Хууль Зүйн Яамны захиалгаар барилга угсралт үйлдвэрлэлийн хилийн цэргийн 0119-р анги барьж гүйцэтгэлийг хийсэн “Хилчин хотхон” нь 692 айлын орон сууцтай, 2011 онд эхний ээлж нь ашиглалтанд орж байсан томоохон хотхон юм. Тус хотхон энэ сарын 18-нд орсон борооноор усны түвшин нэмэгдэж бохирын шугам бөглөрснөөс усаа хаасан байна. Ийнхүү дөрөв дэхь өдөртөө халуун, хүйтэн усгүй байгаагаар зогсохгүй булгийн ундрагатай газар барьсны улмаас доод давхарт байрлах граж нь усанд автсан байдалтай байна. Оршин суугчид нь 00-доо хэрэглэх бохирын усаа гражнаас ундран гарах уснаас авч байна.
Хилчин хотхон дээр биечлэн очиход хог хаягдалд хөглөрсөн, хана туурга нь цуурсан, дээд давхарын айлуудад дусаал гойждог, лифт нь гацах, ажиллахгүй байх тохиолдол гардаг, гаднах авто машины хүрэлцээ муу, хүүхдийн талбай эвдэрсэн, ямар ч цэцэрлэгжилт байхгүй гээд олон асуудал байсан юм. Үүн дээрээс нэмж усны ундрагатай газар судалгаа, шинжилгээгүйгээр барилга барьсан нь доороосоо усанд нэвчин барилга бүхэлдээ доошоо суулт өгсөн байна.
Оршин суугчдын мэдээлснээр, “СӨХ-н дарга Т.Жамц өвчтэй байгаан улмаас хотхоны ажил зогсонг байдалд орсон. Бохирын хоолойн худаг таггүй байсны улмаас шороо орон бөглөрсөн. Барьсан цэргийн анги  нь улсад хүлээлгэн өгөөгүйн улмаас хувийн хэвшлийн “Сэлэнгэ дулаан” ХХК дундаас нь орж ирэн, уурын зуухыг хүлээн авсан. Ингэсэнээр  тог цахилгаан, усны мөнгө их гардаг болсон. Хоёрхон километрийн зайд төвлөрсөн дулааны сүлжээ байхад холбож чадалгүй өдий хүрсэн. СӨХ, уурын зуух хоёрыг нэгтгэн контор байгуулах хэрэгтэй” гэх зэргээр гомдол мэдүүлж байгаа юм.
Харин “Сэлэнгэ дулаан” ХХК-ийн инженер Ч.Баттөмөрөөс энэ талаар тодруулахад, “Энэ хавийн оршин суугчид худгийн тагыг авсан байна. Бидний зүгээс хариуцлагагүйгээр худгийг таглаагүй орхисон асуудал байхгүй, одоогоор бохирын хоолой цэвэрлэх ажлыг 72 цагийн турш хийж байна” гэлээ.
СӨХ-н нягтлан М.Энхсайхан хэлэхдээ, “Өнөөдөр л ус соруулах мотор ирж граж дахь ус зайлуулах ажил хийгдэж байна. “Сэлэнгэ дулаан” ХХК энэ асуудлаа хурдан шийдвэрлэх хэрэгтэй” гэж байлаа.
Оршин суугчдад одоогоор ямар нэгэн мэдээлэл, тайлбар хэн ч хийгээгүй байна. Энд хариуцлага хүлээх хүн олдсонгүй юу? Дээрх нөхцөлд хэд хэдэн асуудал урган гарч байна.

1. Захиалагчийн зүгээс /ХЗЯ/ чанарын хяналт хийсэн үү.
2. Гүйцэтгэгч байгууллага “Хилчин хотхон”-ыг гар дамжин солихгүй байх гэрээний нөхцөл хийгдсэн үү.
3. Хохирч 692 айл өрхөд хэн хариулт өгч, хэн хариуцлага үүрэх ёстой вэ?
4. Эцэст нь эндээс үүдэх хохирлыг хэн барагдуулах вэ? гэсэн асуудлуудыг холбогдох аж ахуйн нэгж, байгууллагуудаас асуумаар байна.