Манай улсын барилгын салбар сүүлийн жилүүдэд бүтээн байгуулалтыг эрчимтэй явуулж байгаа нь улс орны эдийн засагт ихээхэн эерэг үзүүлэлтүүдийг үзүүлж байгаа билээ. Мөн цаашлаад ажлын байр олноор бий болж, гадаад худалдаа хөгжих зэрэг давуу талууд ихээр гарч байна.

     Гэсэн ч барилгын салбар инженерийн бүтээн байгуулалтыг зам, цэвэр бохир ус, дулаан гэсэн хэдхэн түвшинд шийдэж байгаа нь ирээдүйд сөрөг хүчин зүйлс гарах үндэс болно. Инженерийн дэд бүтэц нь нэг хороолол дотор олон тооны шугам хоолой кабель шугамын трасс байх ба тэдгээр нь засвар үйлчилгээ хийх, өргөтгөх боломж муу зэрэг дутагдалтай талууд ихээхэн байна. Инженерийн байгууламжийг шийдэхдээ засвар үйлчилгээ хийхэд хурдан шуурхай байх, өргөтгөх боломжтой байхаар шийдэх нь чухал. Гадна цахилгаан хангамжийн кабель шугам, харилцаа холбооны кабель, цэвэр бохир ус дулааны шугамыг нэгдсэн байгууламжинд хийж хүн чөлөөтэй явж засвар үйлчилгээ үзүүлэх бүрэн боломжтой байх  шаардлагыг хангаж байхаар төлөвлөх нь ихээхэн хэмнэлт болж байна. Ингэснээр ашиглалтын үеийн зардлыг хэмнэх, түргэн шуурхай засвар үйлчилгээ үзүүлэх бүрэн боломжтой болох юм. Түүнээс гадна манай улс ашиглалтын зардлыг бус угсралтын зардлыг тооцдог нь цаашид гарах зардлыг ихэсгэдэг байна.




     Барилгын дотор, гадна цахилгаан хангамжийн зөв төлөвлөлт нь цаашдын зардлыг хэмнэж өргөтгөх боломжийг нэмэгдүүлж хөдөлмөрийн бүтээмжийг ахиулдгаараа давуу талуудтай. Орон сууц олон нийтийн барилга нь өнөө үед дотоод тохижилтыг хурдан өөрчлөх боломжтой байх шаардлагыг бий болгож байгаа нь түүнийг дагаад цахилгаан холбоо сантехникийн шугамуудыг хурдан шуурхай өөрчлөх засварлах бүрэн боломжтой байх шаардлагыг бий болгож байна.



     Хөндий шалны систем нь эдгээр асуудлыг бүрэн хариуцсан инженерийн шийдэл юм. Энхүү систем нь утас кабелийг түргэн шуурхай солих, засварлах, шинээр сувагчлал хийх боломжийг бий болгож өгдөг олон давуу талуудтай. Хөндий шалны систем гэдэг нь бид бүгдийн мэдэх шалан дээр хөндий үүсгэн дахин шал хийж түүгээр цахилгаан, холбоо, сантехникийн шугам хоолойг явуулах тэдгээрт зориулж гал унтраах  системийг байрлуулах зэрэг давуу талуудыг бий болгодог.

     Хэрэглэгчдийг аюулгүй найдвартай эрчим хүчээр хангах нь тэдгээрийг хуваарилах түгээх асуудлаас шууд хамааралтай ба чанартай тоног төхөөрөмж ашиглах нь хамгийн тохиромжтой сонголт байдаг. Манай улсын барилгын салбар нь гол төлөв БНХАУ-н тоног төхөөрөмжийг ихээр хэрэглэдэг нь чанар болоод найдвартай ажиллагааг хангах тал дээр ихээхэн асуудлыг бий болгож байдаг. Цахилгаан эрчим хүч нь хир сайн чанартай бүтээгдэхүүн ашиглана тэр хирээр аюулгүй найдвартай ажилладаг онцлогтой билээ.



     Өнөө үед гал түймрийн ослын шалтгааны ихээхэн хувь нь цахилгаанаас үүсэлтэй байгаа нь чанар муутай материал болон шаардлага хангаагүй угсралтын ажлаас ихээхэн хамаарч байна. Тиймээс эрхэм уншигч та бүхэн цахилгааны аливаа угсралтыг хийхдээ мэргэжлийн хүн болон байгууллагаас зөвлөгөө туслалцаа  авах нь өөрийн болон бусдын эд хөрөнгө амь насанд учирч болзошгүй аюулаас бүрэн сэргийлэх ач тустай. Сүүлийн жилүүдэд эрчим хүч электроникийн салбар ухаалаг системд шилжиж байгаа нь бидний гэр орон албан тасалгааг аюулгүй найдвартай байдлаар хангаж байгаа билээ. Ухаалаг систем нь хэрэглэгч танд дараах боломжуудыг бий болгодог давуу талтай. Таны хэрэглэж байгаа эрчим хүчийг хэмнэх, аюулгүй байдлыг хангах, байгаль орчинд хор хөнөөлгүй, обьектыг зайнаас хянах удирдах боломжтой зэрэг болно.



     Манай улсын зураг төслийн байгууллагууд нь уламжлалт хэв маягийн ажлын зураг гаргадаг ба захиалагчид  дээрх бүтээгдэхүүнийг санал болгоход ихээхэн хүндрэл бий болж байна. Захиалагч байгууллагууд төлөвлөөгүй их хэмжээний зардал гаргахаас ихээхэн зайлсхийдэг нь чанартай бүтээгдэхүүн ашиглахад сөрөг хүчин зүйл болж байна. Европын улс орнууд нь ажлын зургийг хийхдээ чанартай бүтээгдэхүүнийг санал болгож тусгадаг нь эдийн засгийн хувьд ч урьдчилан тооцоолох боломжийг олгодог давуу талуудтай байна. Манай оронд гол төлөв ОХУ, БНХАУ-н бараа бүтээгдэхүүнийг санал болгодог бол эдгээр нь дээрх шийдлийг цогцоор шийдэх боломж багатай ба эдэлгээний хугацаа бага байдаг зэрэг дутагдалтай талуудтай байна.  Эдийн засгийн үр ашгаас илүү чанартай бүтээгдэхүүнийг хэрэглэгч та бүхэн сонгон хэрэглэж байна гэдэгт итгэлтэй байна.
 
"ТОПОЛОГИ" ХХК-нийн Ерөнхий инженер: С.Түвшинжаргал