Өнөөдөр БЗМТөвөөс зохион байгуулсан “Барилга Орон Сууц-2015” бизнес уулзалтын үеэр Улаанбаатар хотын дэд бүтцийн талаар тодорхой судалгаанд үндэслэсэн төрийн байгууллагуудын илтгэл оролцогчдийн сонирхолыг ихээр татаж байлаа.

“Барилгын салбарт бизнес эрхлэгчдэд эрэлт ихтэй мэдээллийг богино хугацаанд тодорхой ойлгомжтой өгсөнд энэ уулзалтын ач холбогдол оршиж байна” гэж уулзалтыг зохион байгуулагч БЗМТөвийн гүйцэтгэх захирал Д.Цолмонгэрэл хэллээ.

“Улаанбаатар дулааны шугам сүлжээ” ТӨХК-ны инженерийн албаны дарга Э.Батмөнхийн илтгэлийг бүрэн эхээр толилуулж байна:
 
Сүүлийн жилүүдэд Улаанбаатар хот төвлөрсөн дулаан хангамжид холбогдох барилга обьектын тоо эрчимтэй өсч жилд дунджаар 80-136 Гкал/цагийн ачаалал бүхий хэрэглээ нэмэгдэж байна.

“УБДС” ХК-иас дулааны өсөн нэмэгдэж байгаа хэрэглээг хангах зорилгоор ЭХЯ болон холбогдох бусад байгууллагуудтай хамтран шугам сүлжээг өргөтгөх болон бусад техник зохион байгуулалтын ажлыг жил бүр хэрэгжүүлж ирсэн. Үүний үр дүнд 2000 оноос хойш төвлөрсөн дулаан хангамжийн системд нийтдээ 1100 орчим Гкал/цаг ачаалалтай, 2300 орчим барилга байгууламж холбох боломжийг бүрдүүлсэн ба Улаанбаатар хотод 1986 оноос хойш нэг ч дулаан эх үүсвэр баригдаагүй байгаа өнөө үед өсөн нэмэгдэж байгаа хэрэглээг тасралтгүй хангаж байна.

Өнөөдрийн байдлаар техникийн нөхцөл авсан 706,59 Гкал/цаг ачаалал бүхий хүлээгдэж буй хэрэглээг шинээр холбосны дараа дамжуулах төв шугам болон дулааны эх үүсвэрүүд хүчин чадлын нөөцгүй болж нэмж хэрэглээ холбох техникийн боломжгүй тооцооны үндэслэлүүд гарч байна.

Иймд дамжуулах төв шугам болон дулааны эх үүсвэрүүдэд өргөтгөл хийх, шинэ эх үүсвэрийг ашиглалтанд оруулах эсвэл дулааны эх үүсвэрийн нөөц бий болгох зорилгоор зарим шинэ технологиудыгтөвлөрсөн дулаан хангамжийн системд нэвтрүүлэх, дулаан хангамжийн хүндрэлтэй байршилуудад шинээр техникийн нөхцөл олгохгүй байх шаардлагууд тулгараад байна.