Ирээдүйд барилга, архитектурын салбарт автоматжуулсан технологи болон 3D хэвлэгчийн үйлдвэрлэл зонхилно гэж мэргэжилтнүүд үзэж байна. Австрийн архитектор Шенженд хэрэгжүүлэх шинэ төсөл буюу Орчин үеийн урлагийн музейн барилгад автоматжуулалт бүхий робот технологийг туршихаар шийджээ. Автоматжуулалтын технологийг барилгын салбарт ашиглах нь цаг болоод мөнгө хэмнэх давуу талтай гэж Волф Ди Прикс үзжээ.

     Барилгын мэдээллийн загварчлал буюу BIM системийг ашигласнаар тэд бетон цутгалт, угсралт, гагнах зэрэг ажлыг гүйцэтгэхээс гадна метал төмрүүдийг өнгөлөх аж. “Энгийн технологиор энэ төрлийн барилгын ажилд бид найман сарын хугацаа зарцуулж, 160 хүн ажиллуулах байлаа. Харин BIM системийг нэвтрүүлснээр барилгын талбайд 12 долоо хоногийн хугацаанд найман хүн л ажиллуулах боллоо.

     Энэ технологи архитекторуудад шинийг санаачлан хийх өргөн боломжийг олгож байна. Автоматжуулалтын технологийг ашигласнаар барилгыг богино хугацаанд эдийн засгийн хэмнэлттэйгээр барих боломжтой. Тиймээс шинэ төсөлдөө энэ гайхалтай боломжийг туршихаар шийдлээ” гэж Прикс өгүүлсэн юм.