Өглөөний наран хананы толгойд тусахаас гэрийн зүүн хоймор дэвссэн ширмэл ширдгэн дээр тусах үдэш хүртэлх цагийн баримжааг олгосон нар зөв, тойрог хэлбэрт миний “Монгол гэр” сууц өдгөө 10 мянган жилийг элээжээ. Түүнийг урлаж, өвлүүлэн үлдээж буй уран гарт түмэн юутай гайхамшигтай.


 Тэдгээрийн залгамж халаа болж яваа эрхмийн уран бүтээл, туурвилыг онцлон уншигч олноо танилцуулъя. “Уянгын гурван эрдэнэ” ХХК-ийг үүсгэн байгуулагч Б.Батзул нь гэр урлаад арваад жил болжээ. Энэ хугацаанд өөрийн компанийг салбартаа тэргүүлэх байр суурьтай болгож чадсан нь түүний тууштай зүтгэлтэй шууд холбоотой юм. Энгийн даруухан яриагаа зөөлөн инээмсэглэлээр чимэн байсан түүний сонирхолтой яриаг хүргэж байна.

-Үйлдвэрийнхээ талаар танилцуулна уу?
Манай компани 2010 оноос хойш үндсэн 14 ажилтантайгаар үйл ажиллагаа эрхэлж байна. Зуны ид ачаалалтай үед 20-30 ажилтан нэмж авч ажиллуулдаг. Сийлбэртэй Монгол гэр, тавилга, бэлэг дурсгал, гэрийн дагалдах бүтээгдэхүүн гээд модоор хийж болох бүгдийг л хийдэг дээ.

-Танай компанийн нэрний тухайд?
Манай гэр бүлийн хүнийг О.Уянга гэдэг. Би гурван хүүхэдтэй байхдаа компаниа нээж байсан юм. Одоо бол дөрөв болсон. Хүүхдүүдийн маань нэрэнд “Эрдэнэ” гэдэг үг орсон. Тэгээд л “Уянгын гурван эрдэнэ” гэж нэрлэсэн дээ.

-Ашиглаж буй тоног төхөөрөмжийн тухайд?
Ихэнх нь социализмын үеийн ЗХУ-ын багаж хэрэгслүүд. Хүчин чадал, бүтээмж өндөр, бат бөх чанартай гээд сайн төхөөрөмжүүд шүү. Сүүлийн үеийн дэвшилтэт технологийн багаж хэрэгслүүд ч бий. Үндсэн хийцийн бүх сийлбэрийг гараар буюу уламжлалт аргаар хийгддэг.

-Компаниа анх хэрхэн байгуулж, санхүүгийн асуудлаа яаж шийдвэрлэж байв?
Авсан бүх цалингаараа ганцаараа зориглоод л анхныхаа гэрийг хийж байлаа. Эхэндээ зээл авч эргэлдүүлж байсан ч өртэй хүн гэдэг төвөгтэй юм билээ. “Өртэй мөнгөтэй” юм шиг байснаас “өргүй мөнгөгүй” байсан нь дээр санагддаг. /инээв/

-Энэ чиглэлийн ажиллах хүчин хэр их байдаг вэ? Танайх сургаж авдаг уу?
Хүн сургана гэдэг тийм ч амар ажил биш. Хэдэн жил махаа зулгаан байж заагаад л овоо дөртэй болгож байтал орхиод явчихна. Хүн сургуулиа төгсөөд л хаяад явдаг, сургуульдаа үлддэг нь цөөхөн биз дээ. Түүнтэй л адилхан. Сургаж авсны оронд чаддаг хүнийг нь авч ажиллуулсан нь дээр байдаг.

-Яг одоо ямар захиалга дээр ажиллаж байгаа вэ?
Одоогоор амралтын газрын 11 гэр хийх захиалга аваад завгүй ажиллаж байна. Хугацаандаа амжихын тулд нэг гэрийг 5 хүн хийж байгаа.  

