Барилгын 3D хэвлэгч улам боловсронгуй болсоор байна. ОХУ-ын инженер Никита Чен-юн-тагийн танилцуулсан шинэ хэвлэгч нь бүх төрлийн хэлбэр дүрс бүхий хавтанг ямар ч хэмжээгээр үйлдвэрлэх боломжтой аж. Нэг өдрийн дотор олон давхар барилгыг угсрах хүчин чадалтай, ашиглахад хялбар, уян хатан ашиглалт бүхий “ApisCor” 3D хэвлэгч нь барилгын технологийн ирээдүй рүү чиглэсэн том алхам болжээ. 3D хэвлэлийн нано технологийн салбарт бичил хувьслаас 3D байшин хэвлэх хүртэл хүчин чадлыг нь нэмэгдүүлсэн олон дэвшил гарсан.

     Тухайлбал, Чен-юн-та “ApisCor” хэвлэгчийг бүтээхдээ байшин, барилгыг угсрахад гардаг өмнөх төхөөрөмжүүдийн нүсэр ажиллагаа, болхи байдлаас зайлсхийн, илүү боловсронгуй бат бөх болгон сайжруулж, ямар ч төрлийн гадаргууг хэвлэх хүчин чадалтай болгон бүтээхийг зорьжээ. Одоо тус хэвлэгчийн тухайд барилгын талбай руу зөөвөрлөх ажиллагааг хөнгөвчлөх асуудал л үлдсэн гэнэ. Харин уг машиныг зөөвөрлөж авчирснаас хойш гучхан минутын дараа ажиллуулж эхлэх боломжтой.

     Хэвлэгчид зохих материалыг хийсний дараа 24 цагийн хугацаанд 58,000 ам метр орчим талбай бүхий олон давхар барилгыг босгох хүчин чадалтай. Энэхүү дэвшилтэт технологийг ашигласнаар нөөц баялаг, эрчим хүчний хэрэглээг хэмнэх, хог хаягдлыг бууруулах, хөдөлмөрийн зардлыг багасгах олон давуу талтай. “Барилгын хог хаягдал гаргадаггүй, ердөө 8 киловаттын цахилгаанаар ажилладаг учраас экологичид энэ хэвлэгч машинд сэтгэл хангалуун байгаа” гэж “ApisCor”-ийг бүтээсэн багийнхан ярьсан юм.