Дайны хөлд нэрвэгдсэн Сири улс гадаад орнуудад дүрвэж буй цагаачдынхаа тоогоор дэлхий нийтийн анхаарлыг татаад зогсохгүй түүх дурсгалын үнэт өв болсон уран барилгуудаа алдаж байна. Дөрвөн жил гаруй үргэлжилсэн дайны улмаас тус улсаас дөрвөн сая орчим хүн дүрвэж, долоон сая хүн нутгаасаа дайжжээ. Газар сайгүй дэлбэрэлт болж, олон сая хүн орон гэрээ алдахын зэрэгцээ архитектурын түүх дурсгалын үнэт зүйлсээ сүйтгүүлэн алдаж байгаад мэргэжилтнүүд харамсаж буйгаа илэрхийлсэн.

     Сири улс дэлхийд гайхагддаг эртний уран барилгын түүх соёлын өв болон Лалын сүм хийдүүдээ олноор нь устгуулж байгаа аж. ЮНЕСКО-ийн Дэлхийн өвд бүртгэгдсэн МЭӨ гурав дахь хот бөгөөд Торгоны замын нэгэн чухал зогсоол байсан Палмира эртний хот болон бусад дурсгалт газруудын ихэнхийг Лалын улс бүлэглэлийнхэн эзлэн авчээ. Дамаск хотод орших, сүсэг бишрэлийн өлгий болсон Гэгээн Жон Баптистийн толгой бүхий бунханг хадгалдаг Умаяад сүм хамгийн их хохирол амсаад буй аж.

     Мөн XI зуунд баригдсан архитектурын сонгодог бүтээл болох нөгөө Умаяад хийд хэдийнэ дайны галд өртжээ. ЮНЕСКО-ийн Дэлхийн өвд бүртгэлтэй, түүх дурсгалын олон гайхамшигт барилгатай Алеппо эртний хотод ч дэлбэрэлт байнга гарч, сүйдэж байгааг мэргэжлийн хүмүүс анхааруулж байна.