Нийслэлийн Засаг Дарга бөгөөд Улаанбаатар хотын захирагчийн 2013-2016 оны үйл ажиллагааны хөтөлбөрт “Орон сууцны хангамжийг нэмэгдүүлэх чиглэлээр ашиглалтын шаардлага хангахгүй хуучны барилгыг иргэдийнх нь оролцоотойгоор дахин төлөвлөн, барилгажуулах журам” батлагдсан. Үүний хүрээнд ХУД, БГД, Налайх дүүрэгт байрлах ашиглалтын шаардлага хангахгүй барилгын үйл ажиллагааг зогсоон, ашиглахыг хориглосон 79 барилгыг буулган, дахин барилгажуулах ажил хийгдэж байгаа юм. Гэхдээ зөвхөн журмын дагуу шалгарсан төсөл хэрэгжүүлэгчид л хуучин барилгыг буулган дахин барих ажлыг хийнэ.
       Гэтэл сүүлийн үед “Хуучин барилгыг буулгах тендерийн ажлыг олж өгнө” хэмээн залилан хийсэн тохиолдол хэд хэд гарсан байна. Тиймээс НЕТГ-ын орлогч дарга Ш.Уртнасан болон тус газрын Дахин төлөвлөлтийн хэлтсийн дарга М.Нямбаяр нар сэрэмжлүүлэг өгөх зорилгоор өнөөдөр хэвлэлийн бага хурал хийлээ. Албаны хүмүүсийн хэлснээр, одоогоор Цагдаагийн байгуулагад ийм төрлийн гэмт хэрэг 3-4 бүртгэгдсэн бөгөөд хууль хяналтын байгууллага шалгаж байгаа гэнэ. Иймд барилгын салбарт үйл ажиллагаа эрхлэгчдийг залилан мэхлэх үйлдлээс сэрэмжлэхийг анхааруулсан юм.