбилэг: Бид бүхэн өнөөдөр “Амгалан Дулааны станц”-тай танилцаж байна. Монгол Улсын засгийн газраас сүүлийн хоёр жилийн хугацаанд одоо байгаа нөхцлөл байдал дээрээ хэрэгцээ шаардлагаа яаж хангах вэ гэдэг дээр шат дараалсан арга хэмжээ авсан. Дулааны ТЭЦ-3 дээр 50, мөн ТЭЦ-4 дээр 123 МВт-ын өргөтгөл хийсэн. Харн өнөөдөр 348 МВт-ын хүчин чадалтай “Амгалан Дулааны станц”-ыг ашиглалтанд оруулахад бэлэн болж байна.


Ерөнхийдөө “Амгалан Дулааны станц” ашиглалтанд орсноор 220 орчим ккал/цагийн хүчин чадлаар 40,000 орчим айл өрхийг дулаанаар хангах боломжтой болно. 20,000 айл өрхийн дулааны нөхцөл сайжирна гэсэн тооцоотой байгаа. Үлдсэн ажлыг гүйцэтгэхэд шаардлагатай 3.9 тэрбум төгрөгийн санхүүжилтийг олгох асуудлыг засгийн газар бүрэн шийдвэрлэсэн. Хөгжлийн банкаар дамжуулан уг санхүүжилтийг шилжүүлэх ажил үлдлээ.

Эрчим хүчний яамны төрийн нарийн бичгийн дарга Д.Дэлгэрцогт: “Амгалан Дулааны станц”-ыг Хөгжлийнх банкны санхүүжилтээр, түлхүүр гардуулах нөхцөлтэйгөөр Хятадын “CMEC” компани гүйцэтгэж байна. ТЭЦ-5 гэх зэрэг дулааны бусад эх үүсвэр ашиглалтанд орох хүртэлх хугацаа буюу 2019-2020 он хүртэл Улаанбаатар хотын дулаан хангамжийг хангаж, ямар нэг том асуудал тулгарах эрсдэлгүй болж байна гэсэн үг. Төсөл маань амжилттай хэрэгжиж дуусч байна. 10 дугаар сард бүрэн ашиглалтанд орох учраас ирэх өвлийн дулааны ачааллыг хуваалцана.


Одоогоор наад талын хоёр тогооны дотоод хатаалга хийгдэж байна, 8 дугаар сард гурав дахь тогооны ажил бүрэн дуусна. Өнөөдөр станцын гол ажлуудыг гүйцэтгэж дууссан, нийт 98 орчим хувийн гүйцэтгэлтэй явж байна. Станц ажиллаж эхэлснээр хотын зүүн хэсгийн дулаан хангамж бүрэн сайжирна. Нүүрсний тээвэрлэлт, хангамжийн асуудал шийдэгдсэн. “Багануур”, “Шивээ Овоо”-гийн нүүрсийг ашиглана. Станц ашиглалтанд орсноор хотын энэ хэсэгт том барилга байгууламж шинээр барихад асуудал, хүндрэл үүсэхгүй.