Барилгын салбарт үйл ажиллагаагаа амжилттай, жигд явуулж байгаа компани, аж ахуйн нэгжүүдийг дэмжих зорилгоор “Барилга.МН” сэтгүүлээс   “Бүтээн байгуулагчдаа дэмжье” уриан дор олон төрлийн арга хэмжээ зохион байгуулж байгаагийн нэг нь “Танайд зочилъё” буланг хөтлөн явуулах болсон явдал юм.  Үйлдвэр аж ахуйн нэгжийн дотоод үйл ажиллагаатай танилцаж, үндэсний үйлдвэрлэгчдийн хийж бүтээж байгааг нүдээр харах нь сэтгүүлчийн төдийгүй Монгол хүний бас нэгэн баясал мэт. Бид энэ удаад Монголын барилгын салбарт цогц бүтээн байгуулалтыг бий болгохыг зорьж байгаа үндэсний үйлдвэрлэгч “Тэдмэнт” группээр зочиллоо.

Цогц бүтээн байгуулалтыг эрхэмлэгчид ганц нэг үйлдвэртэй байхгүй нь лавтай учир уншигч танд “Тэдмэнт” группын зургаан охин компанийн гурван ч үйлдвэрээр зочилсноо дэлгэнэ.  Ажил хэрэг болгомоор, үлгэр жишээ авахуйц үйлдвэрийн орчин угтах учир уйдаахгүй хэмээн итгэж байна.
Тэдмэнт Групп нь 2004 онд барилга угсралт, гадаад, дотоод худалдааны чиглэлээр үйл ажиллагаагаа эхлүүлж,  2007 оноос барилгын материалын үйлдвэрийн чиглэлээр үйл ажиллагаагаа өргөтгөн бетон зуурмаг, ган бүтээц, вакум цонх хаалга үйлдвэрлэл, гадаад дотоод худалдааны болон барилга угсралтын чиглэлээр 10 гаруй жил тогтвортой үйл ажиллагаа явуулж байгаа манай томоохон бүтээн байгуулагч компани юм. Мөн тус групп нь удирдлагын 4 газар, 6 салбар компани, хувьцааг нь эзэмшдэг 3 аж ахуйн нэгж, 300 гаруй үндсэн ажилтан, 500 гаруй гэрээт ажилтантайгаар нийт 10,000 м.кв орчим талбайд үйлдвэрлэл эрхэлж, оффисын зориулалттай өөрийн барилгуудад үйл ажиллагаагаа явуулж буй Монгол улсын томоохон ажил олгогч байгууллагын нэг билээ. Мөн тус группын ган бүтээцийн үйлдвэр болох “ТЭДМЭНТ ХИЙЦ” ХХК,  хаалга, цонхны үйлдвэрлэлийн “ТЭДМЭНТ ДИВИ” ХХК, бетон зуурмагийн “ТЭДМЭНТ БЕТОН ЗУУРМАГ” ХХК-аар зочилсноо хүргэе.

“Тэдмэнт”-ийг таниулах бүтээн байгуулалтын эзэд

Дээрх гарчгаар “Тэдмэнт” группын бусад үйлдвэр аж ахуйн нэгжийн хийсэн ажил, бүтээсэн зүйлийг үгүйсгэх гэсэнгүй. Бүтээн байгуулалтын салбарт олны нүдэн дээр босчихсон, харагдаж байгаа барилга байгууламжаар нь  тухайн компанийг иргэд илүүтэй мэдэхээс  бусдыг нь төдийлөн анзаарахгүй байх нь бий.  Тэгвэл “Тэдмэнт” группыг нийтэд таниулж байдаг хүмүүс бол “Тэдмэнт констракшн” ХХК-ийн хамт олон юм.  “Тэдмэнт”-ийн анхны бизнесийн үйл ажиллагаа барилга угсралт байсан гээд бодсон ч тэд энэ группыг таниулах хүмүүс мөн билээ.