- Монгол гэрийг хийхэд нарийн ур ухаан шаарддаг нь тодорхой. Тэгвэл гэрийн загвар, зураг төсөл хэрхэн бүтдэг вэ?
Бүх зургийг захиалагчийн хүсэлтийн дагуу гараар зурж, эскизээ бэлтгэдэг. Манай ажилтнууд бүгд СУИС-ийг төгссөн, уран сийлбэрчид байдаг.

-Цуулбар хийцийн тухайд?
Одоогийнх шиг тоног төхөөрөмж байгаагүй хуучны цагт модыг туушаар нь зүсэхдээ цуулах аргыг ашигладаг байсан. Үүнийг цуулбар гээд байгаа юм. Өнөө үед бол үүнийг тоног төхөөрөмжөөр хийдэг болсон. Иргэдийн дунд цуулбар биш гэхээр чанар муутай гэсэн ойлголт яваад байдаг. Цаг үе өөрчлөгдөнө шүү дээ. Модыг заавал гараараа цуулах шаардлагагүй болсон үе. Тухайн гэрийн эд хэрэгслийг хийхдээ модыг ширхгийн дагуу зүсч, яр шархгүй модоор бэлтгэж л байвал хугарна, цуурна гэж байхгүй. 

-Модон материалын чанар хэр байна? Хаанаас материалаа бэлтгэж байна вэ?
Монголд модны бэлдэц маш тааруу. Стандарт хэмжээтэй мод гэж нэг ч байдаггүй. Хэмжээнээсээ дутуу, хаягдал ихтэй гээд чанарын шаардлага хангадаггүй. Гэлээ ч дотоодоосоо худалдан авч, материалын гологдол их хэмжээгээр гаргасан хэвээр ажлаа үргэлжлүүлж л байна. Гаднаас ирж байгаа бэлдцүүд хэт өндөр үнэтэй. Арай хямд, ойрхноор нь Оросоос авчирлаа гэхэд тээвэрлэлтийн явцад ил задгай вагон дээр норох, хатах, чийг авч хөгцрөх гээд асуудал ихтэй.

-Гэрийн зөөлөн эдлэлээ хаана бэлтгэж байна?
Манайх энэхүү хатуу эдлэлийн үйлдвэрээс гадна зөөлөн эдээ бэлтгэдэг оёдлын цехтэй. Бүгдийг өөрсдөө урладаг.

-Хатаалгаа хэрхэн хийдэг вэ?
Хатаалгын газар аваачаад өгчихдөг. Зарим зүйлийг чаддаг, мэддэг хүмүүс нь л хийсэн нь дээр.

-Тийм шүү. Манайхан гарах зардлаа бодоод бүгдийг нь өөрсдөө хийх гээд зүтгэдэг. Гэрийг чийгтэй модоор хийж болдог уу?
Гэрийн ханыг хэвэнд оруулахын тулд нойтон модоор хийдэг. Бас урьд нь малтмал тооно хийдэг байсан. Харин бусад эд хэрэгсэлд нойтон мод ашиглаж болохгүй.

-Таван ханатай иж бүрэн сийлбэр гэр хийхэд хэдий хэр хугацаа зарцуулдаг вэ?
Нарийн хэлэхэд хэцүү юм. Хамгийн хурдан хийсэн тохиолдол гэвэл 10 ханатай иж бүрэн сийлбэр гэрийг тавилгатай нь 20 хоногт гаргаж байсан. Энэ үед 30 орчим хүн ажилласан.

-Захиалга хэр их байна? Худалдан авагчид нь ямар хүмүүс байна?
Захиалга дажгүй шүү.  Гэр борлогдох хугацаа нь зуны гурван сар. Гэхдээ үйлдвэр зогсоно гэж байхгүй өвөлдөө хийх боломжтой, захиалгаар орж ирсэн бүгдийг хийнэ. Монголчууд өөрсдөө, шуудхан хэлэхэд ...... Үргэлжлэлийг /БАРИЛГА.МН сэтгүүлээс /






Үргэлжлэлийг Барилга.МН сэтгүүлийн 9-ээр сарын дугаараас...