Бид “Тэдмэнт констракшн” ХХК-ийн оффисоор зочилж, үйл ажиллагаатай нь дэлгэрэнгүй танилцсан. Тус компани нь 2004 оноос барилга угсралтын чиглэлээр үйл ажиллагаагаа явуулж эхэлсэн бөгөөд MCS Групп, “Энержи Ресурс” ХХК, “АПУ” ХК, “Скай Резорт” ХХК, ДЦС-3, ДЦС-3 ТӨХК, “Юнител” группын Дата төвийн барилга, Эм Си Эс группын “тайгар” шар айргийн үйлдвэр, “Монгол Тамхи Со” ХХК-уудын уул уурхай, эрчим хүч, үйлдвэр үйлчилгээний барилга байгууламжууд, үйлдвэрийн өргөтгөл зэргийг чанарын өндөр түвшинд хийж гүйцэтгэжээ. Мөн өөрсдийн хөрөнгө оруулалтаар компанийн нэрийн хуудас болсон “Американ Дэнж” 1 болон 2 орон сууцны цогцолбор хотхон, Үндэсний цэцэрлэгт хүрээлэнгийн хойд талд сүндэрлэсэн “Нарлаг Өргөө” хотхон түүнчлэн 1000 орчим айлын орон сууцны барилгыг ашиглалтанд оруулжээ.  “Тэдмэнт констракшн” ХХК нь үйлдвэрийн барилга байгууламжаар салбартаа танигдсан бөгөөд одоохондоо тус компанитай өрсөлдөхүйц хэмжээний компани дотоодын зах зээлд үгүй байгаа юм.

Ганц байх ган бүтээцийн үйлдвэр

“Тэдмэнт” групптэй танилцах аяллын багийнхны зочилсон анхны үйлдвэр нь ган бүтээцийн үйлдвэрлэлийн “Тэдмэнт хийц” ХХК байсан юм. “Барилга.МН” сэтгүүл, Барилга хот байгуулалтын яам, Барилгын материал үйлдвэрлэгчдийн холбоо хамтран шинэ оны босгон дээр үндэсний барилгын материал үйлдвэрлэгч 800 шахам аж ахуйн нэгжээс “Топ-50” үйлдвэрлэгчийг тодруулахад “Тэдмэнт хийц” ХХК тэдгээр шилдгүүдийн нэг болж байсан юм. Үйлдвэрлэлийн үйл ажиллагаа, үйлдвэрийн орчин, ажилчдын нийгмийн хамгааллыг шийдсэн байдал зэргийг нь өөрийн нүдээр харахдаа бид ч “ТОП-50”  аж ахуйн нэгжийг бодит үнэнд нийцэхүйцээр тодруулж чаджээ гэсэн бодол төрж байлаа. Мөн тус хамт олон 2007 , 2012 оны “Барилгын салбарын ТОП-10” компанийн нэг болж байжээ.

Олон улсын стандартад нийцсэн H, L, C хэлбэрийн ган бүтээцийн үйлдвэр нь 4000м² талбай бүхий орчин үеийн тоног төхөөрөмжөөр бүрэн тоноглогдсон үйлдвэрийн байр, 500м² талбайд оффис, ажилчдын дотуур байр, цайны газар мөн 1500м² талбайд машины зогсоолтой , харуул хамгаалалтын байр гээд үйлдвэрлэлийн цогц орчныг бүрдүүлж чаджээ. Жилдээ 30 мянган тонн ган бүтээц үйлдвэрлэх хүчин чадалтай энэхүү үйлдвэр төрөл бүрийн анкер боолт, ган шат, дээвэр болон давхар дундын ган хийц, багана, дам нурууг үйлдвэрлэхээс гадна зураг төслийн ажлыг захиалгаар хийдэг аж.
 H,L,C хэлбэрийн ган бүтээцийг уул уурхай, эрчим хүч, үйлдвэр үйлчилгээний барилга байгууламжид өргөнөөр хэрэглэдэг бөгөөд цаг хугацаа хэмнэдэг өндөр чанартай орчин үеийн дэвшилтэд бүтээгдэхүүний нэг аж.  “Тэдмэнт хийц” ХХК нь алслалтай ган бүтээцийн үйлдвэрлэлийг Монголд анхлан нэвтрүүлж байгаа төдийгүй ган төмрийг оёдолгүй, цутгасан мэт гагнах дэвшилтэт технологийг нэвтрүүлэн ажиллаж байгаа юм.   Алслалтай ган бүтээц нь 32м хүртэлх зайд ямарч тулгуур багана хэрэглэхгүйгээр дам нуруу хийх боломжтой бөгөөд ингэснээр зай талбайг бүрэн ашиглах давуу талыг захиалагчдад олгодог байна. Мөн ган бүтээц нь  бусад бетон хийц бүтээцийн технологиос хямд өртөгтэй байдаг нь хэрэглэгчийг татах бас нэгэн үндэс ажээ. 
Хамгийн чухал нь Эрээний элдэв үйлдвэрт ган хийцээ захиалчихдаг. Өнөөх нь жин тонндоо хүрдэггүй, алдаа мадаг ихтэй, гагнаасын чанар сул, цаг хугацаа алддаг, эргээд хариуцлага тооцох ямарч боломжгүй байдлыг халах үндсэн гарцын нэг болсон үндэсний үйлдвэрлэл маань амжилттай ажиллаж байгаа нь баярлууштай юм. Үйлдвэрийн дотоод тохижилт сайн, цэвэрхэн. Гаднах орчин ч мөн түүнээс дутахааргүй.  Халуун ус, цайны газар нь тохижилт сайтай.  Сагсан бөмбөгийн талбай, орой тарах ажилчдаа хүлээх ажилчдын автобус гээд бүхий л зүйлийг боломжийн хэмжээнд шийдвэрлэж чаджээ. 
Барилгын ажлын улирал эхлэсэнтэй зэрэгцэн хэрэглэгчдийн захиалга ч бас орж эхлэсэн байгаа тул оч хаялж гагнуур хийсэн, төмөр нугалж, тасдаж тайрсан, дуу цууриатсан, хөдөлмөр ажлын ийм нэгэн өөдрөг орчин биднийг угтсан юм.

Цонх хаалга, үйлдвэрлэлд ч давуу тал бий

“Тэдмэнт хийц” ХХК-тай  нэг хашаанд хаяа залган орших “ТЭДМЭНТ ДИВИ” ХХК харин нам гүмхэн байлаа. Өмнөх захиалагчдын бүтээгдэхүүнийг сэргээн засварлах ажил хийгдэж байв. Ер нь шинэ захилга бага ирж байгаа бололтой. Эдийн засгийн хямрал гэгч хаа сайгүй нөлөөлж, ер нь барилгынханд ажлын өрнөл өмнөх жилүүдийг бодоход бага байгаа нь ганцхан энд ч бус хаа сайгүй анзаарагдана. Үйлдвэртэй нь танилцах сургаар үйлдвэрийн дарга Э.Ганхүү өөрийн компанийн бүтээгдэхүүний давуу тал болоод үйлдвэрийн тоног төхөөрөмжийг ихэд хичээнгүйлэн тайлбарласан.
 "ТЭДМЭНТ ДИВИ" ХХК нь 2013 онд цонх, хаалганы үйлдвэрлэлээр үйл ажиллагаагаа явуулж эхлэсэн бөгөөд жилд 15000м²  бүтээгдэхүүн үйлдвэрлэх хүчин чадал бүхий Германы  “PARKER” фирмийн сүүлийн үеийн, бүрэн автомат тоног төхөөрөмжөөр тоноглогджээ.

PVC болон металл рамтай төрөл бүрийн өнгө загварын өргөн сонголт бүхий цонх, хаалга, шилэн багцыг үйлдвэрлэж хэрэглэгч, захиалагчдад хүргэж байгаа аж. Үйл ажиллагаагаа эхэлснээс хойш “НАРЛАГ ӨРГӨӨ” орон сууцны хотхон болоод “Хэм Рояал” ХХК-ний 4 орцтой 17 давхар барилгыг  цонхоор хангасан төдийгүй оффисын 9 давхар барилгад хөнгөн цагаан рамтай цонх үйлдвэрлэн, угсарчээ. Саяхан байгуулагдсан “залуу” үйлдвэр хэдий ч багагүй үр бүтээлтэй ажиллаж чадсан байна. Барилгын гадна шилэн фасадыг ч мөн үйлдвэрлэж байгаа гэнэ.
 Чанартай бүтээгдэхүүн үйлдвэрлэхийн тулд үндсэн түүхий эдийн сонголтоос эхлээд үйлдвэрлэлийн технологийн шат дамжлагыг хянах стандарт мөрдөж Монгол орныхоо эрс тэс цаг уурын нөхцөлд тохирох   шаардлагыг үргэлжид бодолцдог тухай ярьсан. Удахгүй Орос, Германы хамтарсан “Вика” үйлдвэрийн технологийг нэвтрүүлэх гэж байгаа гэнэ.  "ТЭДМЭНТ ДИВИ" –гийн бүтээгдэхүүний онцлох давуу тал нь цонхыг вакумжуулахын өмнө тусгай зориулалтын машинаар угаадаг ажээ. Хүний гар ажиллагаа оролцохгүй хэр нь шилийг маш сайн ариутгаж цэвэрлэдэг төдийгүй хатаах хэсэг нь мөн автомат болохоор хоёр шилийг вакумжуулсны дараа завсраар нь ямар нэг бохир ордоггүй давуу талтай ажээ. Энэ угаах машин ч мөн сүүлийн үед нэвтрээд байгаа техникийн дэвшил гэнэ. Ер нь аливаа техникийн дэвшил гэдэг өндөр үнэтэй байдгийг үйлдвэрлэгчид андахгүй мэднэ. Гэвч эдгээр үнэтэй бас чанартай бүтээгдэхүүн үйлдвэрлэх тоног төхөөрөмжийг оруулж ирж чадаж байгаад нь бас ажилчдын ажиллах орчин, нийгмийн халамжид анхаарч ажиллаж байгаад нь талархууштай санагдсан.

Бетон зуурмагаар тэргүүлэх зорилт

“Тэдмэнт” группын охин компани болох “Тэдмэнт бетон зуурмаг” ХХК-ийн зуурмагийн үйлдвэр нь мөн л ялгаагүй орчны тохижилт сайтай, цэвэрхэн аж. 2007 оноос үйл ажиллагаагаа явуулж байгаа бөгөөд бусад бетон зуурмагийн үйлдвэрүүдэд байдаг  нийтлэг төрхөөс ялгарах нэг онцлог нь дүүргэгч материалыг стандартад заасны дагуу ширхэгээр нь төрөлжүүлэн ангилж нөөцөлсөн нь бусдад үлгэр дууриал болох төдийгүй хэрэглэгчдийн хүсэн хүлээдэг чанарыг хангах нэгэн үзүүлэлт болжээ гэж эрхгүй бодогдоно.

 MNS1185:1998 стандартын дагуу М100-М600 маркийн бетон зуурмаг үйлдвэрлэдэг энэхүү үйлдвэр нь SANY брэндийн цагт 60м³, 90м³, 180м³ бетон зуурмаг үйлдвэрлэх хүчин чадалтай 3 цехэд болон бетон зуурмаг тээвэрлэгч миксер машин, авто  болон суурин помп, өөрөө ачигч машин, задгай цемент тээвэрлэгч машин, түүхий эд тээвэрлэгч өөрөө буулгагч машин зэрэг нийт 30 гаруй машин механизмийн парктай төдийгүй өөрийн иж бүрэн физик механикийн сорилт шинжилгээ хийх лабораторитой, тусгай мэргэжлийн боловсон хүчинтэй.

Тасралтгүй долоон жил үйл ажиллагаа явуулж, чанартай бүтээгдэхүүн үйлдвэрлэж байгаагийнх салбартаа танигдаж, байнгын захиалагч хэрэглэгчтэй болсон гэнэ. Зөвхөн барилга угсралт ч бус өндөр чанарын гүүрийн байгууламжид бетон зуурмагийг нийлүүлж байгаа ажээ.
Дээр дурдсан үйлдвэрүүдээс гадна “Тэдмэнт”-ээр овоглосон аж ахуйн нэгж дахиад хоёр бий. Энэ нь “ТЭДМЭНТ СЕКЬЮРИТИ”  ХХК болон “Зууны анд” ХХК юм. "ТЭДМЭНТ" ХХК нь харуул хамгаалалтын алба нэртэйгээр анх үйл ажиллагаагаа эхлүүлж байсан бөгөөд  2013 онд “ТЭДМЭНТ СЕКЬЮРИТИ” ХХК болон өргөжжээ. Тус компани нь гэрээт харуул хамгаалалт, хувийн болон шадар хамгаалалт гэсэн төрлөөр иргэд, албан байгууллагуудад үйлчилгээ үзүүлдэг бөгөөд Улаанбаатар хот, Өмнөговь аймаг, Эрдэнэт хот зэрэг газруудын нийт 20 гаруй объёктод 60 орчим мэргэшсэн харуул хамгаалалтын ажилтнууд шуурхай бүлэгтэйгээр үүрэг гүйцэтгэж байна.

 ЗУУНЫ АНД" ХХК нь гадаад, дотоод худалдааны чиглэлээр 2007 онд байгуулагдан группын салбар компаниудын бараа материал, бүтээгдэхүүнүүдийг импортлон оруулж ирэх, тээвэрлэх, түгээх, хуваарилах зэрэг үйл ажиллагааг хариуцан ажилладаг. Түүнчлэн салбар компаниудын захиалгат бараа материалыг дотоодын зах зээлээс чанар, батламжтай, зах зээлийн бодит үнээр хурдан шуурхай худалдан авч нийлүүлдэг. 2014 онд компанийн үйл ажиллагаагаа өргөжүүлэн  салбар компаниудад машин техникийн үйлчилгээ үзүүлэх, тээвэр зуучийн салбарт цар хүрээгээ нэмэгдүүлэн ажиллаж байна.
Ийнхүү барилгын салбарт цогц бүтээн байгуулалтыг гардан хийж байгаа “Тэдмэнт” групп хэмээх нэгэн их айлаар зочлоод ирлээ.
Үндэсний бүтээн байгуулагчид үргэлжид өөдлөн дэвжиж, улам өргөжин тэлнэ гэдэгт хэзээд итгэнэ. “Барилга.МН” сэтгүүл дараа дараагийн сурвалжлагаар үндэсний бүтээн байгуулагчдаа үргэлжид дэмжин ажилласаар байх болно.